ඉන්දියාව සහ එක්සත් රාජධානිය අතර විස්තීර්ණ ආර්ථික හා වෙළඳ ගිවිසුම (CETA) අත්සන් කිරීමට නියමිත බව විදෙස් මාධ්ය වාර්තා කරයි.Sri Lanka Latest News
එම මාධ්ය වාර්තා අනුව මෙම යෝජිත ඓතිහාසික ගිවිසුම මගින් ඉන්දියානු අපනයනවලට සහ එක්සත් රාජධානියේ නිෂ්පාදනවලට සැලකිය යුතු වාසි රැසක් හිමිවනු ඇතැයි අපේක්ෂා කෙරේ.
මෙම ගිවිසුම යටතේ, ඉන්දියානු අපනයනවලින් 99% කට පමණ තීරුබදු රහිත ප්රවේශයක් ඔස්සේ එක්සත් රාජධානියේ වෙළඳපොළට පිවිසීමට අවස්ථාව හිමිවේ. එසේම මේ ඔස්සේ වැඩි ශ්රමයක් වැයවෙන රෙදිපිළි සහ සම් ආශ්රිත නිෂ්පාදන සඳහා ඩොලර් බිලියන 23 ක පමණ නව අවස්ථා විවර කර දෙනු ඇතැයි ගණන් බලා ඇත.
ඒ හා සමානව, එක්සත් රාජධානියේ රජය විසින් නිකුත් කරන ලද තොරතුරු අනුව, බ්රිතාන්ය නිෂ්පාදන සඳහා ඉන්දියාව පනවන සාමාන්ය තීරු බදු 15% සිට 3% දක්වා සැලකිය යුතු ලෙස අඩු කිරීමට ද අපේක්ෂා කෙරේ. මෙම පියවර ඔස්සේ දිගුකාලීනව ඉන්දියාවට සිදුකෙරෙන එක්සත් රාජධානියේ අපනයන 60% ක පමණ වර්ධනයක් ඇති කරනු ඇතැයි අපේක්ෂා කරන අතර, එය අමතර ඩොලර් බිලියන 20 කට ආසන්න අගයක් වනු ඇති බව ගණන් බලා තිබේ.
මෙම ගිවිසුම, එක්සත් රාජධානිය යුරෝපා සංගමයෙන් ඉවත් වීමෙන් පසු අත්සන් කරන ලද විශාලතම වෙළඳ ගිවිසුම් අතරට එක්වීමට නියමිතය. එසේම දශකයකට වැඩි කාලයකට පසු ඉන්දියාව සංවර්ධිත රටක් සමඟ අත්සන් කරන ප්රථම ප්රධාන ද්විපාර්ශ්වික වෙළඳ ගිවිසුම ද මෙය වෙයි.
මෙමගින් ද්විපාර්ශ්වික වෙළඳාම වාර්ෂිකව ඩොලර් බිලියන 34 කින් පමණ ඉහළ යනු ඇතැයි අපේක්ෂා කරන අතර, 2030 වන විට එය ඩොලර් බිලියන 120 දක්වා දෙගුණ කිරීමට ඉලක්ක කර තිබේ. දෙරටේම රැකියා අවස්ථා දහස් ගණනක් නිර්මාණය වීමක්ද මේ ගිවිසුම ඔස්සේ අපේක්ෂා කෙරේ.
එසේම බ්රිතාන්ය විස්කි සඳහා දැනට ඉන්දියාවේ පවතින 150% ක අධික තීරු බද්ද මුලින් 75% දක්වාත්, වසර දහයක් තුළ 40% දක්වාත් අඩු කිරීමට නියමිතය. මෝටර් රථ සඳහා වන 100% ට වැඩි තීරු බදු කෝටා සීමාවන්ට යටත්ව 10% දක්වා අඩු වනු ඇති අතර, රූපලාවණ්ය, වෛද්ය උපකරණ, සිසිල් බීම සහ චොකලට් වැනි බ්රිතාන්ය නිෂ්පාදන ඉන්දියානු වෙළඳපොලේ වඩාත් ලාභදායී වනු ඇති බවද සඳහන් ය.
