එකමත් එක කාලෙක සංගීත් විජේසූරිය කියලා ඉතා දක්ෂ ගායකයෙක් හිටියා. කියන කියන සින්දුව හිට් වෙනවා. කියන සින්දු එකකට එකක් වෙනස්. හරිම දක්ෂයි. අදත් සංගීත් දක්ෂයි. එදත් දක්ෂයි. හැබැයි මම මේ කියන්නේ සංගීත් මෙන්න මේ ඩොලර් මිලියනය හොයලා දෙන්න ඉදිරිපත් වෙන්න කලින් කාලේ ගැන. 2024.09.01 වැනිදා මොකක් හරි රැස්වීමකට ඇවිල්ලා සංගීත් කියනවා, මම දන්නේ නෑ ඒක රැස්වීමක්ද, සාකච්ඡාවක්ද කියලා. නිශාන්ත වීරසිංහ වගේ නමක් ඔහු කියන්නේ. ඒ නම තියෙන වෙන කෙනෙක් ඉන්නවා නම් අමනාප වෙන්න එපා. ඒ යාළුවා සංගීත්ට කතාකළාලු. කතාකරලා කිව්වලු ඩොලර් මිලියනයක් තියෙනවා එන්.පී.පී. එකට දෙන්න ඕනේ කියලා. එයා ලංකාවට ආවට පස්සේ සංගීත් එයාව අතින් අල්ලගෙන අනුර සහෝදරයා ගාවට ගියාම අනුර සහෝදරයා ප්රශ්න කීපයක් අහලා සංගීත්ට කියනවා ඩොලර් මිලියනය අපිට එපා, අපි දිනුවට පස්සේ භාණ්ඩාගාරයට එවන්න කියලා. අනුර සහෝදරයා දිනුවනේ. ඊට පස්සේ ඔන්න සේපාල් අමරසිංහගේ සාකච්ඡාවක් අපි හිතන්නේ. ඒකත් මම දැක්කේ සමාජ මාධ්යවල. ඒ සාකච්ඡාවට නිල් පාට කෝට් එකක් එහෙම දාපු හාදයෙක් ඇවිල්ලා ඉන්නවා. එතුමා තමයි අපි හිතන්නේ මේ සල්ලි පරිත්යාග කරන්න හදන කෙනා. සංගීත් විජේසූරිය මහත්තයත් එක්ක ඉන්න කෙනා. ඉතින් ඒ මහත්තයා කියනවා දැන් මගේ ඩොලර් මිලියනය නෙවෙයි, ලෝකෙ පුරාම ඉන්න අය එකතු වෙලා ඩොලර් මිලියන 10ක් විතර දැන් ලෑස්ති කරලා තියෙනවා දෙන්න කියලා. ඒක බැංකුවක ලෙවල් එකේ වැඩක් කියලා ඔහු කියන්නේ 2024.09.28 වැනිදා. 09.28, 10.28, 11.28, 12.28 දැන් ජනවාරි මාසේ. මාස 3කට ආසන්න කාලයක් ගතවෙලා ගිහිල්ලා. දැන් අර බැංකුව හදලා ඉවරද සංගීත් කියලා සමහර අය සමාජ මාධ්යවලින් අහනවා. අපි දන්නේ නෑ මේවා වෙනවද, නොවෙනවද කියලා. (Sri Lanka Latest News)
ඇත්තටම රටේ තියෙන නව දේශපාලන ප්රවණතාව ඇතුළේ අපි බලාපොරොත්තු වෙනවා දේශපාලන වේදිකාවල කියපු දේවල් ඔක්කොම යථාර්ථයක් බවට පත්වෙන සමාජ ක්රමයක් දේශපාලන ක්රමයක් නිර්මාණය වේවි කියලා. අපි හොඳටම දන්නවා කලින් දේශපාලකයෝ එහෙම නෑ. අමු තක්කඩි. ස්ටේජ් එකේ එකක් කියනවා. ගෙදර එකක් කරනවා. ඩොලර් මිලියනයක් දුන්නා නම් ඒකෙන් ඩොලර් සීයක් දෙසීයක් මහා භාණ්ඩාගාරයට දාලා, රටට දීලා ඉතුරු ටික යටිමඩි ගහගන්නවා. ඔව් ඒක ඇත්ත. ඩොලර් මිලියන 10ක් ලංකාවට ආවොත් කීයටවත් ඒක අපිට ලැබෙන්නේ නෑ. තමන්ගේ ගෙවල් හදාගෙන, බඩ වඩාගෙන, ඇපල් වතු අරගෙන, ආතල් දාලා, කාර් රේස් පැදලා, හෙලිකොප්ටර් අරගෙන, රත්තරන් අස්සයෝ අරගෙන මේ තත්කඩිකම් ඔක්කොම කරනවා. එතකොට මේ තක්කඩිකම් කරන තක්කඩි එළවලා අලුත් පාලනයක් හදාගත්තේ සංගීත් විජේසූරිය මහත්තයලා කියපු නිසා. දැන් ඔය වේදිකාවේ කියපු ඩොලර් මිලියනය දැන් කෝ කියලා අහනකොට ඒකට වෙන වෙන කතන්දර කියන්න බෑ. ඒ තිබිච්ච හදිසිය, ඒ මහත්තයට තිබුණු වුවමනාව නැතුව යන්න මොකක් හරි දෙයක් ආණ්ඩුව පැත්තෙන් වුණාද කියලා අපි දන්නේ නෑ. අපිට හිතෙන විදියට නම් එහෙම දෙයක් වුණේ නෑ.
මේ ආණ්ඩුව පත්වෙලා තියෙන කාලය ඇතුළත මිනිස්සුන්ට එපාවෙන නරක දේවල් කළේ නෑ. පොඩි පොඩි සිද්ධි දෙක තුනක් සිදුවුණා. එහෙම තමයි රටකට ආණ්ඩුවක් පත්වුණාට පස්සේ ආණ්ඩුවක් කියලා කියන්නේ රට පාලනය කරන අය. ඒගොල්ලන්ට මිනිස්සුන්ට ආතල් දිදිී හුරතල් කරකර ආදරේ කරකර ප්රේම සම්බන්ධතා පවත්වමින් ඉන්න බෑ. ඒක අපි හොඳටම දැනගන්න ඕනේ. ඒ නිසා තමයි රටක බලයට ආවට පස්සේ ඊට කලින් හිටපු දේශපාලකයන්ගෙන් බලාපොරොත්තු වෙච්ච දේ අනුර සහෝදරයගෙන් බලාපොරොත්තු වෙන්න බෑ. හැබැයි සංගීත් විජේසූරියලා වගේ කලාකාරයෝ අපිට විශ්වාසයි. අපි ඒගොල්ලන්ව විශ්වාස කළා.
ඩොලර් මිලියනයක් කියන්නේ පොඩි ගානක් නෙවෙයි. ඒක 300න් විතර වැඩිකරලා ගන්නනේ තියෙන්නේ. එතකොට ඩොලර් මිලියනයක් කියලා කියන්නේ රුපියල් මිලියන 300ක්. දහයෙන් වැඩිකළාම රුපියල් මිලියන 3000ක්. රුපියල් මිලියන 3000ක් කියලා කියන්නේ විශාල මුදලක්. අපිට නම් ඉතින් බින්දු ගාන හිතාගන්නවත් බෑ. මේ රටේ තියෙන යම් ප්රශ්න ප්රමාණයක් විසඳන්න පුළුවන්. මේවා ණය නෙවෙයි. මේවා ආධාර. මේවා පරිත්යාග. මේවා එක එක රටවලින් ඉල්ලගන්න සල්ලි නෙවෙයි. මේවා අපේ සල්ලි. කොහෙන් හරි කෙනෙක් අපිට දීලා වරාය ඕනේ, හයිවේ එක ඕනේ, අර ගොඩනැගිල්ල හදන්න ඕනේ, මේ ගොඩනැගිල්ල හදන්න ඕනේ, මේ පැත්තෙන් කෑල්ලක් ඕනේ, අර පැත්තෙන් කෑල්ලක් ඕනේ. ඒක තමයි අපේ රටේ තිබුණු ප්රශ්නේ. හැබැයි දැන් ඒ ප්රශ්න සියල්ල නිරාකරණය වෙලා. දැන් අපිට ගැටලුවක් නැතිව නිදහසේ ඉන්න රටක් තියෙනවනේ. අපි ප්රාර්ථනා කරපු වෙනස ලැබුණනේ. දැන් පොඩ්ඩක් සංගීත් විජේසූරිය මහත්තයා උනන්දු වෙලා අර ඩොලර් මිලියනයයි, ඔයාගේ යාළුවා කියන ඩොලර් මිලියන 10යි අපි ලංකාවට ගෙන්නගමුද? ගෙන්නලා බැංකුව හදාගෙන හෝ බැංකුවක් නැතුව හෝ මේ රටේ ඇනහිටලා තියෙන සංවර්ධන ව්යාපෘති ටිකවත් කරගෙන යන්න අඩුම තරමේ. අයි.එම්.එෆ්. එකෙන්ම ඉල්ල ඉල්ලා කරන්නේ නැතුව. අපි හිතමුකෝ මේ අධිවේගී මාර්ගයේ වැඩ ටික ඉවර කරගන්නවත් මම හිතන්නේ මේ සල්ලි ටිකෙන් අපිට යම් ප්රමාණයකට හරි පුළුවන් වෙයි. අපිට ඉතින් තේරෙන්නේ නෑ ඕවා. හැබැයි අපිට තේරෙනවා ඩොලර් මිලියනයක් කියන්නේ ලොකු ගානක්, මිලියන 10ක් කියන්නේ ඊට වඩා ලොකු ගානක්. ඒක 300න් වැඩි කළාම රුපියල් මිලියන 3000ක්. රුපියල් මිලියන 3000ක් කියලා කියන්නේ අපිට හිතෙන විදියට රුපියල් කෝටි 300ක් විතර සල්ලි. රුපියල් කෝටි 300කින් ලංකාවේ යම් දෙයක් කරන්න පුළුවන්. ඒ විතරක් නෙවෙයි මිනිස්සුන්ගේ ජීවිත සුඛිත මුදිත කරන්න පුළුවන් විදියේ මුදලක්. රටට අවශ්ය කරන විවිධාකාර සල්ලි ප්රශ්න ලංකාව ඇතුළේ තියෙන වෙලාවකනෙ මේ එතුමන්ලා ඉදිරිපත් වෙන්නේ.
ඇත්තටම ඔය මුල්ම 1000 ලැබුණාම, ඊළඟට 10,000 ලැබුණාම මේගොල්ලන්ව නාඳුනන, මේගොල්ලොත් එක්ක කතා නොකරපු, මේගොල්ලොත් එක්ක හිතවත්කමක් නැති තව අය රට පුරා ඇතිනේ. එතකොට ඩොලර් එක, දෙක, තුන, හතර, පහ එකතු වෙලා අපිට අපේ ආර්ථික ශක්තිය නිර්මාණය වෙනවා. ඒ නිසා සංගීත් විජේසූරිය මහත්තයෝ කොහේ හරි ඉන්න තැනකින් ඇවිල්ලා අනේ අපිට පිහිටවෙන්න. අර ඩොලර් මිලියනය දෙන්න බලාපොරොත්තු වෙන මහත්තයාගේ හිත සමහර විට රිදිලා ඇත්තේ. මොකද මේකට ක්රමයක් හදාගන්න බැරුව. රෝහිතලා වගේ අය නම් ඒ දවස්වල කිව්වා මේ සල්ලි එන්නේ නැව්වල කියලා. එහෙම නෙවෙයිනේ අපි දන්නවනේ, තත්පර ගානෙන් සල්ලි එහාට මෙහාට යවන්න පුළුවන් ක්රම දැන් ලෝකේ තියෙනවනේ. ඒ නිසා අද කිව්වොත් හෙට ගෙන්නගන්න පුළුවන් වෙයි කියලා අපිට හිතෙනවා. නොදන්නවා නම් සමාවෙන්න. කොහොම හරි කමක් නෑ දැන් ඉතින් අපි වැඩේට බහිමුද? මොකද ඊට පස්සේ ඔබතුමාට ආයෙත් කියන්න පුළුවන් ‘මම බඹරා වගේ විසේකාරයා… මම දෙබරා වගේ ගණන්කාරයා…’ කියලා. නැත්නම් නිකන් වැඩේ අප්සෙට් වෙනවා. ඊට පස්සේ නිකන් අපිට හිතෙන්න පටන් අරගන්නවා ජේත්තුව විතරයි, මොනරගේ ඉස්සරහා පැත්ත ලස්සන වුණාට පස්ස පැත්ත හෙලුවෙන් කියලා. ඒ වගේ එකක් ඔබතුමාට ගැළපෙන්නේ කියලා. එහෙම නැතුව අපි වැඩේ කරමුද සංගීත් විජේසූරිය මහත්තයො. අපි ඉන්නවා ඔයත් එක්ක ඕනෙ වෙලාවක… එකෙන්ම…
ජීවන පහන් තිළිණ
