ශ්රී ලංකා පොදුජන පෙරමුණේ ජාතික සංවිධායක නාමල් රාජපක්ෂ මහතා මාතලේ කළ සංචාරය අතරතුරදී කිසියම් පුද්ගලයකු සමග වචන හුවමාරුවක් සිදුවන වීඩියෝවක් පසුගිය සතියේදී සමාජ මාධ්යයේ විශාල අවධානයක් ගෙන තිබිණි.Sri Lanka Latest News
එහිදී සිදුව තිබුණේ නාඋල ප්රදේශයේ කළ සංචාරයකදී එක් තරුණයකු විසින් නාමල් රාජපක්ෂ මහතාට විරෝධය පළකිරීමත් පසුව නාමල් රාජපක්ෂ මහතා එම තරුණයා සමග සාකච්ඡා කොට මත ගැටුම අවසන් කරගැනීමත්ය.
මෙම සිදුවීමෙන් පසුව මාලිමාව පැත්තෙන් සමාජ මාධ්යයේ ගෙනගිය ප්රචාරයක සඳහන් වූයේ එය සම්පූර්ණයෙන්ම නාටකයක් බවත්, නාමල් රාජපක්ෂ මහතාගේ හිතවතකු වන රමේෂ් සිල්වා සමග එසේ සංවාදයක නිරතව ඇති බවත්, එය කල්තියා සැලසුම්සහගතව නිර්මාණය කරන ලද එකක් බවත්ය.
නමුත් ඊට ප්රතිචාර දක්වමින් චෝදනාවට ලක්ව සිටින රමේෂ් සිල්වා නමැත්තා පසුගිය සිකුරාදා (19) දිනයේදී සීදූව පොලිසියට පැමිණිල්ලක් කරමින් සඳහන් කර ඇත්තේ තමන් සම්බන්ධයෙන් අන්තර්ජාලය හරහා සාවද්ය පුවතක් ප්රචාරය වන බවත්, වහාම ඒ සම්බන්ධයෙන් විමර්ශනයක් කරන ලෙසත්ය.
එමෙන්ම පසුව සමාජ මාධ්ය වාර්තා කොට තිබුණේ නාමල් රාජපක්ෂ මහතා සමග නාඋලදී සංවාදයක යෙදෙන පුද්ගලයා නාඋල ප්රාදේශීය සභාවට ජාතික ජන බලවේගයෙන් අපේක්ෂකයකු ලෙස තරග වැදුණු සිසිර කුමාර නමැති අයකු යැයි කියාය.
ඔහු ජාතික ජන බලවේගය නියෝජනය කරන ප්රබලයකුගේ සහෝදරයකු බවද එහි සඳහන්ව තිබිණි.
