ඉරාන ආරක්ෂක ප්රධානී අලි ලැරිජානි ඝාතනයට ලක්ව ඇති බව රජය තහවුරු කර පැය 24ක් ගතවීමට මත්තෙන්, ඉරානයේ නව උත්තරීතර නායක මොජ්තබා ඛමේනි විසින් විශේෂ ප්රකාශයක් නිකුත් කර තිබේ.
ලැරිජානිගේ අභාවය පිළිබඳ පුවත තමන් “දැඩි කනගාටුවෙන්” යුතුව පිළිගත් බවත් ඔහු ඉරාන දේශපාලන තන්ත්රය තුළ සිටි “බුද්ධිමත්, කැපවූ සහ විශිෂ්ට” චරිතයක් ලෙස උත්තරීතර නායකයා එහිදී හඳුන්වා දී ඇත.
මෙවැනි ප්රමුඛ පෙළේ පුද්ගලයෙකු ඝාතනය කිරීමෙන් පෙනී යන්නේ ඉස්ලාමයේ සතුරන් ඔහු කෙරෙහි දක්වන දැඩි වෛරය සහ ඔහුගේ වැදගත්කම බව ඛමේනි සඳහන් කර ඇති බව විදෙස් මාධ්ය පවසයි.
ඉස්ලාමීය පද්ධතිය නමැති වෘක්ෂයේ පාමුල මෙලෙස ලේ වැගිරීමෙන් එම පද්ධතිය තවදුරටත් ශක්තිමත් වන බව ඔහු අවධාරණය කර ඇත..
“සෑම ලේ බිඳුවකටම මිලක් පවතින බවත්, මෙම ප්රාණ පරිත්යාගීන් ඝාතනය කළ අපරාධකරුවන්ට නුදුරේදීම ඒ සඳහා වන්දි ගෙවීමට සිදුවනු ඇති…” යනුවෙන් ඔහු දැඩි ලෙස ප්රකාශ කර ඇති බව සඳහන් වේ.
මේ අතර ඉරානයට අයත් දකුණු පාර්ස් (South Pars) ස්වභාවික වායු නිධියට එල්ල වූ ඊශ්රායල ප්රහාරයට ප්රතිප්රහාරයක් ලෙස, පර්සියානු ගල්ෆ් කලාපයේ පිහිටි තෙල් සහ ගෑස් මධ්යස්ථාන වෙත ප්රහාර එල්ල කරන බවට ඉරානය ප්රකාශ කර තිබෙනවා.Sri Lanka Latest News
ඉරානයේ තස්නිම් (Tasnim) පුවත් ඒජන්සියට අනුව, ඉදිරි පැය කිහිපය තුළ සෞදි අරාබිය, එක්සත් අරාබි එමීර් රාජ්යය සහ කටාර් රාජ්යයේ පිහිටි බලශක්ති මධ්යස්ථාන 5ක් ඉලක්ක කරන බවයි ඉරාන බලධාරීන් පවසා ඇත්තේ.
ඒ අනුව සෞදි අරාබියේ SAMREF පිරිපහදුව සහ ජුබයිල් (Jubail) රසායනික සංකීර්ණය, එක්සත් අරාබි එමීර් රාජ්යයේ අල් හොස්න් (Al Hosn) වායු නිධිය, කටාර් රාජ්යයේ රාස් ලෆාන් (Ras Laffan) පිරිපහදුව සහ මෙසායීඩ් (Mesaieed) රසායනික සංකීර්ණය වන බව සඳහන්.
ලොව විශාලතම ස්වභාවික වායු නිධිය ලෙස සැලකෙන දකුණු පාර්ස් නිධියට එල්ල වූ ප්රහාරයෙන් මධ්යස්ථාන කිහිපයකට හානි සිදුව ඇති නමුත් ජීවිත හානි වාර්තා වී නොමැති බව ඉරාන තෙල් අමාත්යාංශය පවසනවා.
ඊශ්රායල ගුවන් හමුදාව මෙම ප්රහාරය එල්ල කළ බවද විදේශ මාධ්ය තහවුරු කර තිබෙනවා.
මෙම තත්ත්වය හමුවේ කටාර් විදේශ අමාත්යාංශය ප්රකාශ කළේ, ඉරාන වායු නිධියට එල්ල වූ ප්රහාරය “භයානක සහ වගකීම් විරහිත පියවරක්” බවයි.
මූලාශ්ර | අල් ජසීරා
