අයහපත් කාලගුණයත් සමග පැවැති මහා වර්ෂාව හේතුවෙන් අගලවත්ත, බෙල්ලන ආඳාදොළ ප්රදේශයේ නිවෙසක් පිටුපස තිබූ පස් කන්දක් නායගොස් නිවෙස සම්පූර්ණම යටවී තිබෙනවා. (Sri Lanka Latest News)
මෙසේ ජීවිත බේරී ඇත්තේ අගලවත්ත බෙල්ලන ආඳාදොළ ප්රදේශයේ පදිංචි බෙල්ලන විදානලාගේ සෝමසිරි නැමැති පුද්ගලයා සහ ඔහුගේ දරු පවුලයි.
දැනට මේ දරු පවුල ඔවුන්ගේ ඥාති නිවෙසක රැඳී සිටින බව දැනගැනීමෙන් පසු අප ඔවුන් සොයා අගලවත්තේ බෙල්ලනට ගියෙමු. එහිදී සෝමසිරි මහතාගේ පුත්රයා වූ බෙල්ලන විදානලාගේ ශාන්ත කුමාර (33) මහතා මේ පිළිබඳ මෙසේ පැවසීය,
‘මමයි මගේ බිරිඳ හර්ෂණී අනුෂ්කා සමග අම්මා ශාන්ති ජයසිංහත් තාත්තා බී.වී. සෝමසිරි සහ මගේ දෙහැවිරිදි දියණිය සෙත්මි අකීෂා ඇතුළු පස්දෙනාම මේ නිවෙසේ එකට ජීවත් වෙනවා. සිද්ධිය වුණේ අලුයම එකයි පහළොවට පමණ පැවැති මහ වැස්සත් සමගයි. ඒ අවස්ථාවේ නිවෙසේ සිටියේ මගේ මවුපියන් හා මගේ කුඩා දියණිය සමග මා පමණයි. බිරිය එදින ගෙදර සිටියේ නෑ, ඇය ඇයගේ මහගෙදරට ගොස් තිබුණා.
අපි සියලු දෙනාම ඇහැරිලයි හිටියේ. මගේ වයස අවුරුදු දෙකක් වන දියණිය සෙත්මි අකීෂා ඇඳට වෙලා හිටියත් ඇයත් මොන හේතුවක් නිසාද දන්නෙ නෑ ඇහැරගෙන හිටියා. අලුයම එකයි පහළොවට පමණ මම සුරතලයට ගෙදර ඇතිකරන ‘කලූ’ නම් සුනඛයා නිවෙස වටේට යමින් නිවෙස පිටුපසට වී තදින් බුරන ශබ්දය අපට ඇසුණා. බුරන හඬ වෙනදාට වඩා තදින් දැනුණු නිසා මා නිවෙසේ දොර ඇරගෙන නිවෙස පිටුපසට වී බුරන කලූ අසලට ගියා. කලූ මට යමක් කියන්නා සේ ගෙදර පිටුපස පස් කණ්ඩිය ළඟට ගියා. මම පිටුපසට ගියා. පසුව තමයි දැක්කේ නිවෙස පිටුපස කණ්ඩිය පසාරු කරගෙන බොරපාට වතුර පාරක් එනවා.
මම වහාම නිවෙසට පැන නිවෙසේ අංශභාග රෝගී තත්ත්වයකින් අසනීප වී සිටි මගේ පියාත් මගේ මවත්, ඇඳේ සිටි කුඩා දියණියත් රැගෙන වහාම පැය කාලක් ඇතුළත එළියට පැන දිව්වා. සුනඛයාත් අපේ පසුපස දුවන් ආවා. අපට මීටර් පන්සීයක්වත් තරම් දුර පහළට එන්න ලැබුණේ නෑ. වාහන දෙකක් එකට හැපෙන සද්දයක් නගමින් නිවෙස පිටුපස කන්ද සම්පූර්ණයෙන්ම නාය ඇවිත් මගේ නිවෙස නොපෙනී ගියා. මගේ සුරතල් සුනඛයා කලූ අපට මේ විදියට සංඥාවක් නොදුන්නා නම් අපේ ජීවිත හතරක් ඒ මහ පොළොවට යටවී වැළලෙන්නට තිබුණා. නමුත් කලූ නිසා අපේ ජීවිත බේරුණා…’
