මහමැතිවරණයෙන් පරාජය වූ හිටපු මැති ඇමැතිවරුන්, හිටපු මහ ඇමැතිවරුන්, හික්ෂුන් වහන්සේලා, නිලමේවරුන් සහ මියගිය ඇතැම් දේශපාලනඥයන්ගේ බිරින්දෑවරුන්ට ඔවුන්ගේ ආරක්ෂාව සඳහා ඇමැති ආරක්ෂක අංශයේ (MSD) නිලධාරීන් 245ක් ලබාදී ඇතැයි පොලිස් මූලස්ථානය පවසයි.
මේ අයට මෙලෙස ආරක්ෂාව ලබාදීම සඳහා රජයට වාර්ෂිකව වැය කිරීමට සිදුවන මුදල රුපියල් කෝටි 15කට ආසන්න බව දැනගන්නට ඇත.
ඇමැති ආරක්ෂක අංශයේ මෙපමණ නිලධාරීන් විශාල පිරිසක් පැරදුණු මැති ඇමැතිවරුන්, දේශපාලනඥයන්ගේ බිරින්දෑවරුන් ඇතුළු පිරිස්වලට ලබා දීමට සිදුවීම නිසා අමතර වය බරක් දැරීමට සිදුවන බවද පැවසේ.
ඒ අතර විශේෂයෙන්ම විදේශ දූත පිරිස් පැමිණෙන අවස්ථාවලදී ඔවුන්ට ආරක්ෂාව ලබාදීමේ දී මේ නිසා ඇතිවන නිලධාරී හිඟයේ ගැටලුව තදින්ම දැනෙන බවද වාර්තා වේ.
මියගිය හිටපු කතානායකවරයකුගේ බිරිඳට එම අංශයේ නිලධාරීන් දෙදෙනකුද, පසුගිය කාලයේදී ඝාතනයට ලක්වූ ඇමැතිවරයකුගේ බිරිඳට ආරක්ෂකයන් දෙදෙනකුද යොදවා ඇතැයි පැවසේ.
එම ආරංචිමාර්ග කියන්නේ අගමැති මහින්ද රාජපක්ෂගේ බැංකු ගිණුමකින් රුපියල් කෝටි ගණනක් හොරෙන් ලබාගත් බවට චෝදනා ලැබූ පුද්ගලයාටද ඇමැති ආරක්ෂකයන් දෙදෙනකු ලබාදී සිටින බවයි.
භික්ෂුන් වහන්සේලා පිරිසකට ලබාදී ඇති ප්රභූ ආරක්ෂකයන් ගණන 38කි.
රජය විශාල වශයෙන් මූල්යමය දුෂ්කරතාවකට පත්ව සිටින අවස්ථාවක ආරක්ෂාව සම්බන්ධයෙන් ලොකු තර්ජනයක් නොමැති පිරිස්වලට මෙලෙස ප්රභූ ආරක්ෂාව ලබාදීම සඳහා විශාල මුදල් සම්භාරයක් යට කිරීම අපරාධයක් බව බොහෝ දෙනාගේ අදහසය.
