වරාය, නාවික සහ ගුවන් සේවා අමාත්ය නිමල් සිරිපාල ද සිල්වා පාඩු ලබන බව පුන පුනා පවසන ශ්රීලංකන් ගුවන් සේවයේ ගුවන් සේවිකා තනතුරු වෙත බඳවා ගැනීමේ සම්මුඛ පරීක්ෂණ සඳහා වරාය, නාවික සහ ගුවන් සේවා අමාත්යවරයාගේ පෞද්ගලික ලේකම්ගේ අත්සනින් ලිපි යවා තිබෙනවා. මෙම ලිපි යවා ඇත්තේ මන්ත්රීවරුන් සහ සංවිධායකවරුන් වෙතයි.Sri Lanka Latest News
එම සම්පූර්ණ ලිපිය මෙසේයි.
“හිතවත් මන්ත්රීතුමනි / සංවිධායකතුමනි
ශ්රීලංකන් ගුවන් සේවාවේ ගුවන් සේවිකා තනතුර සඳහා බඳවා ගැනීම.
ශ්රීලංකන් ගුවන් සේවාවේ ගුවන් සේවිකා තනතුර සඳහා බඳවා ගැනීම සඳහා මූලික සුදුසුකම් පරීක්ෂා කිරීමේ සම්මුඛ පරීක්ෂණයක් 2023 අගෝස්තු 3 වන දින උදෑසන 8.30 සිට කොළඹ බණ්ඩාරනායක ජාත්යන්තර සම්මන්ත්රණ ශාලාව (BMICH) පරිශ්රයේ ලැවන්ඩර් (Lavender) ශාලාවේ පැවැත්වීමට කටයුතු සුදානම් කර ඇත. ඒ සඳහා පහත සඳහන් සුදුසුකම් ඇති කාන්තා අපේක්ෂිකාවන් යොමු කරන ලෙසත්, ඔවුනට එදිනට එකී වේලාවට සහභාගී වන ලෙසත්, ඒ සඳහා අයදුම් පත් අවශ්ය නොවන බවත් ජීව දත්ත වාර්තාවක්, අධ්යාපන සුදුසුකම් පිළිබඳව සහතික පත් රැගෙන එකී ශාලාවට පැමිණෙන ලෙසත් උපදෙස් දුන මැනවි.
අවශ්ය සුදුසුකම් පහත පරිදි වේ.
• 2023 අගෝස්තු මස 01 වැනි දිනට වයස අවුරුදු 18ත් 27ත් අතර විය යුතුය.
• අධ්යන පොදු සහතික පත්ර සාමාන්ය පෙළ ඉංග්රීසි විෂයට සම්මානයක් සහිතව විෂයන් 6කින් එකවර සමත්විය යුතුය.
• ඉංග්රීසි භාෂාව පිළිබඳව ප්රවීනත්වය සහ විදේශීය භාෂාවන් පිළිබඳව ප්රවීනත්වය අමතර සුදුසුකම් ලෙස සලකනු ලැබේ.
• අවම උස 157.5cm වන අතර, පාදේ ඇඟිලි වලින් සිටගෙන ඇත එසවූ පසු ළඟාවිය හැකි අවම උස 212cm විය යුතුය.
• ශරීරයේ BMI අගය නිසි ආකාරව පැවතිය යුතුය.
• සම්මුඛ පරීක්ෂණය සඳහා උඩරට ඔසරියකින් (අත්කොට (U) හති හැට්ටයක් සහිතව)සැරසී පැමිණිය යුතුය.
මේ පිළිබඳව වැඩි විස්තර දැන ගැනීම සඳහා කසුන් සඳරෝජන
පෞද්ගලික ලේකම්,
වරාය, නාවික සහ ගුවන් සේවා අමාත්යතුමන්ගේ”
මේ පිළිබඳව අදාළ දුරකථන අංකය සඳහන් කසුන් සඳරෝජන නමැති අය විමසූ විට ඔහු පැවසුවේ තමන් නිමල් සිරිපාල ද සිල්වා අමාත්යවරයාගේ පෞද්ගලික කාර්යය මණ්ඩලයේ අයෙකු බවයි. මෙම ලිපි යොමුකරනු ලැබුවේ ඇමතිවරුන් වෙත බවයි ඔහු කියා සිටියේ.
“මේ ලියුම් යැව්වේ ඇමතිවරුන්ට, එයාලගේ අය එවන්න කියලා. ප්රශ්නයක් නැහැ මේ ගැන විස්තර ශ්රීලංකන් එකේ වෙබ් එකෙත් තියෙනවා. ඕන කෙනෙකුට එදාට එන්න පුළුවන්” යයි ඔහු පවසා සිටියා.
