හිටපු ජනාධිපති රනිල් වික්රමසිංහ මහතා, රාජ්ය මුදල් අවභාවිත කිරීමක් සම්බන්ධයෙන් අත්අඩංගුවට ගැනීමත් සමග රටේ දේශපාලන ක්ෂේත්රය තුළ ඒ පිළිබඳ දැඩි අවධානයක් යොමුව තිබේ. මේ, අමාත්ය බිමල් රත්නායක මහතාගෙන් මාධ්යවේදියෙක් ඒ සම්බන්ධයෙන් විමසූ අවස්ථාවේ ඔහු ලබාදුන් පිළිතුරයි.Sri Lanka Latest News
මාධ්යවේදියා
මේක රනිල් වික්රමසිංහ ජනාධිපතිවරයා ඉලක්ක කරගෙන කරපු දෙයක් කියලා හිතෙනවා. තවත් ජනාධිපතිවරුන්ගේ පහුගිය කාලේ යම් යම් වරදවල් සිද්ධ වෙලා තියෙනවා. ඒවා ගැනත් හොයාබැලීමක් කරන්නත් සූදානමක් තියෙනවද ආණ්ඩුවට?
අමාත්ය බිමල් රත්නායක
අපි පැහැදිලිවම ඒවා පිළිබඳවත් හොයා බලනවා. මොකද මේ රටේ ජනතාවට තිබිච්ච ලොකුම ප්රශ්නය තමයි හැමදාම පොඩි මිනිස්සු තමයි දඬුවම් ලැබුවේ. පොඩි මිනිස්සු තමයි හැමදාම නීතිය ඉස්සරහා වැරදිකාරයෝ වුණේ. රනිල්ලා, රාජපක්ෂලා, චන්ද්රිකාලා සහ ඒ වටේ ඉන්න වළල්ලත්, ඔවුන්ගේ අන්තේවාසිකයෝ, ඔවුන්ට ගොටු අල්ලන කට්ටියත් කවදාවත් හිතුවේ නෑ, කවදාවත් රනිල්ලට නීතිය ක්රියාත්මක වෙයි කියලා.
ඇත්තටම පුදුම වෙන්න ඕනේ මොකක්ද? 1977 යාපනයේ, දැන් මේ ඔබතුමාලා ගියොත් එහෙම සෙට්ටිකුලම්වල, මිනිස්සු කී දාහක් ගම්මානවල පදිංචි කරලා තියෙනවද වාරිකුට්ටියූර් වගේ පැතිවල? කී දාහක් පදිංචි කරලා තියෙනවද දෙණියාය, නුවර, නුවරඑළිය, දැරණියගල, අනුරාධපුරය වගේ ප්රදේශවල? 77 යූ.එන්.පී.ය ඡන්දෙ දිනලා, දෙමළ ජනතාවට ගහලා එළවපු මිනිස්සු? කී දාහක් වවුනියා, මුලතිව්, කිලිනොච්චියේ පදිංචි වෙලා ඉන්නවද? ඒ 77 ආණ්ඩුවේ රනිල් ප්රධාන පෙළේ පුද්ගලයෙක්. ඒ ජාතිවාදී ක්රියාවන්ට ඔහු දඬුවම් ලැබුවේ නෑ.
81 ඡන්දෙ මංකොල්ලකන්න ආපු එවක එක්සත් ජාතික පක්ෂයේ ඇමැතිවරු හතර දෙනෙක්ගෙන් රනිල් වික්රමසිංහත් ආවා කියලා තමයි හැන්සාඩ් එකේ තියෙන්නේ. ගාමිණී දිසානායකලා වගේ අයගේ නමුත් ඇතුළුව. එතකොට 81 සංවර්ධන සභා ඡන්දෙ මංකොල්ලකෑවා. 81දී යාපනයේ පුස්තකාලෙ ගිනි තිබ්බා. ඒවට දඬුවම් ලබන්න තිබුණා. රනිල්ලාට කවදාවත් නීතිය ඔවුන්ගෙන් කටඋත්තරයක්වත් ගත්තේ නෑ. 83 කළු ජූලිය කළා. රනිල් වික්රමසිංහ කැබිනට් ඇමැති. ඔහු අධ්යාපන ඇමැති හැටියට ඉන්නකොට තමයි යාපනයේ පුස්තකාලෙ ගිනි තිබ්බේ.
එතකොට 83 කළු ජූලිය සදහටම මේ උතුර විනාශ කළා. ඔබතුමාලාගේ යාළුවෝ, ඥාතීන් දස දහස් ගණන්, ලක්ෂ ගණන් මේ රට අතෑරලා ගියා. මේක සහමුලින්ම යුද්ධ පිටියක් වුණා. ඒවට රනිල් වික්රමසිංහට දඬුවම් දෙන්න තිබුණේ මීට කලින්.
89දී 60,000ක් දරුවෝ, තරුණයන් ඝාතනය කරද්දී බටලන්දේ රනිල්ගේ වෙනම වධකාගාරයක් තිබ්බා. අද රනිල් වෙනුවෙන් නිවේදන නිකුත් කරන චන්ද්රිකා බණ්ඩාරනායක, බටලන්ද ගැන කොමිසමක් දැම්මා. ඒ කොමිසමෙන් රනිල් පැහැදිලි වගඋත්තරකරුවෙක් බවට චෝදනා ලබලා තිබෙනවා. අපි ඒ බටලන්ද කොමිසමේ වාර්තාව දැන් නීතිපතිට යවලා තියෙනවා.
2015 මහබැංකුව මංකොල්ලකාලා රටේ ආර්ථිකය වට්ටන්න පටන් ගත්තා. මහබැංකු මංකොල්ලයේ තනිකර රනිල්ගේ ආශීර්වාදයෙන් වුණා කියන එක මේ රටේ දේශපාලන පක්ෂ, කෝප් කාරකසභාව, මේ සියලු දෙනා දන්නවා. ඒ නිසා පුදුම වෙන්න ඕනේ මොකටද? රනිල් වික්රමසිංහ වගේ පුද්ගලයන්ව මීට කලින්, ඇයි ඔවුන්ට මීට කලින් දඬුවම් නොදුන්නේ කියන එක තමයි පුදුම වෙන්න ඕනේ.
අද වෙලා තියෙන්නේ මොකක්ද? මේ රටේ හැමදාම මේ ඉහළ, මේ පාලක පැලැන්තිය, ඒ දූෂිත පාලකයෝ එකිනෙකා ආරක්ෂා කළා. රන්ජන් රාමනායක කිව්වා වගේ, ‘හොරු කවද්ද මල්ලි හොරු අල්ලන්නේ…’ එහෙම තමයි තිබුණේ. දැන් රටේ ජනතාව හොරු පන්නලා මිනිස්සුන්ගේ ආණ්ඩුවක් හදලා තියෙනවා. ඉතින් ඒ මිනිස්සුන්ගේ ආණ්ඩුව, රනිල් නෙමෙයි, රාජපක්ෂලා ඔක්කොම, අදාළ කරන පරීක්ෂණ කරනවා. ඒ පරීක්ෂණ අනුව කිසිම තරාතිරමක් බලන්න දෙයක් නෑ. නීතියට අනුව අනිවාර්යයෙන්ම කටයුතු කරනවා. ඒකට අදාළ කරන ශක්තිය, ධෛර්යය සහ ඒ ස්වාධීනව වැඩ කරන්න අවශ්ය කරන ඉඩකඩ, ජනාධිපතිතුමා ඇතුළු අපි ආණ්ඩුවෙන් ලබාදෙනවා.
Dasatha Lanka News
