පවතින අධික වර්ෂාව හේතුවෙන් දැදුරුඔය ජලාශයේ වාන් දොරටු 6ක් විවෘත කර ඇති බව වාරිමාර්ග දෙපාර්තමේන්තුව නිවේදනය කරයි.Sri Lanka Latest News
එම දෙපාර්තමේන්තුව සඳහන් කළේ, වාන් දොරටු 4ක් අඩි 4 කින් සහ වාන් දොරටු 2ක් අඩි 3 කින් විවෘත කර ඇති බවය.
එම වාන් දොරටුවලින් තත්පරයට ඝන අඩි 15,000ක මුළු ජල ප්රමාණයක් මුදා හැරේ.
මේ අතර රාජාංගන ජලාශයේ වාන් දොරටු 6ක් අඩි 6 බැගින් විවෘත කර ඇති අතර ඉන් තත්පරයට ඝන 7,800 මුළු ජල ප්රමාණයක් මුදා හරින බව වාරිමාර්ග දෙපාර්තමේන්තුව සඳහන් කරයි.
මේ අතර අංගමුව වැවේ වාන් දොරටු දෙකක් අඩි පහ බැගින් විවෘත කර ඇති අතර, තත්පරයට ඝන අඩි 2,994ක් ජල ප්රමාණයක් මුදා හරී.
මේ අතර ගලහා නිල්ලඹ ජලාශයේ වාන් දොරටු තුනක් අද (18) සවස විවෘත කළ බව අද දෙරණ වාර්තාකරු පැවසීය.
මෙම ප්රදේශවල ජීවත් වන ජනතාවට මේ පිළිබඳව අවධානයෙන් පසුවන ලෙස වාරිමාර්ග දෙපාර්තමේන්තුව ඉල්ලීමක් කර තිබේ.
එමෙන්ම මේ වනවිට පවතින අධික වර්ෂාපතනය හේතුවෙන් කලා වැවේ ද වාන් දොරටු 2ක්, අඩි 1ක ප්රමාණයකින් විවෘත කර තිබේ.
ඉන් තත්පරයට ඝන අඩි 1,200ක පමණ ජල ධාරිතාවක් නිකුත් කරමින් පවතින බව ජලාශයභාර වාරිමාර්ග ඉංජිනේරුවරයා සඳහන් කළේය.
මේ හේතුවෙන් ජලාශයේ පහළ ප්රදේශවල ජනතාවට අවධානයෙන් සිටින ලෙස දැනුම් දී ඇත.
මීට අමතරව දිවයින පුරා පවතින අයහපත් කාලගුණය හේතුවෙන් කුරුණෑගල දිස්ත්රික්කයේ කුරුණෑගල දිස්ත්රික්කයේ වාරියපොල සහ නිකවැරටිය යන ප්රදේශවලට ඇති වූ තද සුළං තත්ත්වය හේතුවෙන් නිවාස 100කට ආසන්න ප්රමාණයක් අර්ධ හානියට ලක්ව ඇතැයි ආපදා කළමනාකරණ මධ්යස්ථානය පවසයි.
එම මධ්යස්ථානයේ අධ්යක්ෂ ප්රදීප් කොඩිප්පිලි මහතා පැවසුවේ සිදුව ඇති ආපදා තත්ත්වය හේතුවෙන් පීඩාවට පත් ජනතාව වෙනුවෙන් අවශ්ය කටයුතු මේ වන විට සම්පාදනය කරමින් පවතින බවය.
අවුලේගම, තමිල්වැල්ලම, ඈතම, කරඳවැටිය ආදී ප්රදේශයන්ට මෙම තත්ත්වය බලපා ඇති බවද ඒ මහතා පැවසීය.
මීට අමතරව කාලගුණ විද්යා දෙපාර්තමේන්තුව විසින් නිකුත් කර ඇති නිවේදනය අනුව තවදුරටත් ජනතාව විමසිල්ලෙන් සිටිය යුතු බවත් පෙන්වා දෙන අධ්යක්ෂකවරයා සඳහන් කර සිටියේ බස්නාහිර, සබරගමුව, මධ්යම, ඌව, උතුරුමැද, නැගෙනහිර සහ වයඹ පළාත්වල ඇතැම් ස්ථාන වෙත මිලිමීටර් 100 ඉක්මවූ වැසි ඇති විය හැකි බවත් කාලගුණ විද්යා දෙපාර්තමේන්තුව දැනුම්දී ඇති බවය.
