2022 වසරේ ආර්ථික අර්බුදය පැවති සමයේ ගාල්ල කොටුව අසල නීතිඥවරු පිරිසක් පැවැත් වූ සාමකාමී විරෝධතාවට පොලීසිය කඩා වැදී බාධා කිරීමේ සිද්ධිය සම්බන්ධයෙන් එවක ගාල්ල ප්රදේශයේ භාරව සිටි නියෝජ්ය පොලිස්පතිවරයා ඇතුළු තුන්දෙනෙකු අද එම නීතිඥවරුන්ගෙන් කොන්දේසි විරහිතව ශ්රේෂ්ඨාධිකරණය හමුවේ සමාව අයැද සිටියා.Sri Lanka Latest News
පොලිසිය විසින් සිදු කළ එම ක්රියාව තුළින් සිය මූලික මිනිස් අයිතිවාසිකම් උල්ලංඝනය වූ බවට චෝදනා කරමින් ගාල්ල ප්රදේශයේ නීතිඥවරු දෙදෙනෙකු වන අජිත් කුමාර සහ අමරදිවාකර ලියනගේ විසින් ඉදිරිපත් කළ මූලික අයිතිවාසිකම් පෙත්සමක් අද අගවිනිසුරු ප්රීති පද්මන් සූරසේන, අචල වෙංගප්පුලි සහ සම්පත් විජේරත්න යන මහත්වරුන්ගෙන් සමන්විත ත්රිපුද්ගල ශ්රේෂ්ඨාධිකරණ විනිසුරු මඩුල්ල ඉදිරියේ කැඳවනු ලැබුවා.
එම අවස්ථාවේදී අදාළ පෙත්සමේ වගඋත්තරකරුවන් වශයෙන් නම් කර තිබූ එවක ගාල්ල ප්රදේශය භාර නියෝජ්ය පොලිස්පති කේ.එන්.ජී වෙදසිංහ, එවක ගාල්ල ප්රදේශය භාර ජ්යෙෂ පොලිස් අධිකාරිවරයා සහ ගාල්ල පොලීසියේ ස්ථානාධිපතිවරයා අධිකරණය හමුවේ පෙනී සිටියා.
එම අවස්ථාවේදී වගඋත්තරකරුවන් වෙනුවෙන් පෙනී සිටි රජයේ නීතිඥවරිය කියා සිටියේ වග උත්තරකරුවන් මෙම සිද්ධිය සම්බන්ධයෙන් කොන්දේසි විරහිතව පෙත්සම්කරුවන්ගෙන් සමාව අයැද සිටින බවයි.
ඊට අමතරව පෙත්සංකරුවන්ගෙන් ලිඛිතව සමාව අයැද සිටීමේ ලේඛනයක් වග උත්තරකරුවන් විසින් අධිකරණයට භාර දෙන බවත් රජයේ නීතිඥවරිය සඳහන් කළා.
එම සමාව පෙත්සම්කරුවන් විසින් භාර ගන්නා බව ඔවුන් වෙනුවෙන් පෙනී සිටි ජනාධිපති නීතිඥ සාලිය පීරිස් මහතා අධිකරණයට දැනුම් දුන්නා.
එම සමථය සටහන් කර ගැනීමෙන් අනතුරුව අධිකරණය හමුවේ පෙනී සිටි වග උත්තරකාර පොලිස් නිලධාරීන් ඇමතූ අගවිනිසුරු ප්රීති පද්මන් සූරසේන මහතා
“එදා සිද්ධිය වූ අවස්ථාවේ ඇති වූ නීති විරෝධී ක්රියාවක් සම්බන්ධයෙන් තමයි මේ පෙත්සංකාර නීතිඥවරු පැමිණිලි කළේ. ඔවුන් අද ගාල්ල ඉඳලා මේ නඩුවට ඇවිල්ලා තියෙනවා. මේ නඩුව සමථයට පත් කිරීමට ඔවුන් ඉදිරිපත් වීම ගැන අගය කරන්න. මේ වගේ සහනයක් ලේසියෙන් ලැබෙන්නේ නෑ” යනුවෙන් සඳහන් කළා.
ඉන් අනතුරුව පෙත්සම් විභාගය අවසන් කිරීමටත් අධිකරණය තීන්දු කළා.
නීතිඥ මංජුල බාලසූරිය මහතා මාර්ගයෙන් ගොනු කර තිබූ මෙම පෙත්සම තුළින් පෙත්සම්කරුවන් කියා සිටියේ ආර්ථික අර්බුදය පැවති 2022 වසරේ ජූලි මස 6 වනදා නීතිඥවරු පිරිසක් ගාල්ල කොටුව අසල විරෝධතා පුවරු ප්රදර්ශනය කරමින් සාමකාමී විරෝධතාවක නිරත වූ බවයි.
එම අවස්ථාවේදී අදාළ ස්ථානයට කඩා වැදුණු පොලිස් නිලධාරින් එම විරෝධතාවට බාධා කරමින් විරෝධතා පුවරු ඉරා දැමීමට කටයුතු කළ බවත් පෙත්සම්කරුවන් පවසනවා.
මෙම ක්රියාව තුළින් වග උත්තරකරුවන් මූලික මිනිස් අයිතිවාසිකම් උල්ලංඝනය කර තිබෙන බවට තීන්දුවක් ලබා දෙන ලෙස ඉල්ලා එම නීතිඥවරු විසින් ශ්රේෂ්ඨාධිකරණයට මෙම පෙත්සම ඉදිරිපත් කර තිබුණා.
