ලෝක උරුම සීගිරිය නැරඹීමට පැමිණෙන දෙස් විදෙස් සංචාරකයන්ගේ පහසුව උදෙසා ක්රියාත්මක වන ප්රවාහන සේවාවන් අතර මෑතක සිට අමුතුම ආකාරයේ ගැටුමක් නිර්මාණය වී තිබේ. ඒ සාම්ප්රදායික ත්රිරෝද රථ රියැදුරන් සහ නවීන තාක්ෂණය ඔස්සේ ක්රියාත්මක වන ‘පික්මී’ (PickMe) වැනි ජංගම දුරකතන යෙදවුම් රියැදුරන් අතරය. මෙය හුදෙක් වාහන දෙවර්ගයක් අතර ගැටුමක් නොව, මෙරට දේශපාලන කරළිය උඩුයටිකුරු කළ තීරණාත්මක බලවේගයක් වූ ත්රිරෝද රථ රියැදුරු ප්රජාව සහ වත්මන් පාලනය අතර ඇතිවෙමින් පවතින සීතල යුද්ධයක ආරම්භයකි.Sri Lanka Latest News
පසුගිය ජනාධිපතිවරණ සමයේදී අනුර කුමාර දිසානායක මහතාගේ ජයග්රහණය වෙනුවෙන් මෙරට ත්රිරෝද රථ රියැදුරරෝ දැවැන්ත මෙහෙවරක් ඉටු කළහ. ඔවුන් තම වාහනවල මාලිමාවේ ස්ටිකර් අලවමින්, ගම් මට්ටමින් ජනතාව දැනුවත් කරමින් පෙනීසිටියේ ‘අපේ පාලනයක් යටතේ අපේ වෘත්තීය ගරුත්වය රැකේවි’ යන දැඩි විශ්වාසය මතය. නමුත් අද සීගිරිය පාරේ පෝලිම්වල රස්තියාදු වන රියැදුරන් ප්රශ්න කරන්නේ, තමන් එදා දහඩිය හෙළා බලයට පත්කළ ආණ්ඩුව යටතේ තමන්ගේ බත්පතට ‘ඩිජිටල්’ පහරක් වදින විට පාලකයන් නිහඬව සිටින්නේ මන්ද යන්නයි.
විරෝධතාවට එක්වූ රියැදුරන් පෙන්වා දෙන්නේ රුපියල් ලක්ෂ විස්සක් වැනි අධික මිලකට ත්රිරෝද රථයක් ලබාගෙන, ෆිනෑන්ස් වාරික ගෙවීමට පවා ආදායමක් නොමැතිව තමන් අසරණ වී ඇති බවයි. ‘පික්මී රියැදුරන් කොහේ හෝ සිට පැමිණ අපේ හයර් එක අරගෙන යනවා. ඔවුන්ට සීගිරියේ පෝලිම් ක්රමයක් හෝ විනයක් නැහැ’ යනුවෙන් ඔවුහු චෝදනා කරති. රියැදුරන් පවසන පරිදි, පිටතින් පැමිණෙන පිරිස් මාර්ග දෙපස වාහන නතර කරගෙන පාරිසරික සුන්දරත්වයට පවා හානි පමුණුවන අතර, මෙය පාලනය කිරීමට පොලිසිය හෝ බලධාරීන් නිසි මැදිහත්වීමක් සිදු නොකරන බව ඔවුන්ගේ මතයයි.
දේශපාලන කෝණයකින් බලන කල, මෙම අර්බුදය ආණ්ඩුවට දෙපැත්ත කැපෙන කඩුවකි. එක් පසෙකින් තාක්ෂණය සහ නිදහස් වෙළෙඳපළ ක්රමය යටතේ පාරිභෝගිකයාට සහනදායී මිලකට ‘පික්මී’ හෝ ඌබර් සේවාවන් ලබාගැනීමට ඇති අයිතිය ආණ්ඩුවට තහනම් කළ නොහැක. අනෙක් පසින්, පාරම්පරිකව මෙම වෘත්තියේ යෙදෙන සහ තමන්ගේ දේශපාලන ජයග්රහණයේ කොන්ද පණ ගැන්වූ ත්රිරෝද රථ රියැදුරන් අතහැර දැමීමට ද ඔවුන්ට නොහැක.
තත්ත්වය පාලනය කිරීමට බලධාරීන් විසින් No Parking පුවරු සවිකිරීමට පියවර ගෙන තිබුණද, එය තාවකාලික පැලැස්තරයක් පමණි. සීගිරියේ රියැදුරන් ඉල්ලා සිටින්නේ හුදෙක් පික්මී තහනම් කිරීමක් නොව, තමන්ගේ වෘත්තීය අයිතිවාසිකම් ආරක්ෂා වන පරිදි නියාමනයක් සහිත ක්රමවේදයකි. අනුර කුමාර දිසානායක මහතාට බලය ලබාදුන් ත්රිරෝද රථ රියැදුරා අද පාරට බැස ඇත්තේ, එදා බලාපොරොත්තු වූ ‘වෙනස’ තමන්ගේ බඩගින්නට විසඳුමක් වී නොමැති බව ලෝකයටම හඬගා කියමිනි.
