ලෝක බැංකුව ලංකාව ගැන තවත් බය හිතෙන අනාවැකියක් කියයි!

ශ්‍රී ලංකාවේ සැබෑ දළ දේශීය නිෂ්පාදිතය මේ වසරේ සියයට 9.2කින් සහ 2023 වසරේදී තවත් සියයට 4.2කින් පහත වැටෙනු ඇතැයි අපේක්ෂා කරන බව ලෝක බැංකුව පවසනවා.

දකුණු ආසියානු රටවල්වල ආර්ථිකය සම්බන්ධයෙන් ලෝක බැංකුව වසරකට දෙවරක් වාර්තා නිකුත් කරනවා. ඔක්. 6 දා නිකුත් කළ ඔවුන්ගේ නවතම වාර්තාව වන Coping with Shocks: Migration and the Road to Resilience මේ බව සඳහන් කර තිබෙනවා.

ලෝක බැංකුව පෙන්වා දෙන්නේ, ණය ප්‍රතිව්‍යුහගත කිරීම ශ්‍රී ලංකාවේ ආර්ථික ස්ථාවරත්වය සඳහා ඉතා වැදගත් වන බවයි.

ආර්ථික අර්බුදය හේතුවෙන් අවදානමට ලක්වූවන් ආරක්ෂා කිරීම ඉතා වැදගත් බවත් සමාජ ආරක්ෂණ පද්ධතිය ශක්තිමත් කිරීම කෙරෙහිත් ඔවුන් අවධානය යොමු කරනවා.

ආර්ථික අර්බුදය හමුවේ, ශ්‍රී ලංකාවේ 2021 සහ 2022 වසර අතර දරිද්‍රතා ඇස්තමේන්තු සියයට 25.6 දක්වා දෙගුණ වී ඇති අතර, දරිද්‍රතාවයෙන් පෙළෙන පුද්ගලයින්ගේ සංඛ්‍යාව මිලියන 2.7ක්. ඒ බව මාලදිවයින, නේපාලය සහ ශ්‍රී ලංකාව සඳහා වන ලෝක බැංකුවේ අධ්‍යක්ෂ Faris H. Hadad-Zervos අදාළ වාර්තාව පදනම් කරගනිමින් ප්‍රකාශ කරනවා.