2024 වසරේ පමණක් මහබැංකුව සතු විදේශ සංචිත 47%ක පමණ වර්ධනයක් පෙන්නුම් කරන බව මහබැංකු වාර්තාවකින් හෙළිවන බව පේරාදෙණිය විශ්වවිද්යාලයේ මානව ශාස්ත්ර සහ සමාජ විද්යා පශ්චාත් උපාධි අධ්යයන අංශයේ අධ්යක්ෂ සහ ආර්ථික විද්යාව පිළිබඳ මහාචාර්ය වසන්ත අතුකෝරල මහතා පැවැසීය. (Sri Lanka Latest News)
මෑත කාලයේදී මහබැංකුව සතු විදේශ සංචිත ඉහළ අගයක් පැවැතුණේ 2020 ජනවාරි වනවිට වන අතර, එය ඩොලර් මිලියන 7,513ක් පමණ විය.
ඉන් පසුව එම අගය දිගින් දිගටම පහළ යන අතර, 2022 ජුනි මාසය වනවිට ඩොලර් මිලියන 1,854 දක්වා පහළ යෑමක් පෙන්නුම් කරනු ලබයි.
එහෙත් 2022 ජූලිවලින් පසුව එය නැවතත් ක්රමයෙන් ඉහළ යන අතර, 2023 දෙසැම්බර් වනවිට ඩොලර් මිලියන 4,392 දක්වාත්, 2024 ඔක්තෝබර් මාසය අවසන් වනවිට ඩොලර් මිලියන 6,467 දක්වාත් ඉහළ යෑමක් දැකගත හැකිය.
කෙසේ වුවද මේ තුළ චීනයෙන් හුවමාරු ක්රමයට ලබාගත් ඩොලර් මිලියන 1,400කට ආසන්න මුදල් ප්රමාණයක් පවතින බැවින් සත්ය වශයෙන්ම මහ බැංකුවට භාවිත කළ හැකි සංචිත පවතිනුයේ ඩොලර් මිලියන 5,000කට ආසන්න ප්රමාණයකි.
කලාපයේ අනෙකුත් රටවල් සලකා බලන විට බංග්ලාදේශ මහබැංකුව සතුව පවතින විදේශ සංචිත ප්රමාණය ඩොලර් මිලියන 25,500ක් පමණ වන අතර, නේපාලයේ එය ඩොලර් මිලියන 18,400ක් ලෙස දැක්වේ.
ලෝකයේ ඉහළම සංචිත ප්රමාණය පවතින රටවල් පහ ලෙස චීනය, ජපානය, ස්විට්සර්ලන්තය, ඉන්දියාව සහ රුසියාව හැඳින්විය හැකි බවයි මහාචාර්යවරයා පවසන්නේ.
චීනයේ ඩොලර් බිලියන 3,571ක්ද, ජපානයේ ඩොලර් බිලියන 1,239ක්ද, ස්විට්සර්ලන්තයේ ඩොලර් බිලියන 953ක්ද, ඉන්දියාවේ ඩොලර් බිලියන 682ක්ද, රුසියාවේ ඩොලර් බිලියන 628ක්ද පවතින බව වාර්තා වේ.
ඒ අනුව, මෙම රටවල් ලෝකයේ ශක්තිමත්ම ආර්ථිකයන් පවතින රටවල් ලෙස හැඳින්විය හැකිය.
ප්රේමලාල් විජේරත්න
