හිටපු සෞඛ්ය අමාත්යය කෙහෙළිය රැඹුක්වැල්ලගේ නිල නිවස ඉදිරිපිට මල් වඩමක් තබා නිවැසියන් බිය ගැන්වූ බව කියන සිද්ධියට අදාළ නඩුව නීතිපති උපදෙස් සඳහා යොමු කරන ලෙස කොළඹ ප්රධාන මහේස්ත්රාත් අසංග එස් බෝදරගම අද (27) කුරුඳුවත්ත පොලිසියට නියෝග කළා. Sri Lanka Latest News
මෙම සිද්ධියට අදාළ නඩුව කැඳවූ අවස්ථාවේදී මහේස්ත්රාත්වරයා විසින් මෙම නියෝගය ලබා දුන්නා.
අදාළ පටිගත කළ ඇති සංස්කරණය නොකළ වීඩියෝ දර්ශන අධිකරණය හමුවේ ප්රදර්ශනය කිරීමට පියවර ගන්නා ලෙස මහේස්ත්රාත්වරයා නියෝග කර තිබුණා.
මෙම සිද්ධිය සම්බන්ධයෙන් සංස්කරණය කළ වීඩියෝ දර්ශන පෙර නඩු දිනයකදී ඉල්ලා ඇතත් එම වීඩියෝ දර්ශන ලැබී නොමැති බවත් මෙම සිද්ධියට අදාළව රූපවාහිනී ආයතනයක ප්රවෘත්ති විකාශනය අතරතුර දර්ශන පමණක් දක්නට ලැබෙන බවත් එම සාක්ෂි ප්රමාණවත් නොවන බවද කුරුඳුවත්ත පොලිසිය අධිකරණය හමුවේ කරුණු වාර්තා කළා.
නිවැරදි වීඩියෝ දර්ශන ලබාගෙන නීතිපතිට ඉදිරිපත් කොට මෙම නඩුව සඳහා නීතිපති උපදෙස් ලබා ගැනීමට අවශ්ය බවද කුරුදුවත්ත පොලිසිය අධිකරණ හමුවේ පවසා සිටි අවස්ථාවේ මහේස්ත්රාත්වරයා විසින් මෙම නියෝගය ලබා දුන්නා.
විශේෂඥ වෛද්ය චමල් සංජීව මහතා ඇතුලු වෘත්තීය සමිති ක්රියාකාරීන් පිරිසක් ඉකුත් ජනවාරි මස පළමුවන දින තම පියාගේ නිල නිවස ඉදිරිපිට මල්වඩමත් තබා සපරාදී බිය ගැන්වීමක් ,අයුතු අවහිර කිරීමක්, හෝ නින්දා සහගත අපහාසයක් කළ බවට පවසමින් හිටපු අමාත්යය කෙහෙළිය රඹුක්කැල්ල මහතාගේ දියණිය වන චමිත්රී රඹුක්වැල්ල කළ පැමිණිල්ලක් සලකා බැලීමෙන් අනතුරුව අධිකරණය විසින් මෙම නියෝගය ලබා දුන්නා.
මෙම සිද්ධියට අදාළ නඩුව පවරා ඇත්තේ තම සේවා දායකයාට එරෙහිව දේශපාලන හේතු මත බැවින් විමර්ශන නිලධාරීන් අධිකරණයට නිවැරදි වීඩියෝ දර්ශන පෙන්වා දීමෙන් පසු තම සේවා දායකයා නිවැරදි නම් නිදහස් කරන ලෙස සැකකාරි විශේෂඥ වෛද්ය චමල් සංජීව වෙනුවෙන් පෙනී සිටි නීතිඥවරයා අධිකරණයට දැනුම් දුන්නා.
මෙම සිද්ධියට අදාල නඩුව මාර්තු 16 වන දා තෙක් කල් තැබුවා.
