සමගි ජන බලවේග ප්රධාන කාර්යාලයේ අද (29) පැවැති මාධ්ය හමුවට සහභාගි වූ පාර්ලිමේන්තු මන්ත්රී එස්.එම් මරික්කාර් මහතා මෙසේ පැවැසීය. Sri Lanka Latest News
‘‘ලංකා ගල් අඟුරු සමාගම 2026 වසර සඳහා ගෙන්වන ලද ගල් අඟුරු ප්රමිතියෙන් තොර වීම පිළිබඳව සමගි ජනබලවේගය විසින් පාර්ලිමේන්තුවේදීත් , පාර්ලිමේන්තුවෙන් පිටතදීත් හෙළි කිරීමට කටයුතු කරනු ලැබුවා.
ගල් අඟුරු ගෙන්වීම සඳහා ප්රසම්පාදන ක්රියාවලිය ආරම්භ කරන මොහොතේ සිට විශාල වංචා දුෂණ අක්රමිකතා රැසක් සිදුවී තිබෙනවා. ගල් අඟුරු ගෙන්වීමේදී දින 42 ක කාලයක් ප්රසම්පාදන කටයුතු සඳහා ලබාදිය යුතුයි. නමුත් එය දින 21 කට අඩු කර තිබෙනවා. ඒ වගේම දින 42 ක ප්රසම්පාදන ක්රියාවලිය දින 21 කට අඩු කිරිම හරහා ගල් අඟුරු සඳහා නිකුත් කරන ප්රසම්පාදන ක්රියාවලියට දායක වෙන්න බහුතරයක් සමාගම්වලට නොහැකි වෙනවා.
ඒ වගේම ගල් අඟුරු ගෙන්විමේ ප්රසම්පාදන ක්රියාවලියට ඇතුළත් වීමට නම් පසුගිය වසර 3 තුළ ගල් අඟුරු මෙට්ට්රික්ටොන් ලක්ෂ 5 ක් ගෙන්වා තිබිය යුතුයි. එයින් ගල් අඟුරු මෙට්ට්රික්ටොන් ලක්ෂයක් කිලෝ කැලරි 5900 ට හෝ ඊට වඩා ගෙන්වා තිබිය යුතුයි. ඒ වගේම එම සමාගම පසුගිය වසර තුන තුළ ඩොලර් මිලියන 150 ක ආදයමක් උපයා තිබිය යුතුයි. ගල් අඟුරු ගෙන්විමේ ප්රසම්පාදන ක්රියාවලියට ඇතුළත් වීමට මෙම සුදුසුකම් සපුරා තිබිය යුතුයි. කෙසේ නමුත් ප්රසම්පාදන ක්රියාවලියට ඇතුළත් වීම සඳහා පසුගිය වසර තුන තුළ ගල් අඟුරු මෙට්ට්රික්ටොන් ලක්ෂ 5 ක් ගෙන්වා තිබිය යුතුයි යන මුලික සුදුසුකම වෙනස් කර තිබෙනවා. කුඩා සමාගම්වලට මෙම ප්රසම්පාදන ක්රියාවලියට ඇතුළත් වීම සඳහා එම මූලික සුදුසුකම වෙනස් කරන්න ආණ්ඩුව කටයුතු කර තිබෙනවා.
කෙසේ හෝ ප්රසම්පාදන ක්රියාවලියේ දින ගණන අඩු කිරිම හරහා , මෙට්ට්රික්ටොන් ලක්ෂ 5 ක් ගෙන්වා තිබිය යුතුයි යන කොන්දේසිය ලක්ෂය දක්වා අඩු කර දුෂණයට පාර කපා තිබෙනවා.
ඒ වගේම රටට අවශ්ය විදුලි අවශ්යතාවය සපුරාගැනීමට නම් නොරොච්චෝල ලක්විජය බලාගාරයේ තිබෙන යන්ත්ර තුනම ක්රියාත්මක කළ යුතුයි. ඒ වගේම බලාගාරයට අවශ්ය ගල් අඟුරු වසර පුරා ගෙන්වීමටත් නොහැකියි. ඒ නිසා මාස 6 ක් තුළ වසරකට අවශ්ය ගල් අඟුරු තොග ගෙන්වීමට කටයුතු කළ යුතුයි. ඒ වගේම ගල් අඟුරු නැව ලංකාවට පැමිණිමට පෙර ගල් අඟුරු වල ප්රමිතිය පිළිබඳව වාර්තාව ලංකාව ලැබිය යුතුයි. නමුත් ගල් අඟුරු සහිත පලමු නැව කොලඹ වරායට පැමිණෙන තුරු අදලා වාර්තාව ලැබී නැහැ. නමුත් එම ගල් අඟුරු බලාගාරයේ බොයිලේරුවලට යොමු කර තිබෙනවා.
ඒ වගේම මෙම පළමු ගල් අඟුරු තොගයේ කිලෝ කැලරි 5900 ක් නැති බව සමගි ජනබලවේගය හෙළි කළා. නමුත් නිසි වාර්තාවක් නොමැතිව එම ගල් අඟුරු තොගය ප්රමිතියෙන් යුතු ගල් අඟුරු බව බලශක්ති ඇමැතිවරයා ප්රකාශ කළා. නමුත් අවසානයේ ඉන්දියාවෙන් ලැබුණ වාර්තා අනුව එම ගල් අඟුරු තොගයේ නිසි කිලෝ කැලරි ප්රමාණයක් නොතිබුණ බව පිළිගන්න සිදුවෙලා තිබෙනවා.
ඒ වගේම ගල් අඟුරුවල ප්රමිතිය පිළිබඳව ගැටලුවක් තිබෙන බව සමගි ජනබලවේගය විසින් ප්රකාශ කරන විට අදාල සමාගමෙන් දඩ මුදලක් අය කර ගන්නා බව දෙවැනි ගල් අඟුරු නැව වරායට පැමිණ ගල් අඟුරු තොග නිදහස් කරන අවස්ථාවේ විදුලිබල අමාත්යාංශය නිවේදයක් නිකුත් කර තිබෙනවා.
කෙසේ නමුත් ප්රමිතියෙන්තොර ගල් අඟුරු ගෙන්වීම හරහා සිදුවු පාඩුව පිළිබඳව තක්සේරුවක් ගත යුතුයි. දෙවැන්න ප්රමිතියෙන් තොර ගල් අඟුරු බොයිලේරුවලට දැමූ පසු බලාගාරයේ උපකරණවලට සිදුවන හානියට ගණනය කළ යුතුයි. ඒ වගේම ප්රමිතියෙන් තොර ගල් අඟුරුවලින් විදුලිය උත්පාදනය කළ පසු මොගාවොට් 300 ක් උත්පාදනය කිරිමට නොහැකි වෙනවා. ඒ අනුව ඉතිරි විදුලි ප්රමාණය ඩිසල් බලාගාරවලින් සපයාගන්නවානම් ඒ සඳහා අය වන මුදල පිළිබඳව තක්සේරුවක් කළ යුතුයි. ඒ වගේම මෙම ගල් අඟුරුවලින් පිට කරන අලු ප්රමාණය සහ එයින් පරිසරයට වන හානිය ගණනය කර තක්සේරුවක් සිදුකළ යුතුයි. නමුත් වර්තමාන බලශක්ති ඇමැතිවරයා ප්රමිතියෙන් තොර ගල් අඟුරු ගෙන්විමේ මාෆියාව වෙනුවෙන් පෙනී සිටිමින් , මේ හරහා රටට සිදුවන නාස්තිය වසන් කරන්න කටයුතු කරමින් සිටිනවා.
ඒ වගේම ප්රමිතියෙන් තොර ගල් අඟුරු නැව් 25 කුමන හෝ නැව් දෙකක් ප්රතික්ෂේප වුණොත් මෙම ගල් අඟුරු ගිවිසුම අවලංගු කළ යුතුයි. නමුත් ප්රමිතියෙන් තොර ගල් අඟුරු ගෙන්වූ සමාගමෙන් දඩ මුදලක් අය කරගන්නා බව බලශක්ති ඇමැතිවරයා ප්රකාශ කරනවා. ඒ අනුව පළමු නැව වෙනුවෙන් ඩොලර් මිලියන 2.1 ක දඩ මුදලක් නියම කළ බව ගල් අඟුරු සමාගම ප්රකාශ කර තිබුණා. නමුත් ගල් අඟුරු නැවට දඩු මුදල නියම කළ ආකාරය පිළිබඳව කිසිදු සඳහනක් නැහැ. එම දඩ මුදල අය කරගැනිමේදී ප්රමිතියෙන් තොර ගල් අගුරු යෙදිමෙන් බලාගාරයේ යන්ත්රවලට සිදුවුණ හානිය ගණනය කර තිබෙනවාද ? ඩිසල් බලාගාරවලින් අමතරව මිලදි ගන්නා විදුලිය සඳහා වන වියදම ගණනය කර තිබෙනවාද ? මේ ප්රශ්නවලට ඇමැතිවරයා පැහැදිලිව ප්රකාශ කරන්නේ නැහැ.
ඒ වගේම ගල් අඟුරු රැගෙන තුන්වැනි නැවත් ලංකාවට පැමිණ තිබෙනවා. නමුත් වරායේ දොබකරයේ ගැටලුවක් හේතුවෙන් ගල් අඟුරු ගොඩබෑම නරත කර තිබෙනවා. එය සත්යයක්ද අසත්යයක්ද යන්න තවම පැහැදිලි නැහැ. කෙසේ නමුත් තුන්වැනි නැවේ ගල් අඟුරුවල ප්රමිතිය පළමු නැවේ ගල් අඟුරුවල ප්රමිතියටත් වඩා අඩු බව වාර්තා වෙනවා.
කෙසේ හෝ තුන්වැනි ගල් අඟුරු නැවේ ගල් අඟුරු තොගය පිළිබඳ වාර්තාව ඉක්මනින් පැමිණියහොත් පළමු සහ දෙවන ගල් අඟුරු නැව්වල ගල් අඟුරු තොග ප්රමිතියෙන් බාල නිසා ගල් අඟුරු ටෙන්ඩරය අහෝසි කරන්න සිදුවෙනවා. ඒ නිසා තුන්වැනි ගල් අඟුරු නැවේ ගල් අඟුරු තොග ගොඩබෑම ප්රමාද කර දඩු මුදල ඉක්මනින් අය කර ගන්න ආණ්ඩුව කටයුතු කරනවා. කෙසේ හෝ තුන්වන ගල් අඟුරු නැවේ ගල් අගුරු තොගය ප්රමිතියෙන් තොර වුවහොත් කල්තියාම පළමු නැවට දඩ මුදල අයකරගෙන තිබෙන බව ප්රකාශ කරන්න ආණ්ඩුව හැකියාවක් තිබෙනවා. ආණ්ඩුව මේ ආකාරයට රකින්න උත්සහ කරන්නේ කවුරුන්ද? මෙම මහා පරිමාන වංචාවට කවුද වග කියන්නේ.
කෙසේ නමුත් මෙවැනි ප්රමිතියෙන් තොර ගල් අඟුරු නැව් දිගින් දිගටම ලංකාවට පැමිණියහොත් මාර්තු මාසයෙන් පසු විදුලි කප්පාදුවකට යන්න සිදු වෙනවා. ප්රමිතියෙන් තොර ගල් අගුරු හරහා බලාගාරයෙන් නිෂ්පාදනය වන ධාරිතාවය අනම නිසා ඩිසල් විදුලි බලාගාරවලින් විදුලිය මිලදි ගැනිමට සිදුවෙනවා. ඒ හරහා විදුලි කප්පාදුවකට යන්නත් බොහෝ දුරට ඉඩක් තිබෙනවා.
ක්රමයේ වෙනසක් ඇති කරන්න පැමිණි ආණ්ඩුව මහ බැංකු බැදුම්කර වංචාවට වඩා විශාල වංචාවක් ගල් අඟුරු ටෙන්ඩරය හරහා සිදුවෙනවා. ඒ වගේම ස්පොට් ටෙන්ඩරයක් හරහා වැඩි මිලට ගල් අඟුරු මිලදි ගැනිමටත් ආණ්ඩුවේ සුදානමක් තිබෙන බවට තොරතුරු වාර්තා වෙනවා. විදුලි කප්පාදුව නවත්වා ගන්න වැඩි මිලට හෝ ගල් අඟුරු ගෙන ආ යුතු බවට තර්කයක් ආණ්ඩුව ගෙන එන්නත් පුලුවන්.
ගල් අඟුරු තොග ගෙන්විමේදී වංචාවක් දුෂණයක් සිදුවී නැතිනම් දැන් ප්රසම්පාදන ක්රියාවලිය අහෝසි කරන්න ආණ්ඩුවට හැකියාවක් තිබෙනවා. එසේ සිදුකර ප්රමිතියෙන් යුක්ත ගල් අගුරු ගෙන්වන්න කටයුතු කරන්න ආණ්ඩුවට හැකියාව තිබෙනවා. එසේ තිබියදී ස්පොට් ටෙන්ඩරයක් කැදවන්න ආණ්ඩුව සුදානම් වන්නේ තවත් විශාල වංචාවකට බව පැහැදිලියි. රුපියලක්වත් හොරකම් කරන්නේ නැති බව ප්රකාශ කළ ජාතික ජනබලවේග ආණ්ඩුවේ කෙරුවාව හොදින්ම දැන් පැහැදිලි වී තිබෙනවා.‘‘
