පුද්ගලයෙකු ඝාතනය කර හෝමාගමදී මහමග දමා යෑමේ සිද්ධියට සම්බන්ධ සැකකරුවන් සිව්දෙනා අගෝස්තු 04 වැනිදා දක්වා රක්ෂිත බන්ධනාගාරගත කිරීමට හෝමාගම මහේස්ත්රාත් අධිකරණය නියෝග කළා.Sri Lanka Latest News
මෙම ඝාතනය වසන් කිරීම සඳහා සැකකරුවන් එදිනම තවත් පුද්ගලයෙකුට තියුණු ආයුධවලින් පහරදී පොලිසියට භාරවී ඇති බවත්, පොලිස් විමර්ශන නොමග යැවීම සඳහා ඔවුන් එම උපක්රමය අනුගමනය කර ඇති බවටත් පොලිසිය සැක පළ කරනවා.
විදෙස්ගතව සිටින සංවිධානාත්මක අපරාධකරුවෙකු වන පලනි කැනිෂ්ටර් නමැත්තාගේ ගෝලයෙකු ඝාතනය කර සිරුර හෝමාගම ප්රදේශයේ දමා ගොස් තිබුණේ පසුගිය 10 වැනිදායි.
මෙලෙස ඝාතනයට ලක්ව තිබුණේ ජින්තුපිටිය, ආදුරුප්පුවීදිය ප්රදේශයේ පදිංචි 35 හැවිරිදි පුද්ගලයෙකු බවට හඳුනාගැනුණු අතර ඔහු භාවිත කළ මෝටර් රථය කෑගල්ල – රඹුක්කන මාර්ගයේ දමා ගොස් තිබියදී පසුව සොයා ගත්තා.
ඝාතනයට ලක්වූ පුද්ගලයා තවත් සිව් දෙනෙකු සමග කිරිබත්ගොඩ සුපිරි වෙළඳසැලක් වෙත ගොස් රුපියල් 46,000කට අධික වටිනාකමින් යුත් රෙදිපිළි මිලදී ගෙන ඇති බව මීට පෙර අනාවරණ වී තිබුණා.
එම සැකකරුවන් සිව්දෙනා අත්අඩංගුවට ගැනීමට මිරිහාන කොට්ඨාස අපරාධ විමර්ශන ඒකකය කටයුතු කළ අතර ඔවුන් අවුරුදු 18 සහ 24 යන වස්වල පසුවන්නන්.
ඔවුන්ගෙන් කළ ප්රශ්න කිරීම්වලදී අනාවරණ වී ඇත්තේ සැකකරුවන් සිව්දෙනා එදින ග්රෑන්ඩ්පාස් ප්රදේශයේදී වෙනත් පුද්ගලයෙකුට තියුණු ආයුධවලින් පහරදී තුවාල සිදුකර ඇති බවයි.
පසුව ඔවුන් සිව්දෙනා කිරිබත්ගොඩ සුපිරි වෙළඳසැලෙන් ඇඳුම් මිලදී ගෙන යළි පැමිණ ආදුරුප්පුවීදිය ප්රදේශයේ පදිංචි පුද්ගලයාව ඝාතනය කළ බව පොලිසියට පවසා තිබෙනවා.
අනතුරුව ඔවුන් ඊට පොලිසියට භාරවී ඇත්තේ එම ඝාතනය සම්බන්ධයෙන් නොව ග්රෑන්ඩ්පාස් ප්රදේශයේදී පුද්ගලයෙකු තියුණු ආයුධවලින් පහරදී තුවාල සිදුකිරීමේ වරද පිළිගනිමින්.
එය ඔවුන් සිදුකර ඇත්තේ තමන් සිදුකළ මනුෂ්ය ඝාතනය පිළිබඳ විමර්ශන නොමග යැවීමේ අරමුණින් බව ද පොලිසිය පැවසුවා.
ඔවුන් දින 13ක් රක්ෂිත බන්ධනාගාරගත කිරීමෙන් පසුව ඇප මත මුදා හැර ඇති බවයි පොලිසිය පැවසුවේ.
නමුත් පසුව පොලිසිය සිදුකළ විමර්ශනවලදී ඔවුන් යළි අත්අඩංගුවට ගෙන ඇත්තේ කිරිබත්ගොඩ සුපිරි වෙළඳසැලෙන් ඇඳුම් මිලදී ගැනීමට අදාළ සී.සී.ටී.වි දර්ශන සහ රිසිට්පත් ඔස්සේයි.
මොවුන් සිව්දෙනා එක්ව ඝාතනය කළ පුද්ගලයා සහ සංවිධානාත්මක අපරාධකරුවෙකු වන පලනි කැනිෂ්ටර් එක්ව ඔවුන්ගේ ප්රතිවාදියෙකු වන පූකුඩු කන්නාගේ පාර්ශ්වයේ ගෝලයෙකු මීට පෙර ඝාතනය කර ඇති අතර එය පලනි කැනිෂ්ටර් විසින් සිදු කළ බවට මොහු පාපොච්චාරණය කිරීම නිසා ඔහුව මෙලෙස ඝාතනය කර ඇති බවටයි පොලිසිය සැක පළ කරන්නේ.
