කොළඹ අගරදගුරු අති උතුම් කාදිනල් මැල්කම් රංජිත් හිමිපාණෝ ඊයේ (23) වතිකානයේ බලා පිටත්ව ගියහ.Sri Lanka Latest News
අප්රේල් 26 වැනි දින වතිකානයේ සාන්ත පීතර චතුරශ්රයේ පැවැත්වෙන ශුද්ධෝත්තම ෆ්රැන්සිස් පාප් වහන්සේගේ අවමංගල්ය මෙහෙය සඳහා සහභාගි වීමට කාදිනල් රංජිත් හිමිපාණෝ ඊයේ උදෑසන 9.30ට කටුනායක බණ්ඩාරනායක ජාත්යන්තර ගුවන්තොටුපොළෙන් පිටත්ව ගියහ.
රෝමානු කතෝලික පල්ලියේ පළමු ලතින් අමෙරිකානු නායකයා වන ශුද්ධෝත්තම ෆ්රැන්සිස් පාප් වහන්සේ ඉකුත් සඳුදා දින ආඝාතයකින් ස්වර්ගස්ථ විය.
අතිඋතුම් ශුද්ධෝත්තම ප්රැන්සිස් හිමිපාණෝ ස්වර්ගස්ථ වීමත් සමඟ හිස් වී ඇති පාප් පදවිය සඳහා දැනට ලොව පුරා සිටින වයස අවුරුදු අසූවට අඩු කාදිනල් හිමිපාණෝ 135 දෙනකු සුදුසුකම් ලබා තිබෙන අතර ප්රධාන කාදිනල් හිමිපාණෝ 09 දෙනකුගේ නම් යෝජනා වී තිබේ.
ප්රධාන කාදිනල්වරුන්ගේ නාමලේඛනයේ ශ්රී ලංකා ධජය යටතේ ආචාර්ය කාදිනල් මැල්කම් රංජිත් හිමිපාණන්ගේ නාමය ද ඉදිරිපත් කර තිබේ.
වර්ෂ 2013දී අතිඋතුම් ඔස්වල්ඩ් ගෝමිස් රදගුරු හිමිපාණෝ විශ්රාම යෑමෙන් පසු කාදිනල් මැල්කම් රංජිත් හිමිපාණෝ අගරදගුරු පදවියට පත්වූහ. සිංහල, දෙමළ, ඉංග්රීසි, ඉතාලි, ප්රංශ, ජර්මන්, හීබ්රූ, ග්රීක, ස්පාඤ්ඤ, ලතින් යන භාෂා හැසිරවීමේ නිපුණතාවකින් යුතු උන්වහන්සේ බෞද්ධ, හින්දු, මුස්ලිම් ආගමික සංහිඳියාව වෙනුවෙන් සහ සිංහල, දෙමළ සහ මුස්ලිම් ජාතීන් අතර ජාතික සමගිය ඇතිකරලීම සඳහා පසුගිය කාලය මුළුල්ලේම කැපවී ක්රියා කර තිබේ.
