තමාට එන්තරවාසියක් එවා අපහාස වන්දි රුපියල් බිලියනයක් ඉල්ලූ නාමල් රාජපක්ෂ නියමිත දිනයේදී දිසා අධිකරණයේ අදාළ නඩුව පැවරුවේ නැතිනම් හරස් ඉල්ලීමක් කර තමන් නාමල් රාජපක්ෂට එරෙහිව නඩුවක් පවරන බව මහජන ආරක්ෂක නියෝජ්ය අමාත්ය සුනිල් වටගල ඊයේ (සැප්. 10) පාර්ලිමේන්තුවේදී පැවසුවේය.Sri Lanka Latest News
ඔහු මේ බව පැවසුවේ, පසුගිය 07 වන දා මත්කුඩු ජාවාරම් සම්බන්ධව නාමල් රාජපක්ෂගේ ඡායාරූපයක් ද පෙන්වමින් සුනිල් වටගල සිදුකළ ප්රකාශයක් සම්බන්ධව අපහාස නඩුවක් පවරන බවට එවූ එන්තරවාසියක් පිළිබඳව පාර්ලිමේන්තුවේදී මතුවූ කරුණකට පිළිතුරු දෙමිනි.
එහිදී නියෝජ්ය අමාත්යවරයා මෙසේ පැවසුවේය.
මේ ගරු සභාවේ කියැවුණා චානක මන්ත්රිතුමා විසින් ඔහුගේ ජාතික සංවිධායක නාමල් රාජපක්ෂ මා වෙත එන්තරවාසියක් එවා ඇති බව. සමාජ මාධ්ය පරිහරණය කළාම එන්තරවාසිය සමාජ මාධ්යයේ තියෙනවා. නිල වශයෙන් මට ලැබිලා නෑ.
එතුමා දාන්න යන්නේ අපහාස නඩුවක්. මම හිතන්නේ එතුමා උසාවියේ ප්රැක්ටිස් කළේ නැති නිසා දන්නේ නැතිව ඇති අපහාස නඩුවක ස්වභාවය. අපහාස නඩුවක ප්රධාන ස්වභාවය තමයි ගරු මැතිනියනි අපහාස නඩුවක පැමිණිලිකරුගෙන් විත්තිකරුට ඕනෑම ප්රශ්නයක් අහන්න පුළුවන්. වෙනත් නඩුවල බෑ. විෂයට අදාළ කාරණා විතරයි. විෂයෙන් පරිබාහිර ඕනෑ ම ප්රශ්නයක් අහන්න තියෙන එකම නඩුව අපහාස නඩුව.
ඒක හින්දා විශේෂයෙන් ම පැමිණිලිකරු වීදුරු ගෙවල්වල ඉන්න හොඳ නෑ. දැන් වීදුරු ගෙවල්වල ඉන්න මහත්තයෙක් අපට ඇඟිල්ල දික් කරලා කියනවා දැන් ඔයාට රුපියල් බිලියනයක් ඉල්ලලා එන්තරවාසියක් එව්වා කියලා. මේ එන්තරවාසියේ පිටපතක් සමාජ මාධ්යයකින් ගත්තා.
ඒකේ එක ම සාධකයයි. චරිතය තමයි විෂය ගත කාරණාව වෙන්නේ. අපහාස නඩුවක් දාන කෙනා පිරිසිදු දෑතින් ඉන්නවා නම් චරිතය තමයි ප්රශ්නය වෙන්නෙ. එතකොට එතුමාගේ චරිතය සුද්ද වෙන්න ඕන.
එතුමාගේ කොළේ ලියලා තියනවා එතුමා එංගලන්තයේ සිටි විශ්වවිද්යාලයෙන් නීතිවේදී උපාධියක් ලැබුවා කියලා. මම දැන් යනවා මැතිනියනි හරස් ප්රශ්න කීපයක් අහන්න එතුමාගෙන් නඩුව දැම්මට පස්සේ. අපි වගකීමකින් කියනවා. අද ඉඳන් දින 14යි දීලා තියෙන්නේ. මම හිතන්නේ ඒ දිනය ලබන 24 හෝ 25 වෙන්න ඕන.
25 වන දා ඔබතුමා කොළඹ දිසා අධිකරණයේ නඩුව දාන්න. නඩුව දැම්මට පස්සේ මට තියෙනවා හරස් ප්රශ්න කිහිපයක් අහන්න. මොකද එතුමාගේ මූලික සාක්කිනේ. ඊට පස්සේ මට තියෙන්නේ හරස් ප්රශ්න අහන්න.
