ජනතා කැමැත්තෙන් තොරව පස්සා දොරෙන් තනතුරට ආ වත්මන් නායකයා ජනතාවට යුක්තිය ඉටු කරනු ඇතැයි විශ්වාස කළ නොහැකි බව මැල්කම් කාදිනල් රංජිත් කොළඹ අගරදගුරු හිමි පවසනවා.
පීඩාවට පත්ව සිටින ජනතාවගේ ප්රශ්නවලට විසඳුම් සෙවීම වෙනුවට රටේ සෙසු දේශපාලන නායකයන් ද එකිනෙකා ඇනකොටාගනිමින් බලය වෙනුවෙන් කටයුතු කරන බව කාදිනල් හිමි සඳහන් කරන්නේ.
එළඹෙන නත්තල බොරු ආටෝපවලින් තොර ගවලෙනේ නත්තලක් බවට පත්කරගෙන දුගී දුප්පත් ජනතාවට උපකාර කරන්නැයි තමන් සියලු කිතුණු බැතිමතුන්ගෙන් සහ දේවස්ථානවලින් ඉල්ලීමක් කරන බවයි උන්වහන්සේ කියන්නේ.
2019 අප්රේල් 21 වැනිදා ප්රහාරයෙන් දිවි අහිමි වූවන්ට මෙතෙක් සාධාරණයක් ඉටුවී නැතැයි පවසන උන්වහන්සේ අපරාධ පරීක්ෂණ දෙපාර්තමේන්තුව, පොලීසිය, හා නීතිපති දෙපාර්තමේන්තුව කයිවාරු ගැසුවත් මේ සම්බන්ධයෙන් කිසිවක් කර නැතැයි ද පවසනවා.
එම විනාශයෙන් පසු හිටපු ජනාධිපතිවරයා පත්කළ උසස් නිලධාරීන් තිදෙනකුගෙන් යුත් කමිටුව, වත්මන් ජනාධිපතිවරයා අගමැති ලෙස සිටියදී පත් කළ පාර්ලිමේන්තු තේරීම් කාරක සභාව මෙන්ම හිටපු ජනාධිපතිවරයා පත්කළ ජනාධිපති කොමිෂන් සභාවෙන් ආ නිර්දේශවලින් කිසිවක් ක්රියාත්මක වී නැතැයි උන්වහන්සේ පවසනවා.
මැල්කම් කාදිනල් රංජිත් කොළඹ අගරදගුරු හිමි කියන්නේ දෙවියන් වහන්සේගේ විනිශ්චය ගැන විශ්වාසය තැබීම හැර කළ හැකි දෙයක් නැති බවයි.
පවතින ක්රමය වෙනස් කිරීමට නැගී සිටින ලෙස අති උතුම් මැල්කම් රන්ජිත් කාදිනල් හිමි තරුණයන්ගෙන් ඉල්ලා සිටිනවා.
රට යහපත් අතට ගැනීම තරුණයන්ගේ වගකීම බව සිහිපත් කර ඇති කාදිනල් හිමි ඒ වගකීම ඉටු කිරීම සදහා තරුණයන් නැගී සිටිය යුතු බවත් ඊට සෙසු සියලු ප්රජාවන්ගේ සහාය හිමිවිය යුතු බවත් අවධාරණය කරනවා.
අයුක්තියට සහ අසාධාරණයට එරෙහිව නැගී සිටි තරුණයන් සිරකදවුරුවල හෝ උසාවිවල සිටින බව තමන් දන්නා බව පවසන කාදිනල් හිමි එය කිසිසේත්ම ප්රජාතන්ත්රවාදී නොවන බව සඳහන් කරනවා.
අරගල කළ තරුණ තරුණයන් පසුගිය කාලය තුළ වීදි බැස්සේ පවතින ක්රමය වෙනස් කරන ලෙස ඉල්ලමින් බවයි උන්වහන්සේ පවසන්නේ.
තරුණයන්ගේ එම ඉල්ලීම ඉතාම සාධාරණ බැවින් සියළු වාද බේද පසෙක ලා අලුත් ශ්රී ලංකාවක් බිහිකිරීම සදහා එක්වන ලෙස කාදිනල් හිමි කියා සිටිනවා.
