රට අන්ත අසරණ තත්වයකට වැටී තිබුණු මොහොතේදී සියලු දෙනා කැපවී මේ පාලනය ගෙන ඒමට ඉදිරිපත් වුණේ හොරකම් දූෂණ කිරීමට ඉඩදී ඇස් කන් පියාගෙන බලා සිටීමට නොවේ යැයි හිටපු ක්රීඩා අමාත්ය, පොලොන්නරු දිස්ත්රික් මන්ත්රී රොෂාන් රණසිංහ මහතා පාර්ලිමේන්තුවේදී අද (28) පැවසීය.Sri Lanka Latest News
දූෂණ වෙනුවෙන් තමා ඉදිරිපත් වූයේත් හරි තැන සිට ගත්තේත් ඒ නිසා බව පැවසූ මන්ත්රීවරයා ක්රිකට් දූෂණ යට ගැසීම ගැන කණගාටුවන බවද ප්රකාශ කළේය.
අනෙක් අයට විපක්ෂනායකවරයා සමග සාකච්ඡා කිරීම හොඳ නම් තමා සාකච්ඡා කිරීම වරදක් වන්නේ කෙසේදැයි ඔහු ප්රශ්න කළේය.
රොෂාන් රණසිංහ මහතා මෙසේ පැවසුවේ වරප්රසාද ප්රශ්නයක් මතු කරමිනි.
ජනාධිපතිවරයා රොෂාන්ට කළ බව කියන චෝදනා මාධ්ය වාර්තා කොට තිබූ අයුරු!
ක්රීඩා අමාත්යාංශයට හා වාරි මාර්ග අමාත්යාංශයට අදාලව ජනාධිපතිවරයා කැබිනට් මණ්ඩලයේ දී යොමු කළ ප්රශ්න දෙකකට රොෂාන් රණසිංහ මහතාට නිසි පිළිතුරක් නොවූ බවද ඉන් පසු ජනාධිපති රනිල් වික්රමසිංහ මහතා ඔහු ධූරයෙන් ඉවත් කිරීමේ ලිපිය බාරදී තිබෙන බවත් දේශපාලන ආරංචි මාර්ග පවසයි.
ක්රිකට් අර්බුදය විසදා ගැනීම වෙනුවෙන් ජාත්යන්තර ක්රිකට් කවුන්සිලය හා සාකච්ඡා කිරීමට කැබිනට් මණ්ඩලය විසින් අනු කමිටුවක් පත් කර තිබිදී ක්රිඩා ඇමතිවරයා ලෙස විපක්ෂ නායක සජිත් ප්රේමදාස මහතාගේ කාර්යාලය වෙත ගොස් සජිත් ප්රේමදාස හා විපක්ෂ සංවිධායක ලක්ෂ්මන් කිරිඇල්ල සමඟ ක්රිකට් අර්බුදය විසදීම සඳහා ඉන්දියන් මහ කොමසාරිස් කාර්යාලය හා කතා කළේ ඇයිදැයි ජනාධිපතිවරයා විමසා ඇත.
දෙවෙනි පැනය ලෙස ජනපති විමසා ඇත්තේ මහවැලි ඉඩම් බෙදා දීම වෙනුවෙන් ඇමතිවරයා ලෙස ඔහු ඉදිරිපත් කළ කැබිනට් පත්රිකාවෙන් යෝජනා කර තිබූ පිරිසෙන් බහුතරයක් ඔහුගේ දේශපාලන හිතවතුන් සහ ඥාතී මිත්රාදීන් වූයේ ඇයි ද යන්නයි.
එසේ කළේ මන්දැයි විමසා ඇති ජනපති ඉඩම් හිමි අහිංසක ජනතාව සිටියදී මෙලෙස කිරීම ගැටළුවක් බවද පෙන්වා දී තිබේ.
එම ප්රශ්න දෙකටම ඇමතිවරයා නිරුත්තරවීම නිසා කැබිනට් මණ්ඩල සාමුහිකත්වය කඩ කිරීම පිළිබඳව පෙන්වා දෙමින් ජනාධිපතිවරයා විසින් ඔහුව ඇමතිධූරයෙන් ඉවත් කිරීමේ ලිපිය බාරදී ඇත.
කැබිනට් සාකච්ඡාවකින් පසු ඇමතිවරයෙක් සිය ධූරයෙන් ඉවත් කළ පළමු ජනාධිපතිවරයා ලෙස මෙය ඉතිහාසගත වනු ඇතැයි දේශපාලන විචාරකයෝ පවසති.
