කලාවැව රක්ෂිතයේ වෙසෙන වන අලින් අතර සුවිශේෂ හස්ති රාජයකු ලෙස සැලකෙන ‘බරණ’ නමැති හස්තියා විදුලි සැර යොදා ඝාතනය කිරීමේ සිද්ධියේ ප්‍රධාන සැකකරුව සිටි පොලිස් නිලධාරියා අද (06) කැකිරාව මහේස්ත්‍රාත් අධිකරණය වෙත ඉදිරිපත් කිරීමෙන් අනතුරුව රුපියල් ලක්ෂ 02 බැගින් වූ ශරීර ඇප දෙකක් මත මුදාහැරීමට කැකිරාව වැඩ බලන මහේස්ත්‍රාත්වරයා නියෝග කළේය.
සැකකරු ගල්කිරියාගම පොලිස් ස්ථානයට අනුයුක්තව සේවය කරන කොස්තාපල්වරයකු වන අතර, ඔහු අද ගල්කිරියාගම අඩවි වන කාර්යාලය වෙත භාරවීමෙන් අනතුරුව අත්අඩංගුවට ගෙන අධිකරණයට ඉදිරිපත් කර තිබිණි.
පසුගිය ජුලි මස 26 වැනි දින ගල්කිරියාගම උල්පතගම ප්‍රදේශයේ පිහිටි පෞද්ගලික ඉඩමකට යාබදව ජාතික නාමල් උයන රක්ෂිතයේ හිස් බිම් කොටසකදී බරණ හස්තියා විදුලි සැර වද්දවා ඝාතනය තිබිණි.
මෙම ඝාතනයට අදාළව මීට පෙර අත්අඩංගුවට ගත් සැකකරුවන් තුන්දෙනෙකු ද එක් අයෙකුට රුපියල් ලක්ෂය බැගින් වූ ශරීර ඇප දෙකක් මත නිදහස් කිරීමට කැකිරාව දිසා මහේස්ත්‍රාත් අධිකරණය පසුගිය 31 වනදා නියෝග කළේය.
සැකකාර පොලිස් කොස්තාපල්වරයා බරණ හස්තියා ඝාතනයකර තිබූ දිනයේ, එම ස්ථානයේ ආරක්ෂක කටයුතු සඳහා ද යොදවා තිබූ බව විමර්ශනවලදී අනාවරණ වී ඇත.
– lankasara
