කාලයක් පුරා පන්සල් පද්ධතිය ශක්තිමත් කරන්න අවශ්ය ශක්තිය නොලැබෙන බවත් ගමේ නගරයේ දායක පරපුර පුරවැසි පරපුර මේ වෙනුවෙන් විශාල දායකත්වයක් ලබා දුන්නත් රටක් ලෙස අප දැන් ඛේදවාචකයන් රැසකට මුහුණ දීම නිසා පුරවැසියන් සේම පන්සලේ දායක සභාවේ සාමාජිකයන්ටද ගැටලු ඇති බවත් මෙවැනි තත්ත්වයක් මැද පවා ආගමික සංවර්ධන ක්රියා සිදු කරන ජනතාවට ගෞරවය පුදකරන බවත් විපක්ෂ නායක සජිත් ප්රේමදාස මහතා පැවසීය. Sri Lanka Latest News
විපක්ෂ නායක සජිත් ප්රේමදාස මහතා මේ බව කියා සිටියේ අද මීරිගම මිණිඔලුව ශ්රී විද්යාවාස මහා පිරිවෙනෙහි අභිනවයෙන් ඉදි කරන ලද සංඝාවාස ගොඩනැගිල්ල විවෘත කිරීම මහා උත්සවය හා එක්වෙමිනි. මහා විහාර වංශික ශ්රී ලංකා රාමඤ්ඤ මහානිකායේ අතිපූජ්ය මහානායක අග්ගමහා පණ්ඩිත මකුලෑවේ ශ්රී විමල අභිධාන මහානායක මහා ස්වාමීන්ද්රයන් වහන්සේ විසින් විපක්ෂ නායක සජිත් ප්රේමදාස මහතාට සිදු කරන ලද ආරාධනයක් අනුව එම අවස්ථාව හා එක්විය.
අප රටේ බුද්ධ ශාසනයට සුවිශේෂ ස්ථානයක් ආණ්ඩුක්රම ව්යවස්ථාවෙන් ලැබී ඇති බවත් ආණඩුක්රම ව්යවස්ථාවෙන් සම්බුද්ධ ශාසනය ශක්තිමත් කිරිම පෝෂණය කිරීම ප්රවර්ධන කිරීම සැමගේ වගකීමක් සේම සෙසු ආගම් සංස්කෘතීන් රැකගැනීමත් සුරක්ෂිත කිරීමත් තුළින් රටේ ඒකීයභාවය සෛරීත්වය භෞමික අඛණ්ඩතාව සහ නිදහස ආදිය සුරක්ෂිත වන බවත් විපක්ෂ නායකවරයා පැවසීය.
ජාතීන් ආගම් අතර ඇති වන සමගිය තුළින් මාතෘභූමිය සුරක්ෂා වන බවත් අප රටේ පන්සල් පද්ධතිය තුළ විහාරස්ථාන 14129ක් ඇති බවත් තවත් 10347ක දහම්පාසල් පිරිවෙන් 824ක් ද ඇති බවත් මේ මහා සංඝරත්නය මුලිකත්වයෙන් ක්රියාත්මක විහාරස්ථාන පද්ධතිය තුළ සම්බුද්ධ ශාසනයේ චිරස්ථිතිය උදෙසා ආගමික කාර්යන් ඉටු කරනවා සේම රටේ දැහැමිකම සෞභාග්යය සමෘද්ධිය සංහිදියාව සහෝදරත්වය එකමුතුභාවය නිර්මාණය කරන්න මේ ආගමික සිද්ධස්ථාන හේතුවන බවත් විපක්ෂ නායකවරයා පැවසීය.
රටේ පරිපාලන දිස්ත්රික් 25 ශාසනාරක්ෂක බල මණ්ඩල කොට්ඨාස 324ක් ඇති බවත් මේ තුළින් විහාරස්ථාන හරහා බුද්ධ ශාසනය සුරක්ෂිත කරනවා සේම රටේ සංවර්ධන සුබසාධනය දියුණුව උදෙසා මේ ආගමික සිද්ධස්ථාන යොදා ගැනීම නූතන යුගයේ රටේ දියුණුවට හේතු වන බවත් විපක්ෂ නායකවරයා පැවසීය.
අප රටේ විහාරස්ථාන තුළ රටේ සෞභාග්යය ගොඩනගන්න එකමුතුභාවය නායකත්වය සංහිදියාව ඇති කර භේදභින්නතා අවම කර නව තාක්ෂණය බෙදාහරින කේන්ද්රස්ථාන බවට පත් කර ඉතිහාසය සංස්කෘතිය ආරක්ෂා කරන සමස්ත සමාජය ගොඩනංවන කේන්ද්රස්ථානයක් බවට විහාරස්ථාන පරිවර්තනය කරන නව යුගයක් කරා යා යුතු බවත් මේ සඳහා සම්බුද්ධ ශාසනයේ මුරදේවතාවුන් වන මහා සංඝරත්නය ආරක්ෂා කළ යුතු බවත් විපක්ෂ නායකවරයා පැවසීය.
එසේම රටක් ලෙස විවිධ අභියෝගවලට මුහුණ දෙන මොහොතෙ රටේ සෞභාග්යය වෙනුවෙන් මහා සංඝරත්න සිය යුතුකම් ඉටු කරන බවත් රට සුරක්ෂා කිරීම වෙනුවෙන් ඉදිරියටත් මේ ගෞරවනීය මැදිහත්වීම සිදු කරන ලෙස ගෞරවයෙන් ඉල්ල සිටින බවත් විපක්ෂ නායකවරයා පැවසීය.
