ශ්රී ලංකා පොලිසියේ 37 වෙනි පොලිස්පති ලෙස පත්කිරීමට ජනපති අනුර කුමාර දිසානායක විසින් යෝජනා කළ නීතීඥ ප්රියන්ත වීරසූරිය එම ධුරයට පත් කිරීමේ ලිපිය ජනාධිපතිවරයා විසින් ලබා දීමෙන් අනතුරුව ඔහු පොලිස්පති ධුරයේ රාජකාරි ඇරඹීමට නියමිතයි.Sri Lanka Latest News
පොලිස් කොස්තාපල්, උප පොලිස් පරීක්ෂක සහ සහකාර පොලිස් අධිකාරී යන අවදි තුනම පසුකරමින් පොලිස්පති ධූරයට පත්වූ ශ්රී ලංකා පොලිසියේ මෙතෙක් බිහිවූ එකම පොලිස්පතිවරයා ලෙස ප්රියන්ත වීරසූරිය පොලිස් ඉතිහාසයම අලුත් කර තිබෙනවා.
ආධුනික පොලිස් කොස්තාපල්වරයෙක් ලෙස ප්රියන්ත වීරසූරිය මුලින්ම පොලිස් සේවයට එක්වන්නේ 1988 වසරේ මැයි 20 මාසයේදීයි.
අනතුරුව ඔහු කොස්තාපල්වරයෙක් ලෙස සේවයේ නිරතව සිටියදීම 1992 වසරේ අගොස්තු 02 දා ආධුනික උප පොලිස් පරීක්ෂකවරයෙක් ලෙස ඔහු නැවත පොලිස් සේවයට එක්ව තිබෙනවා.
ඒ වන විට ඔහු විශ්වවිද්යාල වරම්ද හිමිකරගෙන අවසන්.
පොලිස් සේවයේ රැදී සිටියදීම කොළඹ විශ්වවිද්යාලයට ඇතුලත්ව එල්.එල්.බී. නීති උපාධිය හිමිකරගන්නා ප්රියන්ත වීරසූරිය ආධුනික සහකාර පොලිස් අධිකාරීවරයෙක් ලෙස නැවතත් පොලිස් සේවයට එක්වන්නේ ආධුනික සහකාර පොලිස් අධිකාරීවරු බඳවා ගන්නා තරග විභාගයෙන් ඉහළින්ම සමත්වයි.
ඒ අනුව 1999 වසරේ මාර්තු 05 වෙනිදා ආධුනික සහකාර පොලිස් අධිකාරීවරයෙක් ලෙස පොලිස් සේවයට එක්ව තිබෙනවා.
බස්නාහිර පළාත් භාර ජ්යෙෂ්ඨ නියෝජ්ය පොලිස්පති සංජීව ධර්මරත්න, පුහුණු හා උසස් අධ්යාපන අංශය භාර ජ්යෙෂ්ඨ නියෝජ්ය පොලිස්පති සජීව මැදවත්ත, දකුණු පළාත් භාර ජ්යෙෂ්ඨ නියෝජ්ය පොලිස්පති කිත්සිරි ජයලත්, අපරාධ හා රථවාහන අංශය භාර ජ්යෙෂ්ඨ නියෝජ්ය පොලිස්පති රන්මල් කොඩිතුවක්කු, සහයක සේවා භාර ජ්යෙෂ්ඨ නියෝජ්ය පොලිස්පති රාජිත ශ්රී දමින්ද එම නිලධාරීන් මෙන්ම පොලිස් නාවික අංශය භාර නියෝජ්ය පොලිස්පති නාලක ද සිල්වා ප්රියන්ත වීරසූරිය සමඟ ආධුනික සහකාර පොලිස් අධිකාරීවරුන් ලෙස එක්වූවන් බවද සඳහන්.
එක්සත් ජාතීන්ගේ සාම සාධක හමුදාවේද අවස්ථා කිහපයකදීම සේවයේ නිරතව සිට ඇති ප්රියන්ත වීරසූරිය 2015 වසරේදී එල්.එල්.එම්. උපාධියද සම්පූර්ණ කළා.
අනතුරුව ඔහු 2019 වසරේදී කොළඹ විශ්වවිද්යාලයෙන් මානව සම්පත් කළමනාකරණය සම්බන්ධයෙන් උපාධියද ලබාගෙන තිබෙනවා.
ජනාධිපති අනුර කුමාර දිසානායක විසින් ප්රියන්ත වීරසූරිය වැඩ බලන පොලිස්පති ලෙස පත්කරනු ලබන්නේ 2024 සැප්තැම්බර් 27 වෙනිදාය.
1969 පෙබරවාරි 09 වෙනිදා උපන් ප්රියන්ත වීරසූරිය සිය වයස අවුරුදු 60න් පොලිස් සේවයෙන් විශ්රාම ගැනීමට නියමිත ව ඇත්තේ 2029 වසරේ පෙබරවාරි 09 වෙනිදාටයි.
