මීළඟට සිදුවන්නේ කුමක්ද?
රට තුළ මතුවී තිබෙන ආර්ථික අර්බුදයට හිටපු ජනාධිපති ගෝඨාභය රාජපක්ෂ, හිටපු මුදල් අමාත්යවරුන් වන මහින්ද රාජපක්ෂ, බැසිල් රාජපක්ෂ ඇතුළු පිරිසක් වගකිව යුතු යැයි තීන්දු කළ ශ්රේෂ්ඨාධිකරණය එම පිරිස මූලික අයිතිවාසිකම් උල්ලංඝනය කර ඇතැයි (නොවැම්බර් 14 වැනිදා) තීන්දු කළේය.(Sri Lanka Latest News)
හිටපු මහබැංකු අධිපතිවරුන් වන අජිත් නිවාඩ් කබ්රාල්, මහාචාර්ය ඩබ්ලිව්.ඩී. ලක්ෂ්මන්, මුදල් අමාත්යාංශයේ හිටපු ලේකම් එස්.ආර්. ආටිගල, හිටපු ජනාධිපති ලේකම් පී.බී. ජයසුන්දර, ශ්රී ලංකා මහ බැංකුවේ මූල්ය මණ්ඩලය යන පිරිස මූලික මිනිස් අයිතිවාසිකම් උල්ලංඝනය කර ඇති බව අගවිනිසුරු ජයන්ත ජයසූරිය ප්රමුඛ පංච පුද්ගල ශ්රේෂ්ඨාධිකරණ විනිසුරු මඬුල්ලේ බහුතර විනිසුරුවරු මෙහිදී තීන්දු කළහ.
සමාජ මාධ්ය ඔස්සේ බොහෝ දෙනකු විමසා තිබුණේ මෙම තීන්දුවත් සමග වගඋත්තරකරුවන්ට දඬුවම් නියම කිරීමක් හෝ ඔවුන්ගෙන් වන්දි අයකර ගැනීමක් කළ හැකිද යන්න පිළිබඳවය.
ඒ අනුව මෙහි නීතිමය පසුබිම පිළිබඳ සහ මීළඟට සිදුවන්නේ කුමක්ද යන්න පිළිබඳ ජනාධිපති නීතිඥ යූ.ආර්. ද සිල්වාගෙන් විමසා සිටියෙමු.
‘ඔවුන් (වගඋත්තරකරුවන්) වගකිව යුතුයි කියලා තමා තීන්දුව දීලා තියෙන්නේ. වගකිව යුතු නම් මිනිස්සුන්ට ඒ පිළිබඳ නඩු දලා ඒ අයගෙන් වන්දි ඉල්ලීමක් කරන්න පුළුවන්. වෙනම වන්දි නඩු දාලා.’
‘එක් එක් පුද්ගලයාගේ මූලික අයිතිවාසිකම්වලට නෙමේ පොදුවේ නඩු තීන්දුව දීලා තියෙන්නේ, රටේ හැමෝගෙම මූලික අයිතිවාසිකම් කඩවුණා කියලා තමා මේ තීන්දුව දීලා තියෙන්නේ. ඒ තුළින් තමන්ට (එක් එක් පුද්ගලයාට තනි තනිව) පාඩුවක් වුණා කියලා කියමු… විශාල මූල්යමය හානියක් කොහේ හරි වෙලා තියෙනවා නම් ඒගොල්ලන්ට (වගඋත්තරකරුවන්ට) විරුද්ධව නඩු දාන්න පුළුවන්….’
මෙම නඩු සිවිල් වාණිජ අධිකරණයක හෝ දිසා අධිකරණයක පැවරිය හැකි බව ඔහු සඳහන් කළේය.
ඒ අනුව මෙම ආර්ථික තීරණ ගැනීම තුළ ඍජුව තමන්ට ආර්ථික හානියක් සිදුව ඇතැයි සනාථ කළ හැකි නම් ඕනෑම පුරවැසියකුට එම වන්දි නඩු ගොනු කිරීමේ හැකියාව පවතියි.
රාජපක්ෂවරුන්ට සිර දඬුවම් නියම කළ හැකිද?
ජනාධිපති නීතිඥ යූ.ආර් ද සිල්වා කියා සිටියේ අපරාධ වගකීමක් නොමැති නිසා දඬුවම් නියම කිරීමක් මෙහිදී සිදු නොවන බවය. මෙම නඩුවේදී නොසැලකිලිමත් බව සහ වගකීම් පැහැර හැරීම සම්බන්ධයෙන් මෙහිදී අවධානය යොමුවී ඇති බව ඔහු වැඩිදුරටත් සඳහන් කළේය.
ශ්රේෂ්ඨාධිකරණ තීන්දුවේ සඳහන් වන්නේ කුමක්ද?
වත්මන් ආර්ථික අර්බුදයට වගකිවයුතු පුද්ගලයන් සම්බන්ධයෙන් විමර්ශනයක් කරන ලෙස නියෝග කරන මෙන් ඉල්ලා ශ්රී ලංකා වාණිජ මණ්ඩලයේ හිටපු සභාපති චන්ද්රා ජයරත්න, පිහිනුම් ශූරයකු වන ජුලියන් බෝලිං ඇතුළු පිරිසක් සහ කොළඹ විවෘත විශ්වවිද්යාලයේ මහාචාර්ය මහිම් මෙන්ඩිස් ඇතුළු පිරිසක් මෙම පෙත්සම් ගොනුකර තිබිණි.
එම මූලික අයිතිවාසිකම් පෙත්සම් දෙකක් විභාග කොට තීන්දුව ප්රකාශයට පත් කරමින් මුර්දු ප්රනාන්දු, විජිත් මළල්ගොඩ, බුවනෙක අළුවිහාරේ යන විනිසුරුවරුන්ගේ එකඟත්වය ඇතිව අගවිනිසුරු ජයන්ත ජයසූරිය විසින් මෙම තීන්දුව ප්රකාශයට පත් කරනු ලැබීය.
සුළුතර නඩු තීන්දුව ප්රකාශයට පත්කළ පංච පුද්ගල විනිසුරු මඬුල්ලේ සාමාජික විනිසුරු ප්රියන්ත ජයවර්ධන සඳහන් කළේ තමන් අදාළ පෙත්සම් නිෂ්ප්රභ කිරීමට නියම කරන බවයි.
එම පෙත්සම් නිසි නීතිමය කාලසීමාව තුළ ගොනු කර නොමැති වීම ඇතුළු හේතු කිහිපයක් මත පෙත්සම නිෂ්ප්රභ කරන බවත් විනිසුරු ජයවර්ධන සඳහන් කළේය.
බහුතර විනිසුරුවරුන්ගේ තීරණය ප්රකාශයට පත් කළ අගවිනිසුරු ජයන්ත ජයසූරිය පෙන්වා දුන්නේ 2019 වසරේ නොවැම්බර් මාසයේ සිට 2022 වසරේ අගෝස්තු මාසය දක්වා කාල සීමාව තුළ වග උත්තරකරුවන් වගකිවයුතු නිලතල දරා ඇති බව පෙත්සම් විභාගයේදී අනාවරණය වූ බවය.
‘ආර්ථික අර්බුදය වැළැක්වීමට නිසි පියවර ගෙන නැහැ’
මෙම කාලසීමාව තුළ වගඋත්තරකරුවන් රට තුළ ආර්ථික අවපාතයක් මතුවිය හැකි බවට කරුණු වටහා ගෙන සිටි බව පැහැදිලි වන්නේ යැයි සඳහන් කළ අගවිනිසුරුවරයා මෙම තත්ත්වය වැළැක්වීමට ඔවුන් නිසි පියවර නොගත් බවත් සඳහන් කර සිටියේය.
එහි ප්රතිඵලයක් ලෙස අත්යවශ්ය සේවාවන් වන විදුලිය, ගෑස්, ඖෂධ ඇතුළු අත්යාවශ්ය සේවාවන් අඛණ්ඩව සපයා ගැනීමට නොහැකි තත්ත්වයක් උද්ගත වී මහජනතාව මෙන්ම රටද දැඩි අගාධයකට ඇදවැටුණු බවත් තීන්දුවේ සඳහන් කර තිබේ.
රට තුළ ආර්ථික අර්බුදයක් මතුවිය හැකි බවට ජාත්යන්තර මූල්ය අරමුදල ඇතුළු ආර්ථික විශේෂඥයන් මත පළකර තිබියදීත් වගඋත්තරකරුවන් ඒ සම්බන්ධයෙන් සැලකිලිමත්ව කටයුතු කළ ආකාරයක් පෙනී නොයන බවත් වත්මන් ආර්ථික අර්බුදය මැඬලීමට තමන් සියලු ක්රියාමාර්ග ගත් බවට වගඋත්තරකරුවන් කරනු ලබන ප්රකාශ පිළිගත නොහැකි බවත් නඩු තීන්දුවේ සඳහන් කර ඇත.
මේ තුළින් වගඋත්තරකරුවන් මහජන විශ්වාසය හා භාරය කඩකරමින් කටයුතු කර ඇති බවත් ඒ තුළින් ඔවුන් ආණ්ඩුක්රම ව්යවස්ථාව මගින් සහතික කර තිබෙන මූලික මිනිස් අයිතිවාසිකම් උල්ලංඝනය කර තිබෙන බවත් අගවිනිසුරුවරයා ප්රමුඛ පංච පුද්ගල විනිසුරු මඬුල්ලේ බහුතර වියතුන්ගේ තීන්දුවේ සඳහන් කර තිබේ.
කෙසේ වෙතත් මේ සම්බන්ධයෙන් වන්දි ගෙවන ලෙස අධිකරණය නියෝග නිකුත් නොකරන බව සඳහන් කළ විනිසුරු මඬුල්ලේ බහුතර විනිසුරුවරුන් වගඋත්තරකරුවන් විසින් පෙත්සම්කරුවන්ට රුපියල් 150,000 බැගින් නඩු ගාස්තු ගෙවිය යුතු බව වැඩිදුරටත් සඳහන් කර ඇත.
ගෝඨාභයගේ රජය රටට කළ ආර්ථික පාඩුව විගණනය කරන්නැයි ශ්රේෂ්ඨාධිකරණය දුන් නියෝගය
හිටපු ජනාධිපති ගෝඨාභය රාජපක්ෂගේ රජය යටතේ ගත් වැරදි ආර්ථික කළමනාකරණ තීරණ නිසා ජනතාවගේ මූලික අයිතිවාසිකම් කඩවී ඇතැයි පවසමින් ගොනුකළ මෙම මූලික අයිතිවාසිකම් පෙත්සම් 2 විභාග කිරීමට ශ්රේෂ්ඨාධිකරණයේ පංච පුද්ගල විනිසුරු මඬුල්ල තීරණය කරමින් වහාම විගණනයක් කරන ලෙසට (2022 ඔක්තෝබර් 07 වැනිදා) විගණකාධිපතිවරයාට නියෝග කරනු ලැබීය.
පෙත්සම්වලින් වගඋත්තරකාර පාර්ශ්වයන්ට එරෙහිව අපරාධ නඩු පැවරීමට පියවර ගන්නැයි, අල්ලස් හෝ දූෂණ චෝදනා විමර්ශන කොමිසමට නියෝග කරන ලෙසද පෙත්සම්කරුවන් ඉල්ලා තිබිණි.
● විගණකාධිපතිවරයා විසින් නොවැම්බර් 30 වැනි දින වන විට විගණනයක් පවත්වා වාර්තාවක් ඉදිරිපත් කිරීමට,
● ඩොලරයට සාපේක්ෂව ශ්රී ලංකා රුපියලේ අගය රුපියල් 203ක පවත්වාගෙන යාම සහ ඊට සම්බන්ධ සියලු කරුණු.
● ජාත්යන්තර මූල්ය අරමුදලේ සහාය ලබාගැනීමේ ප්රමාදය සහ ඊට සම්බන්ධ සියලු කරුණු.
● විදේශ සංචිත භාවිත කරමින් 2022 ජනවාරි 18 වන දින එක්සත් ජනපද ඩොලර් මිලියන 500ක ස්වෛරීත්ව බැඳුම්කර පියවීමට අදාළ සියලු කරුණු.
● එවැනි ගෙවීම් මගින් මහ බැංකුවට සිදුවූ පාඩුව පිළිබඳ විගණනයක්.
එවක මෙම පෙත්සම් විභාගයට අවසර දුන් අගවිනිසුරු ජයන්ත ජයසූරිය ප්රමුඛ පංච පුද්ගල ශ්රේෂ්ඨාධිකරණ විනිසුරු මඬුල්ල විගණකාධිපතිවරයාට නියෝග කර තිබුණේ, වහාම මෙම කරුණ ගැන විගණනයක් සිදුකර 2022 නොවැම්බර් 30 වැනිදාට පෙර ශ්රේෂ්ඨාධිකරණයට වාර්තා කරන ලෙසයි.
ශ්රේෂ්ඨාධිකරණ විනිසුරු මඬුල්ල වත්මන් මහ බැංකු අධිපති ආචාර්ය නන්දලාල් වීරසිංහට නියෝග කරනු ලැබුවේ හිටපු ජනාධිපති ගෝඨාභය රාජපක්ෂ, හිටපු මුදල් අමාත්ය මහින්ද රාජපක්ෂ, බැසිල් රාජපක්ෂ, කැබිනට් අමාත්යවරුන්, මහබැංකුවේ මුදල් මණ්ඩලය, හිටපු අධිපතිවරුන් දෙදෙනා, සහ භාණ්ඩාගාර ලේකම් එස්.ආර්. ආටිගල යන මහත්වරුන් යොමුකර ඇති සියලු ලිපි හා නිර්දේශ 2022 නොවැම්බර් 30 වැනිදා වන විට අධිකරණයට ඉදිරිපත් කරන ලෙසයි.
බීබීසී සිංහල වෙබ් අඩවියෙනි
