දකුණු ආසියාවේ වඩාත්ම විනයගරුක සහ නීතිය අකුරටම ක්රියාත්මක වන රාජ්යයක් ලෙස සැලකෙන සිංගප්පූරුව පසුගිය දින කිහිපයේම උණුසුම් වූයේ එක්තරා ශ්රී ලාංකිකයකුගේ විකෘති ක්රියාකලාපයක් හේතුවෙනි. ශ්රී ලංකා ජාතිකයකු වන 45 හැවිරිදි මොහොමඩ් අස්කාර් මොහොමඩ් රසික් නමැති පුද්ගලයා එරට ආරක්ෂක අංශවල දැලට හසුවන්නේ, මහජන සාමය උල්ලංඝනය කරමින් සහ කාන්තාවන්ට අපරාධමය හිරිහැර සිදුකිරීමේ බරපතළ චෝදනා හතරක් ද කරපින්නා ගනිමිනි. මෙය හුදෙක් පුද්ගලික වැරැද්දක් පමණක් නොව, විදේශ රටකදී සමස්ත ශ්රී ලාංකික අනන්යතාවටම එල්ල කළ මරුපහරක් වැනිය.
සිංගප්පූරුවේ කාර්යබහුල වීදි සහ පොදු ප්රවාහන සේවාවන් තුළ සැරිසරමින් මොහොමඩ් අස්කාර් සිදුකර ඇති මෙම පිළිකුල්සහගත ක්රියාව නිරාවරණය වූයේ ඉතාමත් අහඹු ලෙසිනි. පසුව හෙළිවූ තොරතුරු අනුව, මොහු කාලයක සිටම දකින දකින තැන කාන්තාවන් රහසින් වීඩියෝ කිරීම සිය පුරුද්දක් කරගෙන තිබේ. විශේෂයෙන්ම එරට දුම්රිය ස්ථාන සහ සුපිරි වෙළෙඳසල් ආශ්රිතව සැරිසරමින්, තමන්ට හසුවන කාන්තාවන්ගේ රූපරාමු සහ ඔවුන්ගේ රහස්යභාවයට හානිවන අන්දමේ දර්ශන සිය ජංගම දුරකතනයෙන් පටිගත කිරීම මොහුගේ ප්රධාන විනෝදාංශය වී ඇත.
මොහුගේ මෙම ක්රියාව පිළිබඳ සැක සිතූ කිහිපදෙනකු එරට පොලිසිය දැනුවත් කිරීමත් සමග ක්රියාත්මක වූ බුද්ධි අංශ නිලධාරීන් ඉතා සූක්ෂ්ම ලෙස මොහොමඩ් අස්කාර්ව කොටුකර ගැනීමට සමත්ව තිබේ. ඔහු අත්අඩංගුවට ගන්නා අවස්ථාවේදී පවා ඔහුගේ දුරකතනය පරීක්ෂා කළ නිලධාරීන් මවිතයට පත්ව ඇත්තේ එහි තිබූ කාන්තාවන්ගේ වීඩියෝ දර්ශන විශාල ප්රමාණයක් දැකීමෙනි. එම දර්ශන බොහොමයක් කාන්තාවන් නොදැනුවත්ව පටිගත කරන ලද ඒවා වන අතර, ඇතැම් දර්ශන අපරාධමය හිරිහැර කිරීම් ගණයට වැටෙන තරම් සදාචාර විරෝධී බව වාර්තා වේ.
සිංගප්පූරු නීතියට අනුව පුද්ගල රහස්යභාවය සහ කාන්තා ගෞරවය කෙළෙසීම යනු වසර ගණනාවක සිරදඬුවම් සහ වේවැල් පහරවල් පවා හිමිවිය හැකි අතිශය බරපතළ වරදකි. මොහොමඩ් අස්කාර්ට එරෙහිව මේ වනවිටත් අපරාධමය හිරිහැර කිරීම් යටතේ චෝදනා හතරක් ගොනුකර ඇති අතර, විමර්ශන අවසානයේ මෙම චෝදනා සංඛ්යාව තවත් ඉහළ යාහැකි බව එරට මාධ්ය වාර්තා කරයි. මෙම සිදුවීම අන්තර්ජාලය පුරා වේගයෙන් පැතිර යාමත් සමග, ලොව පුරා වෙසෙන ශ්රී ලාංකිකයන් සිය දැඩි පිළිකුල පළකර සිටින්නේ මොහු වැනි පුද්ගලයන් නිසා විනයගරුකව රැකියාවන් කරන දහස් ගණනක් ලාංකිකයන්ට ජාත්යන්තරයේදී වැරදි ප්රතිරූපයක් මතු වන බැවිනි.
මෙම සිදුවීම ලාංකික අප සැමට දෙනු ලබන අනතුරු ඇඟවීම අතිශය ප්රබලය. විදේශ රටකට රැකියාවකට හෝ සංචාරයකට යන පුද්ගලයකු තමන් නියෝජනය කරන්නේ සිය ‘මව්බිම’ බව අමතක කර මෙවැනි විකෘති ආශාවන් පසුපස හඹා යෑමේ ප්රතිඵලය කෙතරම් භයානකද යන්න මොහොමඩ් අස්කාර්ගේ කතාවෙන් පැහැදිලි වේ. සිංගප්පූරුවේ දැඩි නීති පද්ධතිය හමුවේ ඔහුට හිමිවන දඬුවම කිනම් එකක් වුවද, ඔහු දැනටමත් ශ්රී ලංකාවේ නාමය ජාත්යන්තරය ඉදිරියේ පාවාදී හමාරය. කාන්තාවන් පාරේ තොටේ යනවිට ඔවුන්ගේ රහස්යභාවය සුරැකීමට බැඳී සිටින සමාජයක, මෙවැනි ‘කැමරා කල්ලතෝනියන්’ට හිමිවිය යුත්තේ නීතියේ උපරිම දඬුවම පමණක්ම බව නොකියාම බැරිය.
එස්.එම්.
