75 වැනි නිදහස් සමරුවට පිළිවෙතින් පෙළගැසෙමු. එක එක්කෙනා එක එක තැන්වල එක එක කයි කතන්දර කියයි. එහෙම කිව්වට සැලෙන්න එපා. මේක තමයි නියම නිදහස. 75 වැනි නිදහස අපි සමරන්නම ඕනෙ නිදහසක්. ඇත්ත වශයෙන්ම කියනවා නම් මෙච්චර නිදහසක්, මෙච්චර කාලෙකට අපට දැනිලම නෑ. දැන් බලන්න හැම දේම හැම වෙලාවකම හැම විදියකටම නිදහස් වෙලයි තියෙන්නේ. පොත්පත් නැති නිසා, කඩදාසි ටික නැති නිසා ඇත්තටම ළමයින්ට නිදහසක් දැනෙන්නෙ නැද්ද? ඉදිරියේදී පෙළපොත් ටික මුද්රණය කරගන්න බැරි වුණාම ඒකෙන් නිදහසක් ඇතිවෙන්නෙ නැද්ද? ඉස්පිරිතාවල බෙහෙත් නැතිව ගියාම බේත් බොන්න බේත් බොන්න කියලා බලකරන රෝගීන්ට නිදහසක් නැද්ද? සැත්කම් කරගන්න බැරිව ගියාට පස්සේ දොස්තර මහත්තුරුන්ට නිදහසක් නැද්ද? ඉස්පිරිතාලෙ වැඩ ටික නතර වුණාට පස්සේ හෙද හෙදියන්නට නිදහසක් නැද්ද? මේ ඔක්කොටම විශාල නිදහසක් දැනෙන කාලයක් තමයි දැන් උදාවෙලා තියෙන්නේ.
පහුගිය කාලේ තෙල් ගහගෙන එහෙට මෙහෙට පැය 24ම දුවපු ත්රීවීල් රියැදුරන්ට කොච්චර නිදහසක් තිබුණද තෙල් පෝලිම්වල? ඒ වගේම ගෑස්වලින් හැමදාම ලිප් පත්තු කරපු කුස්සිවල ලිපට පවා නිදහසක් දැනිච්ච කාලයක් මෙච්චර කාලෙකට උදාවුණා කියලා අපි හිතන්නේ නෑ. දැන් ඉස්සරහට එන්නේ ගොවියන්නට නිදහස උදාවෙන කාලේ. ඒ කියන්නේ පෝර නැති නිසත් ගොවියන්ට නිදහසක් තිබුණා. ඒක වෙනම එකක්. ඇත්තටම පෝර නැති කාලේ හැමදාම කුඹුරේ මැරිච්ච වෙහෙසිච්ච ගොවීන් රැසක් කුඹුරු අතහැරියා. කුඹුරුවල කලින් වැඩ කළත් සමහරුන්ට අස්වනු කපාගන්න බැරිව ගියා. කුඹුරුවල ගොයම් කපනවා කියන්නේ හරියට වැඩ තියෙන කාලයක්. ඒ නිසා ගොයම් නොකපපු ගොවියෝ නිදහසේ හිටියා. කුඹුරුවලට පෝර දාගන්න බැරිව ගිය නිසා කුඹුරු අතහැරපු ගොවියෝ නිදහසේ හිටියා. ඉස්සරහට තිරිඟු පිටි හිඟය වගේ ප්රශ්න ඇති වෙනකොට රටේ පාන්, බේකරි නිෂ්පාදනවලට නිදහසක් උදාවෙනවා. ඒ වගේම කරන්ට් බිල වැඩිවුණාට පස්සේ අපට සෑහෙන්න විශ්වාසයක් තියෙනවා ලංකාවේ ගොඩක් ව්යාපාර වැහිලා යනවා. එතකොට ඒ ව්යාපාරවල වෙහෙසෙන, උදේ වැඩට යන, හවස ගෙදර එන හැම මනුස්සයෙකුටම ලොකු නිදහසක් ලැබෙනවා. ඒගොල්ලන්ට නිදහසේ ඉන්න ලැබෙන කාලයක් විදියට මේ කාලය අපට සලකන්න පුළුවන්.
අපි දන්නවා උප්පැන්න සහතිකයවත් ලියාගන්න බැරි තත්ත්වයකට ලංකාව පත්වෙලා තියෙන්නේ. උප්පැන්න ලියන එක නතර වුණාම, උප්පැන්න සහතික කන්තෝරුවල රාජකාරි කරපු අයට නිදහසක් ලැබෙනවා. ඒ නිසා මේ හැමෝටම නිදහස උදාවෙන කාලයක් ඇත්තටම මේ විදියට උදාවෙලා නෑ කියලයි අපට හිතෙන්නේ. ඒ නිසා මේක තමයි නියම නිදහස. ව්යාපාර පැත්තෙන් ගත්තොත් අපි දන්නවා බිත්තර සම්බන්ධයෙන් ප්රශ්නයක් මතුවුණා. බිත්තර ප්රශ්නය ඇතිවුණාම බිත්තර අලෙවිසල්වල මිනිස්සු නිදහසේ හිටියා. ඒ නිසා ඒක නිදහසක්. මේ වගේ රටේ හැම පැත්තෙන්ම බැලුවම කොයි විදියෙන් වුණත් මිනිස්සු ඉන්නේ නිදහසේ. ඒ නිසා මේක තමයි හරිම නිදහස. මේක තමයි සමරන්න ඕනෙ නිදහස.
දේශපාලනික වශයෙන් අපේ රටේ දේශපාලකයෝ ගොඩ දෙනෙක් පහුගිය කාලේ නිදහසේ හිටියා. ඒගොල්ලන්ට නිදහස සමරමින් නිදහසේ ආතල් එක ගනිමින් ඉන්න පුළුවන්කමක් තියෙනවා. ඇත්තටම කතාබහක් තිබුණා අත්අඩංගුවට ගන්නවා, හොරු අල්ලනවා, හොරකම් කරපු අයට දඬුවම් කරනවා කියලා. හැබැයි ඒගොල්ලන්ට නිදහස ලැබුණා. ඒක නිසා මේක තමයි හරි නිදහස. 75 වැනි නිදහස තමයි හරියටම සමරන්න ඕනෙ. ඒක නිසා අපි මේ නිදහසට පිළිවෙතින් පෙළගැහෙනවා. එක එක්කෙනා කඩාකප්පල්කාරීව එක එක දේවල් කියයි. ඒත් සැලෙන්න එපා. කවුරු මොනවා කිව්වත් අපි නිදහසේ ආතල් එක ගන්නම ඕනෙ. ඒක නිසා මේක තමයි නියම නිදහස. තව ටික කාලෙකින් බඩටත් නිදහසක් උදාවෙනවා. ඇයි, උදේ ඉඳන් රෑවෙනකල් වේල් තුනක් කාලා බත්වලින් පුරවගත්තු බඩවල්වලින් අපේ ඇඟේ හැම ශරීර කොටසක්ම හරිම වෙහෙසට පත්වෙලයි තිබුණේ. ඒක නිසා දවසක් දෙකක් බඩගින්නේ හිටපුවාම බඩටත් නිදහසක් උදාවෙනවා. අපේ ශරීරයේ හැම කොටසකටම නිදහසක් උදාවෙනවා. සමහර විට අවසානෙදී හෘද වස්තුවටත් නිදහසක් උදාවෙන්න පුළුවන් මේ යන විදියට. ඒක නිසා නිදහස කියන එක හරියට තේරුම් ගන්න ඕනෙ. නිදහස උදහසක් කරගන්නෙ නැතුව අපි ඔක්කොම එකතු වෙලා 75 වැනි නිදහසට පිළිවෙතින් පෙළගැහෙමු. එහෙනම් ඔන්න මේ නිදහස් මොහොතේ ආයෙත් කියන්න ඔක්කොම එකතු වෙලා ‘අපි නිදහස සමරමු…’ මේක තමයි පට්ටම නිදහස. ඇත්තටම කියනවා නම් මෙහෙම නිදහසක් දැනිලම නෑ.
ජීවන පහන් තිළිණ
