ලංකාවේ රාජ්ය සේවාවන්ගේ කාර්යක්ෂමභාවය සහ එහි ඵලදායිතාව පිළිබඳවත් සමස්තයක් ලෙස රාජ්ය සේවාවන්හි කාර්යසාධනය කුමන ආකාරයකට සිදුවේද යන්න ගැනත් පේරාදෙණිය විශ්වවිද්යාලයේ මහාචාර්ය දෙපළක් වන ආර්ථික විද්යා සහ සංඛ්යාන අධ්යයන අංශයේ මාහාචාර්ය වසන්ත අතුකෝරල මහතා සහ මහාචාර්ය මාලක රණතිලක යන මහත්වරුන් විසින් සමීක්ෂණයක් සිදුකොට ඇත. (Sri Lanka Latest News)
ඒ තුළ පැහැදිලි වන ප්රධාන කාර්යයක් වන්නේ පසුගිය වසර තුනක කාලය තුළ රාජ්ය සේවා ලබාගැනීමට ගොස් ඇති අයගෙන් 31%ක් පමණ කුමන හෝ ආකාරයකට අල්ලස් ලබාදීම මගින් එම කාර්යය ඉටුකරගෙන ඇති බවයි.
ඒ අනුව, සාමාන්ය පුද්ගලයකු ලබාදී ඇති අල්ලස් මුදල රුපියල් 30,000ක් බව පෙන්නුම් කෙරෙන බව මහාචාර්ය අතුකෝරල මහතා පැවැසීය.
අල්ලස් ලබාදීම රුපියල් 500 සිට රුපියල් 8,00,000 දක්වා පරාසයක් තුළ සිදුව ඇති බව පැහැදිලි වන බව සඳහන්ය.
මෙම සමීක්ෂණය දිවයින පුරා සිටින 500කට අධික පිරිසක් තෝරාගෙන මාස කිහිපයක් තිස්සේ සිදුකර ඇති බවද සඳහන්ය.
ඉහළ මුදලක් අල්ලස් ලෙස ලබාදී ඇත්තේ තම දරුවන් පාසල්වලට ඇතුළත් කරගැනීමට සහ ඉඩම් ගොඩකර ගැනීමේ කාර්යය සඳහා බවද හෙළිව තිබේ.
මෙහිදී ජනප්රිය පාසල්වලට ළමුන් ඇතුළත් කිරීම සඳහා රුපියල් 50,000 සිට රුපියල් 800,000ක පරාසය තුළ අල්ලස් දී ඇති බවයි අනාවරණ වන්නේ.
අල්ලස්වලට අමතරව ත්යාග ලෙස වටිනා භාණ්ඩ ලබාදෙන තත්ත්වයක්ද පෙන්නුම් කෙරෙන බව සඳහන්ය.
සමහර අවස්ථාව මත්පැන් බෝතල්ද අල්ලස් වශයෙන් ලබාදී ඇති බව හෙළිදරව් වී ඇත.
මහාචාර්ය වසන්ත අතුකෝරල මහතා පෙන්වා දෙන පරිදි පාසල්වල සිටින ඇතැම් විදුහල්පතිවරු ඇතුළු නිලධාරීන්ගේ වත්කම් පිළිබඳ රහසිගත පරීක්ෂණයක් සිදුකළහොත් එම තත්ත්වය අවම කරගැනීමට හැකි වන බවයි පවසන්නේ.
මෙමගින් මුදල් නොමැති මවුපියන්ට ඇතිවන මානසික පීඩනය මෙන්ම දරුවන්ට සිදුවන අසාධාරණය වළක්වා ගැනීමට තවමත් වගකිව යුත්තන්ගේ අවධානය යොමුව නොමැති බවද මහාචාර්යවරයා පැවැසීය.
ප්රේමලාල් විජේරත්න
