‘ඩීල් දේශපාලනය’ තම පැවැත්ම කර ගත් වජිර අබේවර්ධන වැනි පුද්ගලයින්ගේ කුමන්ත්රණ නිසා, පක්ෂය තුළ සිටින අවංක, කාර්ය ශුර පුද්ගලයින්ට මෙවර මහ මැතිවරණයේදී ‘සමගි ජන බලවේගය’ යටතේ වෙනම තරඟ කිරීමට සිදුව ඇති බවත්, එම තත්වය තුළ එජාප නායක රනිල් වික්රමසිංහ දේශපාලනික වශයෙන් තනිවී සිටින බවත් හිටපු අමාත්ය මංගල සමරවීර පවසයි.
මංගල සමරවීර ඒ බව සඳහන් කළේ, ”සමගි ජන බලවේගයේ’ මාතර දිස්ත්රික් අපේක්ෂක ලැයිස්තුවෙන් මංගල ඉවත් කරවා ගැනීම සඳහා එක්සත් ජාතික පක්ෂ නායක රනිල් වික්රමසිංහ හා තමා එක්ව දේශපාලන ක්රියාදාමයක් දියත් කළ බවට” හිටපු අමාත්ය වජිර අබේවර්ධන කර ඇතැයි කියන ප්රකාශයක් සම්බන්ධයෙන් සමාජ මාධ්යයක පළවී ඇති පුවතක් පිළිබඳව ‘theleader.lk’ වෙබ් අඩවිය කර ඇති විමසීමක දී ය.
” මම මන්ත්රී දේශපාලනයෙන් ඉවත්වෙන්න ගත්ත තීන්දුව හොඳට හිතල බලලා ගත්තු දේශපාලන පියවරක්. ‘ඩීල් දේශපාලනයේ ඔස්තාර්ලට එක ‘ඩීල්’ එකක් විදියට පෙන්න පුළුවන්. මම ගත්ත තීන්දුව ජුනි 09 දා ප්රකාශයට පත් කරන්න ඉස්සෙල්ල මම ඒ සම්බන්ධයෙන් සජිත් ප්රේමදාස මැතිතුමාත්, රනිල් වික්රමසිංහ මැතිතුමාත් වෙන වෙනම හමුවෙලා දැනුම් දීලයි තිබුණේ.
මම එක්සත් ජාතික පක්ෂයට එකතුවුණේ් රනිල් වික්රමසිංහ මැතිතුමා කෙරෙහි පැවති විශ්වාසය නිසා. එනිසා මම ගනු ලබන දේශපාලන ස්ථාවරය ඔහුට ද දැනුම මගේ යුතුකමක් වුණා. මම රනිල් වික්රමසිංහ මැතිතුමා හමුවුන වෙලාවේ මගේ දේශපාලන ස්ථාවරය පැහැදිලි කළා මිසක් උපදෙස් ගන්න ගියේ නැහැ. මම ගත්තු තීන්දුවට ඔහුගේ කිසිඳු සම්බන්ධයක් නැහැ.
මං පොර වෙන්න දගලන වජිරලා වගේ ‘ඩීල්කාරයෝ’ ඉන්නතුරු එක්සත් ජාතික පක්ෂයට අනාගතයක් නම් නැහැ. එක්සත් ජාතික පක්ෂය වැනි ශ්රේෂ්ඨ පක්ෂයක් මේවගේ තක්කඩියන්ගේ නවාතැන් පලක් වී තිබීම ගැන මම ඇත්තටම කණගාටු වෙනවා” මංගල සමරවීර වැඩිදුරටත් කියා සිටියේය.
