රථ වාහන ආනයනය සීමා කිරීම සඳහා 50%ක අධිභාරයක් පැනවූ ඉකුත් 15 වැනි දිනට පෙර දින, එනම් 14 වැනි දින විවෘත කරනු ලැබූ ණයවර ලිපි හරහා ගෙන්වන රථ වාහන සඳහාද අදාළ බද්ද අයකළ හැකි පරිදි වෙනස් කිරීමට ජනාධිපතිවරයා පියවර ගෙන ඇත.Sri Lanka Latest News
ඉකුත් 15 වැනිදා ජනාධිපතිවරයා විසින් මෙම අධිභාරය සඳහන් කරමින් ගැසට් නිවේදනයක් නිකුත් කිරීමත් සමග විපක්ෂය ප්රබල චෝදනාවක් එල්ල කරමින් කියා සිටියේ ඊට පෙර දින ජනාධිපතිවරයාට හිතවත් සමාගම් 3ක් විසින් 14 වැනි දින වාහන 4,000ක් ගෙන්වීම සඳහා ණයවර ලිපි විවෘත කොට ඇති බවකි.
ඒ අනුව ජනාධිපතිවරයා ගන්නා තීන්දුව කල් තියාම මෙම සමාගම් විසින් දැනගෙන සිටි බවට චෝදනාවක්ද විපක්ෂය විසින් එල්ල කොට තිබිණි.
ඒ අනුව ආණ්ඩුව තීන්දු කොට ඇත්තේ ණයවර ලිපි විවෘත කළ දිනයේ වාහන ඇණවුම ලබාදුන්නද, එම වාහනය නිෂ්පාදනය කොට ඒවායේ චැසි අංක ණයවර ලිපියට ඇතුළත් කිරීමට සති කිහිපයක් ගතවන බැවින් එම චැසි අංකය ණයවර ලිපියට ඇතුළත් වන දිනයට අදාළව බදු මුදල් අයකිරීමටය.
ආණ්ඩුවේ මෙම තීන්දුවත් සමග මැයි 14 ණයවර ලිපි විවෘත කිරීම හරහා ගෙන්වන සියලු වාහනවලට අධිභාරය පමණක් නොව, ඊට අදාළ අනෙකුත් බදු මුදල්ද ගෙවීමට සිදුවනු ඇත.
