ටිල්වින් සිල්වාගේ ඉන්දීය සංචාරය ගැන දේශපාලන අංශ තුළ ලොකු ආන්දෝලනයක් ඇතිවී තිබේ. ආන්දෝලනයට හේතුව 1987-88 කාලයේ ජවිපෙ ගෙනගිය දැඩි ඉන්දීය විරෝධී ප්රතිපත්තියයි. ඉන්දීය භාණ්ඩ වර්ජනය කරන ලෙසට ජවිපෙ ඒ කාලයේ විශාල කැම්පේන් එකක් දියත් කළ අතර, ඉන්දීය භාණ්ඩ ගන්නා අයව මරණ බවට තර්ජනය කළේය. 1989 සැප්තැම්බර් 12 රාජ්ය ඖෂධ නීතිගත සංස්ථාවේ සභාපතිනි වෛද්ය ග්ලැඩිස් ජයවර්ධනව ජවිපෙ විසින් ඝාතනය කළේ ඉන්දීය බෙහෙත් ද්රව්ය ආනයනය කරන්න අනුමැතිය දුන් බවට චෝදනා කරමින්ය. එසේම ඉන්දීය භාණ්ඩ ආනයනය කළ ඉන්දීය ව්යාපාරිකයන්ද ජවිපෙ විසින් ඝාතනය කරනු ලැබීය.
එහෙත් එවැනි දැඩි ඉන්දීය විරෝධී ස්ථාවරයක සිටි ජවිපෙ හිටපු නායක සෝමවංශ අමරසිංහ ජීවිතය බේරාගත්තේ ඉන්දියාවේ උදව්වෙන් බව ඉන්දියන් ඉන්ටර්වෙන්ෂන් ඉන් ශ්රී ලංකා නම් පොතෙහි සඳහන් වේ. ඉන්දියාව හරහා යුරෝපයට පැනගිය සෝමවංශ 2001 යළි ලංකාවට පැමිණ කළ කතාවේදී ඉන්දියාවේ හිටපු අගමැති වී.පී. සිංග්ට ස්තුති කළේ ඉන්දීය ආණ්ඩුව තමන්ගේ ජීවිතය බේරා දුන්නා කියමින්ය.
ඉන්දියාව ජවිපෙ සමග යළි සබඳකම් පටන් ගත්තේ සෝමවංශ අමරසිංහ ලංකාවට පැමිණ 2004 එවක ජනාධිපතිනි චන්ද්රිකා සමග සන්ධානයකට එක්වීමෙන් පසුවය. එකල ලංකාවේ ඉන්දීය මහකොමසාරිස් නිරූපන් සෙන් ජවිපෙ නායකයන් සමග සමීප සම්බන්ධයක් පටන්ගත් පළමු මෙරට මහ කොමසාරිස්වරයාය. ඉන් පසු ජවිපෙ සහ ඉන්දියාව අතර යහපත් සබඳතා තිබිණි. ජවිපෙ ඉන්දීය එට්කා ගිවිසුමට, ත්රිකුණාමල තෙල් ටැංකි ඉන්දියාවට පැවරීමට, කොළඹ වරායේ නැගෙනහිර පර්යන්තය ඉන්දියාවට පැවරීමට, අදානිගේ විදුලි ව්යාපෘතියට, අමුල්-මිල්කෝ ගිවිසුමට එරෙහිව ජනතා උද්ඝෝෂණ දියත් කළත් ජවිපෙ නායක අනුර සහ විජිත හේරත් ඉන්දියාව සමග සමීප සබඳතා පවත්වාගෙන ගියේය. අනුර සහ විජිත ඉන්දියාව සමග සමීප සබඳතා පවත්වාගෙන ගියේ ටිල්වින් නොදැනුවත්ව නොවේ. ටිල්වින් දැනුවත්වය. ටිල්වින්ගේ ඉන්දීය සංචාරය සැලසුම් කරන්න ඇත්තේත් අනුර සහ විජිත විය හැකිය.
බැලූ බැල්මට ටිල්වින්ගේ ඉන්දීය සංචාරය ඉන්දියාවට වාසිසහගත තත්ත්වයක් පෙනුණි. දේශපාලන විචාරකයන් එය දුටුවේ ටිල්වින්ගේ යූ ටර්න් එකක් ලෙසය. එහෙත් ටිල්වින් ලංකාවට පැමිණි විගස කීවේ හිටපු ජනාධිපති රනිල් අස්සන් කළ අමුල්-මිල්කෝ බදු දීමේ ගිවිසුම තම රජය අහෝසි කළ බව කීවේය. ඒ වගේම පළාත් සභා ඡන්දය හෝ පළාත් සභා ගැන වචනයක්වත් ඉන්දීය විදේශ ඇමැති හමුවූ විට තමා සමග කතා නොකළ බව ඔහු කීවේය. එහෙත් ටිල්වින්ගේ ඉන්දීය සංචාරයට පසුව ආණ්ඩුව පළාත් සභා කඩිනමින් පවත්වන්න පාර්ලිමේන්තු තේරීම් කමිටුවක් පත්කළේය. ටිල්වින් සිය සම්මුඛ සාකච්ඡාවලින් පෙන්වන්න යන්නේ තම ඉන්දීය සංචාරයෙන් ඉන්දියාව සම්බන්ධ තම ස්ථාවරය වෙනස් නොවූ බවය. මෙහි ඇත්ත නැත්ත ඉදිරියේදී දැකබලාගත හැකි වනු ඇත.
