හෙට පැවැත්වීමට නියමිතව ඇති එක්සත් ජාතික පක්ෂයේ 79 වැනි සංවත්සරය සදහා සමගි ජන බලවේගය නියෝජනය කරමින් පක්ෂ මහලේකම් රංජිත් මද්දුමබණ්ඩාර මහතා පමණක් සහභාගී කරවීමට එම පක්ෂය තීරණය කොට තිබේ.Sri Lanka Latest News
එජාප සමුලුවට සහභාගී වන ලෙසට සජබයට නිල වශයෙන් ආරාධනාව ලැබීමෙන් පසු ඊයේ පැවැති පක්ෂයේ විශේෂ සාකච්ඡාවකදී මෙම තීරණය ගැනීමට පක්ෂයේ ජ්යෙෂ්ඨයන් කටයුතු කොට ඇත.
මෙහිදී සජබ මන්ත්රීවරුන්ටද ඊට ආරාධනා කොට තිබුණද පසුගිය දිනවල එජාප සභාපති වජිර අබේවර්ධන මහතා පෞද්ගලිකවම සජබ මන්ත්රීවරුන්ට කතාකොට ඊට සහභාගී වන ලෙසට කර තිබූ දැනුම්දීම් මෙවැනි තීරණයක් ගැනීම සදහා සජබයට හේතු වී ඇති බව දැනගන්නට තිබේ.
සජබ මන්ත්රීවරුන්ගේ ස්ථාවරය වී ඇත්තේ සජබය දෙකඩ කිරීමේ අරමුණින් යුතුව මෙසේ එජාප සභාපතිවරයා පෞද්ගලිකව සජබ මන්ත්රීවරුන්ට ඇමතුම් ලබා දෙමින් ඊට සහභාගී වන ලෙස දැනුම් දී ඇති බවය.
ඒ අනුව එජාප සභාපතිවරයාගේ ක්රියාකලාපයට විරෝධය පළකරමින් සජබ මහලේකම්වරයා එජාප මහලේකම් තලතා අතුකෝරල මහත්මිය වෙත දුරකත ඇමතුමක් ලබා දීමටද කටයුතු කොට ඇති බව වාර්තා වේ.
සජබ මහලේකම්වරයා පමණක් එජාප සංවත්සරයට සහභාගී කරවීමට සජබය තීන්දු කොට ඇත්තේද ඊට ප්රතිචාර වශයෙන් බව දැනගන්නට තිබේ.
එමෙන්ම රනිල් වික්රමසිංහ මහතා අත්අඩංගුවට ගෙන රෝහල්ගතව සිටියදී රුවන් විජයවර්ධන මහතාට අයත් සන්ඩේ ටයිම්ස් පුවත්පත විශේෂ පුවතක් පළකරමින් කියා සිටියේ එජාප සංවත්සරයට සජබයටද ආරාධනා කොට ඇති බවත්, පක්ෂ මහලේකම්වරයා එම ආරාධනාව පිළිගත් බවත්ය.
නමුත් පසුව රංජිත් මද්දුමබණ්ඩාර මහතා කියා තිබුණේ එම පුවත සම්පූර්ණයෙන්ම අසත්යයක් බවත්, තමන්ට එවැනි ආරාධනාවක් නොලැබුණු බවත්, සන්ඩේ වයිම්ස් පුවත්පත තමන්ට කතා නොකළ බවත්ය.
ඒ අනුව එම අසත්ය පුවත රනිල් වික්රමසිංහ මහතාගේ පාර්ශ්වයෙන් රුවන් විජයවර්ධන මහතාගේ පවුලට අයත් සන්ඩේ ටයිම්ස් පුවත්පතේ පළ කළේ සජබය දෙකඩ කොට මන්ත්රී කණ්ඩායමක් එජාප සංවත්සරයට සහභාගී කරවා ගැනීමේ අරමුණින් බවද සජබ මන්ත්රීවරුන්ගේ ස්ථාවරය වී ඇත.
