ජනාධිපති අනුර කුමාර දිසානායක මහතා මේ වනවිට ඉන්දියාවේ නවදිල්ලි හි ‘AI IMPACT SUMMIT 2026’ සමුළුවට සමගාමිව පැවැත්වෙන රාජ්ය නායක සැසියට සහභාගී වී තිබේ.Sri Lanka Latest News
මෙහිදී රාජ්ය නායකයින් ඇමතූ ජනාධිපතිවරයා වැඩිදුරටත් පවසා සිටියේ, ‘කිසිවෙකු අත්නොහැරෙන සේ, ආචාර්යධර්ම මුලික කරගත් කෘතිම බුද්ධිය පිළිබඳව පොදු වටිනාකම් බෙදාගනිමින් අනෝන්ය වශයෙන් ඉගෙන ගැනීමට සහ හවුල් වී ඉදිරියට යෑමට ශ්රී ලංකාව සුදානම් බවය.
වැඩිදුරටත් අදහස් දැක්වු ජනාධිපතිවරයා,
“අපි විශ්වාසයෙන් හා නොපැකිළිව ක්රියාකළ යුතු මොහොතක් එළඹිලා තියෙනවා…
මානව සංහතියේ සංස්කෘතික වටිනාකම් සහ හැකියාවන් ප්රවර්ධනයට AI තාක්ෂණය යොදා ගත යුතුයි. කිසිදු රටකට AI සඳහා සුදානම් අනාගතයක් තනිව ගොඩනඟා ගත නොහැකිය…
කිසිවෙකු අත්නොහැරෙන සේ,ආචාරධර්ම මුලික කරගත් කෘතිම බුද්ධිය පිළිබඳව පොදු වටිනාකම් බෙදාගනිමින් අනෝන්ය වශයෙන් ඉගෙන ගැනීමට සහ හවුල් වී ඉදිරියට යෑමට ශ්රී ලංකාව සුදානම්…”
“කෘත්රිම බුද්ධිය විසින් ආර්ථිකයන්,රාජ්ය පාලන පද්ධති සහ සමාජයන් වෙනස් කරමින් පවතින මේ සුවිශේෂී මොහොතේ නවදිල්ලියේදී ඔබත් සමඟ එක්වීමට ලැබීම මට මහත් ගෞරවයක්. AI තාක්ෂණය පසුගිය සියවස්වල කාර්මීකරණය විසින් ඇති කළ ආකාරයටම ජාතික වර්ධන ගමන් මඟ කෙරෙහි දැවැන්ත බලපෑමක් ඇති කරන පරිවර්තනීය බලවේගයක්.
නමුත් AI තාක්ෂණයෙන් සවිමත් රටවල් සහ එවැනි හැකියාවක් නොමැති රටවල් අතර වැඩිවෙමින් පවතින පරතරය බොහෝ රටවල ඩිජිටල් ආර්ථිකයේ වියුක්ත කිරීමේ බරපතළ අවදානම නිර්මාණය කරනවා.මේ ආකාරයට පසුබසින රටවල් ගෝලීය වර්ධනය සහ නව්ය ආර්ථික අවස්ථාවලින් තවදුරටත් විවිධ අතුරු බලපෑම්වලට ලක්විය හැකියි. එමඟින් අපි අපේක්ෂා කරන සියලුදෙනා ඇතුළත් සාධාරණ සහ තිරසාර සංවර්ධන අරමුණුද අවදානමට ලක්වෙනවා.
බොහෝ නැඟී එන ආර්ථිකයන් මෙන්ම ශ්රී ලංකාවත් AI තාක්ෂණය සම්පූර්ණ ලෙස භාවිතා කිරීමට අවශ්ය යටිතල පහසුකම් තවමත් සම්පූර්ණ කරගෙන නැහැ. ඒ නිසා නිසි අභිප්රායක් සහ දැක්මක් සමඟින් අප විශ්වාසයෙන් හා නොපැකිළිව ක්රියා කළ යුතු තීරණාත්මක් මොහොතක් එළැඹ තිබෙනවා.
තාක්ෂණික දැනුමෙන් සන්නද්ධ තරුණ මානව සම්පතක් ශ්රී ලංකාව සතුව තිබෙනවා.එමෙන්ම අපිට ශක්තිමත් නීති පද්ධතියක් සහ ජාත්යන්තර හවුල්කාරිත්වයන් සමඟ බැඳුණු ආර්ථික සංස්කෘතියක්ද තිබෙනවා. අපි පෞද්ගලික දත්ත ආරක්ෂණය සහ සයිබර් ආරක්ෂණය පිළිබඳ නීතිමය රාමු නවීකරණය කරමින් ඩිජිටල් පොදු යටිතල පහසුකම් සඳහා අඛණ්ඩව ආයෝජනය කරමින් නවෝත්පාදන දිරිමත් කරන මහජන විශ්වාසය රැකගත හැකි ආයතන ශක්තිමත් කරමින් සිටිනවා.
ලෝකයාද AI තාක්ෂණයේ අභිප්රායන්, අයිතිවාසිකම් සහ ආරක්ෂාව පිළිබඳ විවාද කරමින් සිටිනවා. එහෙත් මෙහිදී මෙතෙක් මඟහැරී ගිය තීරණාත්මක පැතිකඩක් පෙන්වා දීමට කැමතියි. එනම් සංස්කෘතික ගැලපීමයි. මානව සංහතියේ සංස්කෘතික වටිනාකම් සහ හැකියාවන් තවදුරටත් ප්රවර්ධනයට මේ තාක්ෂණයන් ඉවහල් කරගත යුතුයි. ලෝක මට්ටමේ AI තාක්ෂණය භාෂා හා මතවාදයන් කිහිපයකට පමණක් සීමා වුවහොත් අපේ අනන්ය වු සංස්කෘතික විවිධත්වය ගිලිහී යාමේ අවදානමක් පවතිනවා.
ශ්රී ලංකාව, ඉන්දියාව වැනි රටවලට තම භාෂාව සහ සංස්කෘතිය යනු ගෞරවය මෙන්ම විශ්වාසයේ පදනමයි. මෙවැනි සංස්කෘතික ගැලපීමක් සාක්ෂාත් කරගැනීම සඳහා පුළුල් අන්තර්ග්රහණය සහ සංරක්ෂණය සිදුවීම අවශ්යයි. මෙහිදී අපගේ දේශීය භාෂා සහ සංස්කෘතික දැනුම ඩිජිටල්කරණය කර ඒවා කෘත්රි බුද්ධිය පද්ධති තුළට බද්ධ කළ යුතුයි. එමෙන්ම ආරක්ෂාව සහ සුරක්ෂිතතාව පිළිබඳ උපරිම අවධානය යොමු වීම වැදගත්. අපේ සංස්කෘතික වටිනාකම්වලට AI මඟින් සිදුවන අහිතකර බලපෑම්වලින් ආරක්ෂාවීමේ පද්ධති ස්ථාපිත කළ යුතු වෙනවා.
අපගේ දැක්ම හුදකලා සාර්ථකත්වයක් අත්පත් කර ගැනීම නොවෙයි. ඒකාබද්ධ වීමයි. AI යටිතල පහසුකම් අපි දකින්නේ ආර්ථික සහ සංස්කෘතික සහයෝගීතාවයේ ඊළග මායිම ලෙසයි. ඒ නිසා ශ්රී ලංකාව කලාපීය සහයෝගීතාවක් යෝජනා කරනවා. එහිදී එය අඩු වියදමකින් ලබාගත හැකි වීම, මධ්යගත පාලනයකින් යුත් භාෂා දත්ත කට්ටල, පොදු ඇගයීම් ක්රම සහ ආරක්ෂක මෙවලම් මෙන්ම ඒකාබද්ධ ධාරිතා සංවර්ධනය යන මූලික කරුණු 04 මත පදනම් වීම ඉතා වැදගත්.
මේ ප්රයත්නය මගින් AI හි ප්රතිලාභ වෙත අප සැමට පුළුල් හා සාධාරණ ලෙස ප්රවේශ විය හැකි බව මාගේ විශ්වාසයයි.මේ තත්ත්වය තුළ ශ්රී ලංකාව ජාතික මෙන්ම කලාපීය මට්ටමේ අවශ්යතාද සපුරලිය හැකි AI හැකියාවන්ගෙන් යුත් දත්ත යටිතල පහසුකම් සංවර්ධනය කිරීම පිළිබඳ ගවේෂණය කරමින් සිටිනවා.
ඩිජිටල් පොදු යටිතල පහසුකම් සහ තාක්ෂණික කුසලතා පිළිබඳව ගෝලීය නායකත්වයන් අත්පත් කර ගනිමින් සිටින ඉන්දියාව සහ අනෙකුත් රාජ්යයන් සමඟ සමීපව කටයුතු කරමින් තිරසාර, ආරක්ෂිත සහ අනාගතයට සූදානම් කලාපීය AI දත්ත මධ්යස්ථාන ධාරිතාවන් ස්ථාපිත කිරීමට ශ්රී ලංකාවට විශාල විභවයක් තිබෙනවා.
කිසිදු රටකට AI සඳහා සූදානම් අනාගතයක් තනිව ගොඩනඟාගත නොහැකි බව අපගේ වැටහීමයි.ලෝකය සහ මෙම කලාපයේ රාජ්යයන්ගේ අදහස් රැසක් සැලකිල්ලට ගනිමින් අප විසින් නවදිල්ලියේදී එකඟවන ඒකාබද්ධ ප්රකාශයේ මෙම සහයෝගීතාවයේ වැදගත්කම ඉස්මතු කර තිබීම සතුටට කරුණක්.
ඒ නිසා කිසිවෙකු අත්නොහැරෙන සේ සහ ආචාර ධර්ම මූලික කරගත් කෘත්රිම බුද්ධිය පිළිබඳ පොදු වටිනාකම් බෙදා ගනිමින් අන්යෝන්ය වශයෙන් ඉගෙන ගැනීමට සහ සාමුහිකව ඉදිරියට යාමට ශ්රී ලංකාව සුදානම් බව ප්රකාශ කිරීමට කැමතියි.”
‘සියල්ලන්ගේ හිතසුව, සියල්ලන්ගේ සතුට’ යන අරුතින් යුතුව ‘සර්වජන් හිතාය, සර්වජන් සුඛාය’ යන තේමාව යටතේ පවත්වන AI IMPACT SUMMIT 2026 පසුගියදා සඳුදා ඉන්දියාවේ නවදිල්ලි නුවරදී ආරම්භ වුණි.
ඒ අගමැති නරේන්ද්ර මෝදිගේ ප්රධානත්වයෙනි.
ඉන්දීය අග්රාමාත්යවරයාගේ ආරාධනයකට අනුව ජනාධිපති අනුර කුමාර දිසානායක මහතාද මෙම සමුළුවට සහභාගි වුණි.
AI IMPACT SUMMIT 2026 සඳහා නවදිල්ලි නුවරට පැමිණ සිටින රාජ්ය නායකයින් වෙනුවෙන් ඉන්දීය අග්රාමාත්ය නරේන්ද්ර මෝදි මහතා පිරිනමන ලද විශේෂ රාත්රී භෝජන සංග්රහයට ඊයේ (18) රාත්රියේ ශ්රී ලංකා ජනාධිපතිවරයාද එක්වුණි.
සමුළුවේ ප්රධාන සැසිය අද පැවැත්වුණේ ඉන්දීය අග්රාමාත්ය නරේන්ද්ර මෝදි, ජනාධිපති අනුර කුමාර දිසානායක, ප්රංශ ජනාධිපති එමානුවෙල් මැක්රෝන්, බ්රසීල ජනාධිපති ලූලා ඩි සිල්වා ඇතුළු සෙසු රාජ්ය නායකයින්, මෙන්ම එක්සත් ජාතීන්ගේ මහලේකම් ඇන්ටෝනියෝ ගුටෙරස් සහ ලෝකයේ ප්රධාන තාක්ෂණික සමාගම් සියයක පමණ ප්රධානීන්ගේද සහභාගිත්වයෙනි.
එහිදී සමුළුව ඇමතූ අගමැති මෝදි පැවසුවේ, ලෝකයේ සෑම මිනිසුන් හය දෙනෙකුගෙන් එක් අයෙකුම නියෝජනය කරමින් ලොව විශාලතම තරුණ ප්රජාව ඇති ඉන්දියාව නූතන තාක්ෂණ ක්ෂේත්රයේ මධ්ය කේන්ද්රය වී ඇති බවය.
එමෙන්ම පළමුවෙන්ම නව තාක්ෂණය නිපදවන්නේත්, ඉක්මනින්ම තාක්ෂණයට අනුගත වන්නේද ඉන්දියාව බවත් ඔහු එහිදී වැඩිදුරටත් පැවසුවේය.
මේ අතර ජනාධිපති අනුර කුමාර දිසානායක මහතා අද පස්වරුවේ AI සැසිය ඇමතීමට නියමිතව තිබේ.
