සන්ඬේ ලීඩර් පුවත්පතේ හිටපු කර්තෘ ලසන්ත වික්රමතුංගව ඝාතනය කළ අපරාධකරුවන්ගේ රහසිගත තොරතුරු හෙළිදරව් කළේ යැයි ඊතලය ජාතික මාසික සඟරාවේ ප්රධාන කර්තෘ ශ්රී ලාල් ප්රියන්තගෙන් පොලිස් විශේෂ විමර්ශන ඒකකය ඊයේ (14) පැය දෙකකට ආසන්න කාලයක් ප්රශ්න කර කටඋත්තර ලබා ගෙන තිබේ.
‘ලසන්ත වික්රමතුංග ඝාතනයේ රහසිගත තොරතුරු එළියට’ යන සිරස්තලය යටතේ ඊතලය සඟරාව මගින් එම ඝාතනය අපරාධකරුවන් විසින් සිදු කිරීමේදී ජංගම දුරකථන මගින් අදහස් හුවමාරු කර ගෙන තිබූ අතර ඒවා සිදු කරගත් දුරකථන දත්ත වාර්තා ලබා ගෙන පළ කර තිබිණි.
එම තොරතුරු ලබා ගත්තේ කෙසේද, ලබා දුන් පුද්ගලයෝ කවුද, එවැනි ලිපියක් සඟරාවේ පළ කළේ ඇයි හා මේ සඳහා උදව් කළ පුද්ගලයන්ගේ තොරතුරු විමසමින් කර්තෘ ශ්රී ලාල් ප්රියන්තගෙන් පොලිස් විශේෂ විමර්ශන ඒකකය ප්රශ්න කර කටඋත්තර ලබා ගැනීමට සූදානම් වුවද ඔහු ඒවාට පිළිතුරු ලබා දීම ප්රතික්ෂේප කර ඇත.
එකී තොරතුරු ලැබුණු ආකාරය කිසිසේත්ම හෙළිදරව් නොකරන බවට ඔහු පොලිස් විශේෂ විමර්ශන නිලධාරීන්ට ප්රකාශ කර ඇති බව වාර්තා වේ.
මෙම විමර්ශනයට අදාළ තවත් තොරතුරු ලබා ගැනීම සඳහා රහස් පොලිසියේ හිටපු අධ්යක්ෂ ජ්යෙෂ්ඨ පොලිස් අධිකාරී ශානි අබේසේකරවද ඊයේ (14) පොලිස් විශේෂ විමර්ශන ඒකකයට කැඳවා තිබූ අතර ඔහුගෙන්ද පැය කිහිපයක් මීට අදාළව කටඋත්තර ලබා ගැනිණි.
ඊට අමතරව රහස් පොලිසියේ හිටපු පොලිස් අධිකාරී දැනට බදුල්ල ජ්යෙෂ්ඨ නියෝජ්ය පොලිස්පතිගේ පුද්ගලික සහකාර ලෙස ක්රියා කරන පොලිස් අධිකාරී බී.ඒ. තිසේරාගෙන්ද මීට අදාළව ජූලි මස 20 වැනිදා කටඋත්තර ලබා ගැනීමට නියමිතව ඇති අතර ඒ සඳහා ඔහුට එදින පොලිස් විශේෂ විමර්ශන ඒකකයේ පෙනී සිටින ලෙස දැනුම් දී ඇත.
