අප රට පිටපිටම ඛේදවාචක හතරකට මුහුණ දී ඇති මොහොතක රටත් ජනතාවත් බරපතල අභියෝග රැසකට මුහුණ දෙන බවත් රටක් ලෙස අමාරු තැනක සිටියත් නිවැරදි දේ කල යුතු බවත් සැම දෙමාපියකුගේම අපේක්ෂාව වන්නේ දරු සම්පත ආරක්ෂා කර නිසි රැකවරණය මාර්ගෝපදේශකත්වය නිවැරදි ගති පැවතුම් සහිත ශීලාචාර ශිෂ්ටසම්පන්න විශිෂ්ට පුරවැසියකු බවට පත් කරන්න කටයුතු කළත් අද රට යන දිශාව දෙස බලන විට මේ කරන දේවල් තුළ සදාචාර ශිෂ්ටසම්පන්න උගත් බුද්ධිමත් දරු පරපුරක් නිර්මාණය කරන්න අවශ්ය පසුබිම සකස් වෙනවාද කියා ගැටලුවක් ඇති බවත් විපක්ෂ නායක සජිත් ප්රේමදාස මහතා පැවසීය.Sri Lanka Latest News
විපක්ෂ නායක සජිත් ප්රේමදාස මහතා මේ බව කියා සිටියේ තෝරගල ශ්රී සුධර්මාරාම පුරාණ විහාරයේ පැවැති ජන හමුවක් අමතමිනි.
ආගම දහමට ලැබෙන මුල් තැන නැති බවත් සුචරිතවත් ශීලාචාර ශීෂ්ටසම්පන්න ජන සමාජයක් ගොඩනගන්න ලෝකය ජයගත හැකි සුහුරු දරු පරපුරක් නිර්මාණය කරන්න අවශ්ය අධ්යාපන ක්රමය විකෘති වී ප්රකෘතිය වෙනුවට විකෘතියත් නිවැරදි දේ වෙනුවට වැරදි දේත් සමත්භාවය වෙනුවට අසමත් භාවයත් ඉස්මතු වී ඇති බවත් විපක්ෂ නායකවරයා පැවසීය.
අධ්යාපන ප්රතිසංස්කරණ තුළ ගණිතය විද්යාව තාක්ෂණය ඉංග්රීසි කලා ඉංජිනේරු වෛද්ය රොබෝ තාක්ෂණය කෘත්රීම බුද්ධිය සේම ඉංග්රීසි භාෂා ඇතුළු ජාත්යන්තර භාෂා අධ්යාපනයට මුල් තැන දී ඉතිහාසය ද අනිවාර්ය විෂයක් වියයුතු බවත් විපක්ෂ නායකවරයා වැඩිදුරටත් පැවසීය.
සැබැ දේශප්රේමය යනු සිංහල පමණයි කිය කියා යාම නොව ඉංග්රීසි භාෂා අධ්යාපනය සැමට ලබා දි ලෝකය ජය ගැනිමට යැවිම බවත් මේ නිසා සමගි ජන බලවේගය සක්වළ සුහුරු පන්ති කාමර වැඩසටහන ක්රියාත්මක කළත් මුදලට වෛරය වපුරණ අය ලබා මේ වැඩසටහන විවේචනය කළ බවත් එදා smart board දෙන විට විහිලු කරමින් මඩ ගැසු අය අද අධ්යාපන ක්රමයට අසභ්ය වෙබ් අඩවි ඇතුලත් කර ඇති බවත් විපක්ෂ නායකවරයා පැවසීය.
එදා අධ්යාපනයට අගයක් එක්කරද්දි විවේචනය අපහාසය කළ අය අද අධ්යාපනයට අසභ්ය දේවල් එක් කරන බවත් මේ ක්රමයේ වෙනසක් කරනවා කියා බලයට පැමිණි වත්මන් රජයට දැන්වත් නොරැවටෙන ලෙසත් 2019ත් 2024 රැවටුන නිසා තවදුරටත් මොවුන්ට නොරැවටෙන ලෙසත් දේශපාලනය පසෙකලා දරුවන් ගැන සිතන ලෙසත් විපක්ෂ නායක සජිත් ප්රේමදාස මහතා පැවසීය.
අසභ්යකරණය යනු ජනතාව දෙමාපියන් මහා සංඝරත්නය අපේක්ෂා කරන ක්රමයේ වෙනස නොවන බවත් දරුවන්ට සුහුරු මෙවලම් පවා දිය යුත්තෙ ද ආරක්ෂක ක්රමවේද අනුව යමිනි බවත් විපක්ෂ නායකවරයා වැඩිදුරටත් පැවසීය.
