ජනාධිපති අනුර කුමාර විපක්ෂයේ සිටියදී ජෝන් කීල්ස් සභාපති ක්රිෂ්ණන් බාලේන්ද්රව දැඩිව විවේචනය කළේය. එයට හේතු වූයේ කොළඹ වරායේ බටහිර පර්යන්තය ඔහුගේ කොම්පැනියට භාරදීම සම්බන්ධයෙනි. එහෙත් අනුර ජනාධිපති අපේක්ෂකයා වූ පසු ජෝන් කීල්ස් සභාපති අනුරගේ ව්යාපාරික කටයුතුවලට සහභාගි විය. අනුර ජනාධිපති වූ පසු ඔහු සිලෝන් චේම්බර් ඔෆ් කොමර්ස් නියෝජනය කරමින් අනුර සමග සමීප සබඳතාවක් ගොඩනගා ගත්තේය. ජෝන් කීල්ස් සමාගම චීනයේ නිෂ්පාදිත BYD වාහන ලංකාවට ගෙන්වන්නාය. මේ වනවිට ලංකාවේ විශාල වශයෙන් අලෙවි වන වාහනය බවට පත්ව ඇත්තේ BYD. ජපාන සහ ඉන්දීය වාහන අභිභවා ඉදිරියට එමින් තිබේ. එසේම ජෝන් කීල්ස් කොළඹ වරායේ බටහිර පර්යන්තය සංවර්ධනය කරන්නේ ඉන්දියාවේ ප්රකට ව්යාපාරිකයෙක් වන අදානි සමගය. අනුර කුමාර වරක් චෝදනා කළේ ජෝන් කීල්ස් සහ අදානිට බටහිර පර්යන්තය ලබාදුන්නේ ජෝන් කීල්ස් සභාපතිවරයාට ඥාති වන හිටපු ඇමැති සහ හිටපු ඉන්දියාවේ ශ්රී ලංකා මහකොමසාරිස් මිලින්ද මොරගොඩගේ මැදිහත් වීමෙන් කියාය. පාත්ෆයින්ඩර් ෆවුන්ඩේෂන් මිලින්ද මොරගොඩගේය. පසුගියදා එහි පැවැති සම්මන්ත්රණයකට අගමැති හරිනිට ආරාධනා කර තිබුණත් ඇය පැමිණියේ නැත.
ජෝන් කීල්ස් ආයතනයේ නවතම ව්යාපෘතිය සිටි ඔෆ් ඩී්රම්ස් කැසිනෝ ව්යාපෘතියය. පසුගියදා මාලිමා ආණ්ඩුව කැසිනෝ සඳහා භාවිත කරන ඇතැම් මැෂින්වල තහනම ඉවත් කරනු ලැබීය. අලුත්ම ආරංචි මාර්ග කියන්නේ සිටි ඔෆ් ඩී්රම්ස් කැසිනෝ ව්යාපෘතිය විවෘත කිරීමට ඉන්දීය සුපිරි නළු ෂාරුක් ඛාන් සහභාගි වීමට නියමිත බවය. Sri Lanka Latest News
2004දී එවක සංචාරක ඇමැති අනුර බණ්ඩාරනායකගේ ආරාධනයෙන් ලංකාවේ සංචාරක ව්යාපාරය ප්රවර්ධනය කිරීම සඳහා ෂාරුක් ඛාන් ලංකාවට පැමිණියේය. දහස් සංඛ්යාත ජනතාවක් එයට සහභාගි වූහ. එහෙත් නොසිතූ දෙයක් සිදුවිය. ෂාරුක් ඛාන් ඉලක්ක කොට බෝම්බ ප්රහාරයක් එල්ල විය. ෂාරුක් ඛාන්ට හානියක් සිදු නොවීය. ෂාරුක් ඛාන්ට බෝම්බ ප්රහාරය එල්ල කළේ සිංහල අන්තවාදී පිරිසකි. බෝම්බ ප්රහාරයට ජාතික හෙළ උරුමය වගකිව යුතු බවට ආණ්ඩුව චෝදනා කළේය.
ඉන් වසර 20කට පමණ පසු ෂාරුක් ඛාන් යළිත් ලංකාවේ සංචාරය කිරීමට පැමිණෙන බව තහවුරු වී තිබේ. ජෝන් කීල්ස් සමාගම මෙම කැසිනෝ ව්යාපෘතිය කරන්නේ ඉන්දීය සමාගමක් සමග හවුල් වෙලාය. ෂාරුක් ඛාන්ගේ ලංකා සංචාරය සම්බන්ධීකරණය කරන්නේ ඉන්දීය සමාගම විය යුතුය.
ෂාරුක් ඛාන් 2004 ලංකාවට එන විට ලංකාව පාලනය කළේ ශ්රීලනිප-ජවිපෙ හවුල් ආණ්ඩුවකි. ඒ ආණ්ඩුවේ අනුර කුමාර දිසානායක, වත්මන් විදේශ ඇමැති විජිත හේරත් ප්රබල ඇමැතිවරු වූහ. අද ෂාරුක් ඛාන් ලංකාවට එනවා නම් ඔහු එන්නේ අනුර කුමාර ජනාධිපතිව සිටියදී ජවිපෙ ආණ්ඩුවක් රට පාලනය කරද්දීය. 2015 ජනාධිපතිවරණය මැද තවත් ඉන්දීය සුපිරි නළුවෙක් වූ සල්මන් ඛාන් ලංකාවට ආවේය. ඒ, මහින්දට වක්රව සහාය පළ කිරීමටය. එහෙත් මහින්ද විශාල මුදලක් වැයකොට සල්මන්ව ගෙන ආ බවට විපක්ෂය චෝදනා කළ නිසා එය මහින්දට අවාසියක් විය. ෂාරුක්ගේ සංචාරය ලංකාවේ ජනතාව කෙලෙස පිළිගනීදැයි කිව නොහැකිය.
