ලංකාවේ 2022 පළමු කාර්තුව වනවිට සේවා නියුක්තව සිටි පිරිස 83,85,531ක් වූ අතර, 2024 පළමු කාර්තුව වනවිට එය 79,01,693ක් දක්වා 6%කින් පමණ පහළ ගොස් ඇති බව ජන හා සංඛ්‍යාලේඛන දෙපාර්තමේන්තුව විසින් නිකුත් කරන ලද ශ්‍රම බළකාය පිළිබඳ නවතම සමීක්ෂණ වාර්තාවලින් පෙන්නුම් කරන බව පේරාදෙණිය විශ්වවිද්‍යාලයේ මානව ශාස්ත්‍ර සහ සමාජ විද්‍යා පශ්චාත් උපාධි අධ්‍යයන අංශයේ අධ්‍යක්ෂ සහ ආර්ථික විද්‍යාව පිළිබඳ මහාචාර්ය වසන්ත අතුකෝරල මහතා පැවැසීය. *Sri Lanka Latest News)
මේ අනුව පසුගිය වසර දෙකක කාලය තුළ 4,86,838කට පමණ රැකියා අහිමි වී තිබේ.
මේ තුළ කාන්තාවන් 1,72,276ක් පමණ සිටින අතර, පිරිමින් 3,14,562ක් සිටින බව එම වාර්තාවෙන් පැහැදිලි වේ.
කෘෂිකර්මාන්තය තුළ රැකියා අහිමිවීම් 58,569ක් වාර්තා වන අතර, සේවා අංශය තුළ 35,544කට රැකියා අහිමිවීම් වාර්තා වේ.
වැඩිම රැකියා අහිමිවීමක් වාර්තා වන්නේ කර්මාන්ත අංශය තුළ වන අතර, එහි සේවය කළ පුද්ගලයන් 3,92,725කට පමණ අදාළ වසර දෙකක කාලය තුළ රැකියා අහිමිවීම් සිදුව ඇත.
ආර්ථිකය තුළ සැලකිය යුතු ආකාරයේ වර්ධනයක් සිදු නොවන්නේ නම් රටේ සේවා නියුක්තිය ඉහළ නංවා ගැනීමට නොහැකි වන අතර, මෙම පුද්ගලයන්ගේ ජීවන තත්ත්වය තවදුරටත් කඩාවැටීමට එතුළින් හැකියාව ලැබේ.
එම නිසා ආර්ථික වර්ධනය සඳහා ප්‍රමුඛතාව දෙමින් රාජ්‍ය ප්‍රතිපත්ති සැලසිය යුතු බවයි මහාචාර්ය වසන්ත අතුකෝරල මහතා පවසන්නේ.
ප්‍රේමලාල් විජේරත්න
