එක්සත් ජාතීන්ගේ ආහාර හා කෘෂිකර්ම සංවිධානය විසින් කොළඹදී මේ දිනවල පවත්වන 37 වැනි ආසියා පැසිෆික් කලාපීය සමුළුව සඳහා කිසිදු ගොවි සංවිධානයකට ආරාධනා කර නොමැති බව ගොවි සංවිධාන නියෝජිතයෝ හෙළි කළහ.Sri Lanka Latest News
මෙම සමුළුවේ අවධානය යොමුකර ඇත්තේ කෘෂිකර්මය වාණිජකරණයට ලක්කර ඩොලර් ඉපැයීම පිළිබඳව පමණක් බවද ඔවුහු අනාවරණය කරති.
“සැබෑ ගොවි ධීවර ගැටලුවලට උත්තර නැති ආණ්ඩුව FAO සමග කුමන්ත්රණයක් මැයෙන් ඉඩම් හා ප්රතිසංස්කරණ ව්යාපාරය විසින් කොළඹ, ගුරු මැදුරේදී ඊයේ (20 වැනිදා) පවත්වන ලද මාධ්ය හමුවකදී ගොවි සංවිධාන නියෝජිතයෝ මෙම තොරතුරු අනාවරණය කළහ.
මෙම මාධ්ය හමුවේදී අදහස් දැක්වූ රාජාංගණය ඒකාබද්ධ ගොවි සංවිධානයේ උප සභාපති ටෙරන්ස් ගාමිණී කියා සිටියේ මෙම සමුළුවේදී ආහාර සහ කෘෂිකර්මය යන මාතෘකා සම්බන්ධව කතා නොකෙරෙන බවය. රටේ ජනතාවගෙන් සියයට 80 කට වැඩි ප්රමාණයකට ආහාර සපයන්නේ සුළු ගොවීන් බවත්, රජය වර්තමානයේදී අපනයනය සඳහා භෝග වගා කිරීමට සුළු ගොවියා යෙදවීමේ උත්සාහයක නිරතවන බවත් ඔහු කියා සිටියේය.
ඉඩම් හා ප්රතිසංස්කරණ ව්යාපාරයේ විමුක්ති ද සිල්වා මෙහිදී කියා සිටියේ මෙම ජාත්යන්තර සමුළුව තුළදී සැබෑ ගොවි ප්රශ්න අනාවරණය නොවන බවත්, සමුළුවේදී කතා කෙරෙන්නේ කෘෂිකර්ම නව්යකරණය හා ඩිජිටල්කරණය හරහා භෝග අපනයනය කර ඩොලර් ඉපැයීම බවත්ය. ග්රාමීය ප්රජාවේ ගොවීන් සම්බන්ධව මෙම සමුළුවේ අවධානය යොමු නොකිරීම සම්බන්ධව විරෝධය දක්වන බවද ඇය පැවසුවාය.
වලව ව්යාපාරය නියෝජනය කරමින් සහභාගිවී සිටි ගාමිණී කුලතුංග කියා සිටියේ මෙම සමුළුව ගොවීන් නැති සමුළුවක් බවය. මෙරට අලෙවි කරන කෘෂි උපකරණ, බීජ, පළිබෝධනාශක ආදියෙහි මිල තීරණය කරන තීරකයා බවට පත්ව ඇත්තේ ඉන්දියාව, චීනය, මැලේසියාව ආදී රටවල් බවද ඔහු පැවසුවේය. අද වනවිට කෘෂිකර්ම ක්ෂේත්රයේ නිරත කිසිදු අයකුගෙන් නිසි සේවාවක් ඉටු නොවන බවත්, ගොවියා අද ගොවිතැනේ නිරතවී සිටින්නේ අමතර රැකියාවක් ලෙස පමණක් බවද, ජනතාවගේ බඩගින්න ගැන නොසොයා රජය සමුළු පවත්වන බවත් ඔහු කීවේය. -අරුණ
