පසුගිය සති කිහිපයේදී රට තුළ මතුවූ දේශපාලන කැලඹිලිකාරී ස්වභාවය මුල් කරගෙන ලංකාවේ ප්රධාන දේශපාලන පක්ෂ හතර නියෝජනය කරන නායකයන් සිවුදෙනා සිය දේශපාලන සැලසුම් වෙනස් කර ඇති ආකාරයක් ‘මව්රට’ට වාර්තා වේ.Sri Lanka Latest News
ජනාධිපති රනිල් වික්රමසිංහ මහතා මීට පෙර සැලසුම් කර තිබුණේ අවශේෂ කිසිදු මැතිවරණයක් නොපවත්වා ලබන වසර මුලදී හදිසි ජනාධිපතිවරණයක් පැවැත්වීමටය.
ආණ්ඩුව පාර්ශ්වයෙන් අවස්ථා කිහිපයකදීම ඒ බව ප්රසිද්ධියේ ප්රකාශ කිරීමටද පියවර ගෙන තිබිණි.
කෙසේ වෙතත් පසුගිය දින කිහිපය ඇතුළත ආණ්ඩුව විසින් කර ඇති රහසිගත ජනමත විමසුමක ප්රතිඵලවලට අනුව හදිසි ජනාධිපතිවරණයකට ගියහොත් අවාසිදායක ප්රතිඵලයක් ලැබෙනු ඇති බවට වාර්තා කර තිබීම හේතුවෙන් ලබන වසරේ ජනාධිපතිවරණයක් පැවැත්වීමේ අදහස ජනාධිපති රනිල් වික්රමසිංහ මහතා විසින් මේ වන විට අතහැර දමා ඇති බව වාර්තා වේ.
ඒ අනුව ජනාධිපතිවරයා තීරණය කොට ඇත්තේ හදිසි ජනාධිපතිවරණයකට නොගොස්, ව්යවස්ථාවට අනුව සිය ධුර කාලය නිමවන අවස්ථාවේදී සාමාන්ය පරිදි ජනාධිපතිවරණයක් පැවැත්වීමටය.
මේ අතර, සමගි ජන බලවේගයේ නායක, විපක්ෂ නායක සජිත් ප්රේමදාස මහතා මේ වන විට තීන්දු කොට ඇත්තේ ඉදිරියට පැමිණෙන ඕනෑම මැතිවරණයක් ඉලක්ක කොට ඊට ශක්තිමත්ව මුහුණ දීම සඳහා විපක්ෂයේ දැවැන්ත දේශපාලන පෙරමුණක් ගොඩනැගීමටය.
ඒ අනුව මේ දිනවල විපක්ෂ නායකවරයා සිය සම්පූර්ණ කාලයම ඒ වෙනුවෙන් යොදවා ඇති ආකාරයක් දැකගන්නට තිබේ.
විපක්ෂ නායකවරයාගේ ප්රධානත්වයෙන් බිහි කිරීමට නියමිත මෙම සන්ධානයට එක්වීම සඳහා විපක්ෂයේ ප්රධාන දේශපාලන පක්ෂ රැසක් මෙන්ම සංවිධාන රැසක්ම එකඟතාව පළකොට ඇති බවක්ද දැනගන්නට ඇත.
ජනාධිපතිවරයාත්, විපක්ෂ නායකවරයාත් මේ ආකාරයට සිය ඉදිරි දේශපාලන කටයුතු සැලසුම් කරද්දී හිටපු අගමැති මහින්ද රාජපක්ෂ මහතා සක්රීය දේශපාලනයෙන් ඉවත්ව තරමක් නිහඬ ස්වරූපයකින් කටයුතු කිරීමට තීරණය කර ඇති බව වාර්තා වේ.
ඒ අනුව ප්රසිද්ධ දේශපාලන රැස්වීම්වලට සහභාගි නොවීමටත්, උත්සවවලට සහභාගි නොවීමටත් මහින්ද රාජපක්ෂ මහතා තීරණය කොට ඇති බව පැවැසේ.
තරමක අසනීප තත්ත්වයෙන් පසුවීමත්, දේශපාලනය සම්බන්ධයෙන් යම් කලකිරුණු ස්වභාවයකින් පසුවීමත් මහින්ද රාජපක්ෂ මහතාගේ මෙම තීන්දුවට බලපා ඇති බව දැනගන්නට තිබේ.
මේ අතර, ජනතා විමුක්ති පෙරමුණේ නායක අනුර කුමාර දිසානායක මහතා මේ වන විට ඉදිරි පළාත් පාලන මැතිවරණය සඳහා සිය පක්ෂය සූදානම් කරමින් සිටින ආකාරයක් දැකගන්නට ඇත. පළාත් පාලන මැතිවරණය කල්දැමීමට එරෙහිව දැනටමත් ජවිපෙ අධිකරණ ක්රියාමාර්ගවලට යොමුව ඇති බැවින් අදාළ නඩු තීන්දු ජවිපෙට වාසිදායක ආකාරයට ලැබෙනු ඇති බව ජවිපෙ විශ්වාසය වී තිබේ.
ඒ අනුව හදිසි පළාත් පාලන මැතිවරණයක් ඉලක්ක කරගෙන ඊට සිය පක්ෂය ශක්තිමත්ව මුහුණ දිය හැකි ආකාරයට අනුර කුමාර දිසානායක මහතා ඇතුළු කණ්ඩායම කටයුතු කරමින් සිටින ආකාරයක් දැකගන්නට ඇත.
