සියලු ඡන්ද විමසීම්වලදී කොට්ඨාශ (කේවළ) ක්රමයට 60% ක් සහ අනුපාතික ක්රමයට 40% ක් ජනතා නියෝජිතයන් තෝරා ගන්නා ආකාරයේ මිශ්ර ඡන්ද ක්රමයක් මූලධර්මයක් ලෙස පිළිගෙන වාර්තාව කෙටුම්පත් කිරීමට, ” මැතිවරණ සහ ඡන්ද විමසීම් ව්යුහයේ හා නීතීරීතිවල ප්රතිසංස්කරණ හඳුනා ගැනීමටත්, ඒ සම්බන්ධයෙන් අවශ්ය සංශෝධන ඉදිරිපත් කිරීමටත් වන පාර්ලිමේන්තු විශේෂ කාරක සභාව ” එකඟ වූ බව එහි සභාපති, සභානායක, අධ්යාපන අමාත්ය දිනේෂ් ගුණවර්ධන මහතා ප්රකාශ කළේය.
ඔහු පැවසුවේ, පළාත් පාලන ආයතනවල බහුතර ස්ථාවරභාවය ඇතිකිරීම සඳහා ජයග්රාහී පක්ෂයට හෝ කණ්ඩායමට අතිරේක මන්ත්රී ධුර 02ක් ලබා දීම සඳහාත් නිර්දේශ කිරීමටද ප්රතිපත්තිමය වශයෙන් එකඟතාවට පැමිණි බවය. එමෙන්ම පළාත් සභා සඳහා නව ඡන්ද ක්රමයක් ඇති කරන තුරු පැරණි ඡන්ද ක්රමයටම කඩිනමින් පළාත් සභා ඡන්දය පැවැත්වීමේ නිර්දේශය වාර්තාවට ඇතුළත් කිරීමටද එකඟතාවය ලැබී ඇත.
පාර්ලිමේන්තු මන්ත්රී ධුර සංඛ්යාව 225ට සීමා කිරීමද එකඟ වූ තවත් යෝජනාවක් බව, කාරක සභා සභාවේ සභාපති දිනේෂ් ගුණවර්ධන මහතා පැවසීය. පාර්ලිමේන්තු සහ පළාත් සභා සඳහා නව මැතිවරණ නීතී සම්පාදනයේදී කොට්ඨාශ (කේවළ) ක්රමයට 60% ක් සහ අනුපාත ක්රමයට 40% ක් වන පරිදි දිස්ත්රික්කය තුළ සීමා නිර්ණය කිරීමට නිර්දේශ කිරීමටද කාරක සභාව එකඟතාවය පළ කර තිබේ.
සියලු මැතිවරණවලදී කාන්තා නියෝජනය 25% ක් ලෙස පවත්වා ගැනීමට සහ තරුණ නියෝජනය අනිවාර්ය කිරීමද නිර්දේශ කිරීම සඳහා ප්රතිපත්තිමය වශයෙන් එකඟතාවය ලැබු තවත් යෝජනාවකි.
මීට අමතරව දේශපාලන පක්ෂ පිළිගැනීම සහ අවලංගු කිරීමේ නව නීතී, දේශපාලන සන්ධානයන් ලියාපදිංචි කිරීමේ නව නීතී ගෙන ඒම සම්බන්ධයෙන්ද නිර්දේශ ඇතුළත් කිරීමට කාරක සභාවේ එකඟතාවය ලැබුණු බව එහි සභාපති දිනේෂ් ගුණවර්ධන මහතා සඳහන් කළේය.
මෙම තීරණ ගෙන ඇත්තේ 2022.02.24 දින පාර්ලිමේන්තු සංකීර්ණයේදී එම කාරක සභාව රැස්වූ අවස්ථාවේදීය. මෙම විශේෂ කාරක සභාව මාර්තු මස මුල් සතියේ යළි රැස්වීමට නියමිත බව එහි ලේකම්, පාර්ලිමේන්තුවේ නියෝජ්ය මහලේකම්, කාර්ය මණ්ඩල ප්රධානී කුෂාණී රෝහණධීර මහත්මිය පැවසුවාය.
කාරක සභාවේ සභාවේ සභාපති දිනේෂ් ගුණවර්ධන මහතාට අමතරව අමාත්ය නිමල් සිරිපාල ද සිල්වා මහතා සහ එම්.ඒ.සුමන්දිරන්, රන්ජිත් මද්දුම බණ්ඩාර, අනුර දිසානායක , මනෝ ගනේෂන්, මධුර විතානගේ, රවුෆ් හකීම් යන මන්ත්රීවරුද 2022.02.24 දින කාරක සභා රැස්වීමට එක්ව සිටියහ.
