බුද්ධශාසන, ආගමික සහ සංස්කෘතික කටයුතු අමාත්යාංශය යටතේ මෙරට ජාතික උරුමයන් හඳුනා ගැනීම, සංරක්ෂණය කිරීම සහ අනාගත පරපුරට දායාද කිරීමේ අරමුණින් ප්රථම වරට ජාතික නාමල් උයන ‘ශ්රී ලංකාවේ ජාතික උරුමයක්’ ලෙස ප්රකාශයට පත් කිරීම සහ ජාතික නාමල් උයන හඳුන්වාදී වසර 35ක් පිරිම සැමරීම ජනාධිපති අනුර කුමාර දිසානායක මහතාගේ ප්රධානත්වයෙන් ජනාධිපති කාර්යාලයේදී සිදු විය.Sri Lanka Latest News
අනුරාධපුර දිස්ත්රික්කයේ පලාගල ප්රාදේශීය ලේකම් කොට්ඨාසයට අයත් හෙක්ටයාර 602ක් පුරා විහිදුණු ජාතික නාමල් උයන ජාතික, ආගමික, පාරිසරික සහ භූගෝලීය වටිනාකම් රැසක් එක්වී ඇති අද්විතීය ස්ථානයකි. එහි නිර්මාතෘ පූජ්ය වනවාසී රාහුල හිමියන්ගේ ඉල්ලීම මත, බුද්ධශාසන, ආගමික සහ සංස්කෘතික කටයුතු අමාත්යාංශයේ මැදිහත්වීමෙන් ජාතික නාමල් උයන ශ්රී ලංකාවේ ජාතික උරුමයක් ලෙස නිල වශයෙන් ප්රකාශයට පත් කිරීම සනිටුහන් කරමින් සමරු ඵලකය නිරාවරණය කිරීම මාර්ගගත තාක්ෂණය ඔස්සේ මෙහිදී ජනාධිපතිවරයා අතින් සිදු කෙරිණි.
මෙහිදී අදහස් දැක් වූ ජනාධිපති අනුර කුමාර දිසානායක මහතා සඳහන් කළේ මෙම සුවිශේෂී පරිසර උරුමය සුරක්ෂිත කරමින් මතු පරපුර වෙත දායාද කිරීමේ ජාතික වගකීම සියලුදෙනා වෙත පැවරී ඇති බවයි.
එදා මෙදා තුර ජාතික නාමල් උයන ආරක්ෂා කර ගනිමින් එය සංවර්ධනය කිරීමට පූජ්ය වනවාසී රාහුල හිමියන් විසින් සිදු කරනු ලබන කැපවීම මෙහිදී ජනාධිපතිවරයා කෘතවේදීව අගය කළේය.
ජාතික නාමල් උයන 35 වන සංවත්සරය වෙනුවෙන් ශ්රී ලංකා තැපැල් දෙපාර්තමේන්තුව විසින් නිකුත් කරන ලද මුල් දින කවරයද, ‘ජාතික නාමල් උයන ශාස්ත්රීය සංග්රහයද’ පුජ්ය වනවාසී රාහුල හිමියන් විසින් මෙහිදී ජනාධිපතිවරයා වෙත පිළිගන්වන ලදී.
මෙහිදී විශේෂ අනුශාසනාවක් සිදු කළ ජාතික නාමල් උයන නිර්මාතෘ පූජ්ය වනවාසී රාහුල හිමියන් සඳහන් කළේ මෙම අවස්ථාව වත්මන් රජය ඉටු කළ විශිෂ්ටතම පාරිසරික සේවාව ලෙස ඉතිහාසයට එක්වන බවයි.
මෙම වැඩසටහන හෙට (27) ජාතික නාමල් උයන පරිශ්රයේදී පැවැත්වීමට නියමිතව තිබුණද රට තුළ උද්ගතව ඇති තත්ත්වය හමුවේ එය ජනාධිපති කාර්යාලයේදී සිදු කිරීමට ජනාධිපතිවරයා ගත් තීරණය ඉතා අගය කරන බවද උන්වහන්සේ පෙන්වා දුන්හ.
රට ගොඩනැඟීමට ජනාධිපති අනුර කුමාර දිසානායක මහතා තුළ ඇති වුවමනාව මේ රටේ ජනතාවද පිළිගෙන ඇති බව පෙන්වා දුන් උන්වහන්සේ සියලුදෙනා ඒකරාශී කර ගනිමින් මේ වන විට රට හමුවේ මතුව ඇති අභියෝගයට විසඳුම් සෙවිය යුතු බවද පෙන්වා දුන්හ.
මෙහිදී වැඩිදුරටත් අදහස් දැක් වු ජාතික නාමල් උයන නිර්මාතෘ පූජ්ය වනවාසී රාහුල
හිමිපාණන් වහන්සේ
1991 මාර්තු මස 28වන දා මම ජාතික නාමල් උයන කියන සුන්දර වනස්පතියට ගොස් ඉතා දුෂ්කර ජීවිතයක් ගත කරමින් විශාල කැපකිරීමකින් යුතුව කටයුතු කළා. ප්රදේශයේ හාමුදුරුවරු සහ ජනතාව මට විවිධ චෝදනා එල්ල කරමින් අපහාස කළා. මට විරුද්ධව පත්තර පිටු ගණන් ලිව්වා. නමුත් මම සැලුණේ නැහැ.
හැබැයි චන්ද්රිකා කුමාරතුංග මැතිනියගේ සමයේ බර්ට් ප්රේමලාල් දිසානායක මහත්තයා මට උදව් කළා. අද විදුලිය ලැබිලා තිබෙන්නේ එතුමා නිසා. ඒ වගේම චන්ද්රිකා මැතිනියගෙන් පසු බලයට පත්වූ සියලු ජනාධිපතිවරුන්ගෙන් මට උදව් ලැබුණා. මම ඒ කිසිවෙකුගෙන් කිසි දෙයක් ඉල්ලලා නැහැ. හැබැයි මට ඕන තැනකට යන්න දොරවල් විවෘත වෙලා තිබෙනවා. මොකද මම කාටවත් වැරදි කරන්නේ නැහැ.
අද ඔබතුමාගේ සේවා කාලය තුළ ජාතික නාමල් උයන පිහිටි ප්රදේශයේ මාර්ග හොඳින් සංවර්ධනය කර තිබෙනවා.ඒ පිළිබඳ සියලුදෙනාට මම පිං දෙනවා. ඒ වගේම ජාතික නාමල් උයන ශ්රි ලංකාවේ ජාතික උරුමයක් බවට පත් කිරිමට කැපවීමෙන් කටයුතු කළ වෛද්ය නලින්ද ජයතිස්ස ඇමතිතුමාට සහ නියෝජ්ය අමාත්ය ගමගෙදර දිසානායක මහත්තයාට මම කෘතවේදීත්වය පිරිනමනවා. ඒ වගේම රෝෂන් ගමගේ මහත්තයා ඇතුළු නිලධාරින් එම කටයුතු හොඳින් කළමනාකරණය කර දුන්නා. එමෙන්ම මෙම කටයුත්ත සඳහා විද්යුත් සහ මුද්රිත මාධ්ය පුළුල් ප්රචාරණ දායකත්වයක් ලබා දුන්නා. එය මම ඉතා අගය කරනවා.
මේ ජාතික නාමල් උයන මගේ දේපොළක් නෙවෙයි. මම මෙහි මුරකාරයෙක් පමණයි. ඒ නිසා මගෙන් පසුව මෙය මධ්යම සංස්කෘතික අරමුදලට භාර දීමට මම කල්පනා කළා. එම වැඩකටයුතු හොඳින් කරගෙන යනවා. ඒ වගේම මෙම ස්ථානය ගංගාරාමයට සම්බන්ධ කර ජනාධිපති ලේකම්තුමා, වන සංරක්ෂණ අමාත්යාංශයේ ලේකම්තුමා, බුද්ධශාසන අමාත්යාංශයේ ලේකම්තුමා ආදී නිලයන් මට්ටමින් මෙම කටයුතු ඉදිරියට පවත්වාගෙන යාමට මම කල්පනා කළා. නැත්නම් මම නැති කාලයක මෙය විනාශ විය හැකියි.
මම මේ රට වෙනුවෙන් යමක් කළා. මම මේ රටට, ජාතියට ණය නැහැ. මගෙන් ඉටුවිය යුතු උපරිම කාර්යභාරය වන්නේ මෙහි සුරක්ෂිතතාව සහතික කර දීමයි. අනුරාධපුර දිස්ත්රික්කයේ අල්ලපු ගමේ ජන්මලාභය ලැබූ කෙනෙක් ලෙස අද ඔබතුමා අතින් මෙය ජාතික උරුමයක් ලෙස ප්රකාශයට පත් කිරිමට ලැබිම ගැන මම ඉතාමත් සතුටු වෙනවා.
ඒ වගේම පලාගල ප්රදේශීය ලේකම් කොට්ඨාසයේ පාසල් දෙකක් සහ රෝහල් දෙකක් තිබෙනවා. එම අහිංසක ජනතාව වෙනුවෙන් එම එක් පාසලක් සහ රෝහලක් අංග සම්පූර්ණ පාසලක් සහ රෝහලක් ලෙස පරිවර්තනය කර දෙන්න කියා මම ඔබතුමාගෙන් ගෞරවයෙන් ඉල්ලා සිටිනවා.
සෞඛ්ය සහ ජනමාධ්ය අමාත්ය වෛද්ය නලින්ද ජයතිස්ස, බුද්ධශාසන, ආගමික හා සංස්කෘතික කටයුතු නියෝජ්ය අමාත්ය ගමගෙදර දිසානායක, ජනාධිපති ලේකම් ආචාර්ය නන්දික සනත් කුමානායක, බුද්ධශාසන, ආගමික සහ සංස්කෘතික කටයුතු අමාත්යාංශයේ ලේකම් ප්රින්ස් සේනාධීර, පරිසර අමාත්යාංශයේ ලේකම් කේ.ආර්. උඩුවාවල, ජනාධිපති ජ්යෙෂ්ඨ අතිරේක ලේකම් රෝෂන් ගමගේ, පුරාවිද්යා අධ්යක්ෂ ජනරාල් ඊ.ඒ. සෙනරත් වික්රමසිංහ, මධ්යම සංස්කෘතික අරමුදලේ අධ්යක්ෂ ජනරාල් ආචාර්ය නිලාන් කුරේ, තැපැල්පති එස්.ආර්.ඩබ්ලිව්.එම්.ආර්.පී. සත්කුමාර යන මහත්වරු අතුළු පිරිසක් මෙම අවස්ථාවට එක්ව සිටියහ.
ජනාධිපති මාධ්ය අංශය
2026-03-26
