Qin Boyong උප සභාපති Chinese People’s Political Consultative Conference ලංකාවට ආවේ අනුර කුමාර ඉන්දියාවේ සංචාරය කරද්දීය. ඇය අනුර ඉන්දියාවේ සිටි කාලයේ ආණ්ඩුවේ ඇමැතිවරු හමුවෙමින් ඇස ගසාගෙන සිටින්නට ඇත්තේ අනුරගේ ඉන්දියානු සංචාරය දෙසය. අනුර ඉන්දියාවේ සිටියදීම අනුරගේ උපන් ගම වන අනුරාධපුර තඹුත්තේගම චීන ආධාර ව්යාපෘතියක උත්සවයකදී වෙළෙඳ ඇමැති වසන්ත සමරසිංහ කීවේ ශ්රී ලංකාව සහ අනෙක් රටවල් අතර සබඳතා රාජ්ය දෙකක් අතර සබඳතාවක් වුවත් ජවිපෙත් චීනයත් අතර සබඳතා පක්ෂ දෙකක් අතර සබඳතා බවය. ජවිපෙත් චීනයත් අතර සබඳතාව ජවිපෙ වෙන කිසිදු රටක් සමග නැති බවත් එය ඓතිහාසික සබඳතාවක් බවත් ඔහු කීවේය. අනුර ඉන්දියාවේ සිටියදී අනුරගේ වෙළෙඳ ඇමැති අනුර ඉපදුණු ගමේ චීන නියෝජිතයන් ඉදිරිපිට මේ කතාව කීම අසාමාන්ය සිද්ධියකි. අනුර ඉන්දියාවේ සිට ආ විගස Qin Boyong අනුර හමුවිය. එම හමුවෙන් පසු නිකුත් කළ නිවේදනයේ දැක්වෙන්නේ ලංකාවේ තහනම් කොට තිබූ මැරිටයිම් පර්යේෂණ යළි ආරම්භ කිරීමට චීනය බලාපොරොත්තුවෙන් සිටිනා බවය. මෙම නිවේදනයට පසු කැබිනට් ප්රකාශක ඇමැති නලින්ද ජයතිස්ස මාධ්ය සාකච්ඡාවක් පවත්වා කීවේ චීන පර්යේෂණවලට පනවා තිබූ තහනම රිලැක්ස් කරන බවය. නලින්දගේ එම ප්රකාශයට පසු ඇමෙරිකානු තානාපතිනි ජූලි චන්ග් මහජන ආරක්ෂක ඇමැති හමුවිය. ඒ හමුව සිදුවූයේ Qin Boyong ගේ නිවේදනයට පසුවය. ඉන් පසු විදේශ ඇමැති විජිත හේරත් මාධ්ය සාකච්ඡාවක් පවත්වා කීවේ පර්යේෂණ නැව් තහනම ඉවත් කර නැති බවය. ස්ටෑන්ඩර්ඩ් ඔපරේටින් ප්රොසීඩියර් එකක් හැදීමෙන් පසු එය ඉවත් කරන බව ඔහු කීවේය. ආරක්ෂක ලේකම්වරයාද කීවේ තවම විදේශ පර්යේෂණ නැව්වලට අවසර දීමට ආණ්ඩුව තීරණය කර නැති බවය. (Sri Lanka Latest News)
මෙයින් පැහැදිලි වන්නේ ආණ්ඩුව මුලින් චීන පර්යේෂණ නැව්වලට අවසර දී පසුව එය වෙනස් කරන බවය. සමහර විට අනුරගේ චීන සංචාරයට පෙර තහනම ඉවත් කරවා ගැනීමට චීනයට ඕනෑකම තිබෙන්න ඇත. දැන් චීනය දැඩි අපහසුතාවකට පත්ව සිටී. ඉන්දියාව චීනයට ලද පළමු අවස්ථාවේම තම ශක්තිය පෙන්වමින් සිටී.
නමුත් චීනයට මෙන්ම ඉන්දියාවටද මේ ආණ්ඩුව කියන්නේ කුමක්ද, කරන්නේ කුමක්ද යන්න ගැන පැහැදිලි චිත්රයක් ගැනීම ලෙහෙසි නැත. මේ ආණ්ඩුව බලයට ඒමට පෙර කී දේ සහ දැන් කරන දේ අතර ලොකු පරස්පරයක් ඇත. ඔවුන් කී දේවල් ඔවුන්ම දැන් ප්රතික්ෂේප කරයි. චීනය හෝ ඉන්දියාවට මෙවැනි ආණ්ඩුවක් විශ්වාස කර තීරණ ගැනීම ලෙහෙසි නැත.
ඉන්දීය සංචාරයෙන් පසු ආණ්ඩුවේ ඇමැතිවරු ඉන්දියාව සමග ඒකාබද්ධ නිවේදනයේ සඳහන් බොහෝ දේට එකඟ නොවූ බවට ඇමැතිවරු විවිධ ප්රකාශ කරයි. රාජ්යතාන්ත්රික අත්දැකීම් නැති ආණ්ඩුවක් සමග ගනුදෙනු කරන්නේ කෙසේද යන්න මෙය ඉන්දියාවට මෙන්ම චීනයටත් හොඳ පුහුණුවකි.
