නැවත වරක් රට පුරා අධික වැසි තත්ත්වයක් වර්ධනය වෙමින් පවතින බව කාලගුණ විද්යා දෙපාර්තමේන්තුව පවසයි.Sri Lanka Latest News
මේ අතර, නැවත වරක් රට තුළ නාය යාම් අවදානමක් මතුව ඇති බැවින් ජනතාවට අවදියෙන් සිටින්නැයි ආපදා කළමනාකරණ මධ්යස්ථානය කියයි.
පසුගිය දින කිහිපයේද මහනුවර දිස්ත්රික්කයේ උඩුදුම්බර ප්රදේශයට මෙන්ම, පොත්තපිටිය ප්රදේශයට වැඩිම වර්ෂාපතනයක් ලැබී ඇති බව, මධ්යම කඳුකර ප්රදේශයට ඉදිරි දින කිහිපය තුළද අධික වැසි තත්ත්වයක් ඇතිවිය හැකි බවද කාලගුණ විද්යා දෙපාර්තමේන්තුවේ ප්රකාශකයෙක් ‘මව්රට’ට පැවැසීය.
එසේම මේ වනවිට ඇදහැලෙන වර්ෂාවත් සමග රජරට ඇතුළු දිවයිනේ ප්රධාන වැව්ද ඇතුළුව ජලාශ 34ක් යළිත් වාන්දමමින් පවතින බව වාරි මාර්ග දෙපාර්තමේන්තුව පවසයි.
ඒ අන්ව මේ වනවිට අනුරාධපුර දිස්ත්රික්කයේ කලාවැව, රාජාංගණය, නච්චාදූව, අංගමුව යන ජලාශද, මහනුවර දිස්ත්රික්කයේ පොල්ගොල්ල, වික්ටෝරියා, රන්දෙණිගල, රන්ටැඹේ යන ජලාශද, කුරුණෑගල දිස්ත්රික්කයේ දැදුරුඔය ජලාශයද, අම්පාර දිස්ත්රික්කයේ සේනානායක සමුද්රයද, මේ වනවිට වාන් දමමින් පවතින බවද දෙපාර්තමේන්තුව කියයි.
පවතින තත්ත්වය සැලකිල්ලට ගෙන කලාවැවේ ජලාශයේ වාන් දොරටු 2ක් අඩි 6 බැගින්ද, රාජාංගණය ජලාශයේ වාන් දොරටු 4ක් අඩි 5 බැගින්ද, එහි තව දොරටු 2ක් අඩි 4 බැගින්ද, නච්චාදූව ජලාශයේ වාන් දොරටු 4ක් අඩි 2 බැගින්ද, අංගමුව ජලාශයේ වාන් දොරටු 2 ක් අඩි 2 බැගින්ද විවෘත කොට ඇතැයිද, එබැවින් පහත් බිම්වල වෙසෙන ජනතාව, විමසිල්ලෙන් සිටින ලෙසද දෙපාර්තමේන්තුව වැඩිදුරටත් කියයි.
එසේම බදුල්ල, අනුරාධපුර, කෑගල්ල, මාතලේ, කිලිනොච්චිය යන ප්රදේශවල පස් කඳු කඩාවැටීම් සහ ජලාශ පිටාර ගැලීමෙන් මහාමාර්ග රැසක් යළිත් ජලයෙන් යටවී වාහන ධාවනයට බාධා එල්ලවී ඇතැයි ආපදා කළමනාකරණ මධ්යස්ථානය නිවේදනයක් නිකුත් කරමින් කියා සිටී.
නන්දන ශ්රී දොරකුඹුර
