වෘත්තීය සමිති නායකයන් මර්දනය කර ඛනිජ තෙල් සම්පත අහිමි කිරීමේ මහා පාවාදීමේ වටිනාකම බලශක්ති ඇමති කාංචන විජේසේකර ඇමතිවරයා ඇතුළු වගකිවයුත්තන්ට ගෙවීමට සිදුවන බව ආණ්ඩුව නියෝජනය කරන ශ්රී ලංකා පොදුජන පෙරමුණ (පොහොට්ටුව) යටතේ ක්රියාත්මක ඛනිජ තෙල්, වාණිජ සේවා, කර්මාන්ත ප්රගතිශීලි සේවක සංගමයේ සභාපති බන්දුල සමන් කුමාර පවසනවා. ඔහු කියන්නේ තමන් සහ ඛනිජ තෙල් නීතිගත සංස්ථාවේ තම වෘත්තීය සමිතියේ අනෙකුත් සාමාජිකයන් 2019 ආණ්ඩුව බලයට පත්කිරීම සඳහා කළ කැපකිරීම මහින්ද රාජපක්ෂ ප්රමුඛ සියලු පාර්ශ්ව දන්නා බවයි. එහෙත් දැන් තමන් කියන දේට ඇහුම්කන් නොදී සිටීම දැඩි කණගාටුවක් බව ඔහු පවසනවා.
තමන්ගේ දේශපාලන පක්ෂය පිහිටුවීමටත් පෙර සිට තමන් ප්රමුඛ වෘත්තීය සමිති නායකයන් පොදුජන පෙරමුණු ප්රගතිශීලි බලවේගය ගොඩනැගූ බව සංගමයේ සභාපති බන්දුල සමන් කුමාර කියනවා. එහි අරමුණ වූයේ ජාතික සම්පත් සුරක්ෂිත කිරීම බවයි ඔහු සඳහන් කරන්නේ. එසේ කළ තමන්ට මෙලෙස සැලකීමක් කිසිසේත්ම අපේක්ෂා නොකළ බව සභාපතිවරයා කියනවා.
සභාපතිවරයා මෙසේ පවසා ඇත්තේ ඛනිජ තෙල් සංස්ථා වෘත්තීය සමිති නායකයන් අනිවාර්ය නිවාඩු යැවීමත්, ඔවුන්ට ආයතන පරිශ්රයට ඇතුළු වීම තහනම් කිරීමත් සම්බන්ධයෙන් කළ විමසීමකදී යි.
“අපේ ඛනිජ තෙල් සංස්ථාවේ කොටස් විදේශ සමාගම් 03කට වසර 20ක කාලයක් සඳහා පවරා දීම සම්බන්ධයෙන් ඉදිරිපත් කළ කැබිනට් පත්රිකාවකට අනුමැතිය ලබාදීමට එරෙහිවයි අපි ඊයේ (28) උදෑසන සත්යග්රහයක් පටන් ගත්තේ. ඒකට සංස්ථාවේ වෘත්තීය සමිති සියල්ල එකතු වුණා. හැබැයි මේ බලධාරීන් ඒකට කිසිම ප්රතිචාරයක් දැක්වුවේ නැහැ. ඒ නිසයි සත්යග්රහය වර්ජනයක් දක්වා පුළුල් කරන්න සිද්ධ වුණේ.
ඒ අනුව ඉන්ධන බෙදාහැරීම නතර කෙරුණා. ඉන්පසු ආරක්ෂක හමුදා යොදවා බලහත්කාරයෙන් බවුසර්වලට තෙල් පිරවීමටත්, ඒවා පිටත් කිරීමටත් බලධාරීන් කටයුතු කළා. එම උත්සාහයේ දී එයාලට පුළුවන් වුණේ තෙල් බවුසර් 10ක් පමණ පිටතට යැවීමට යි. මේ සඳහා සහයෝගය නොදුන් සහ සංස්ථා සේවකයන්ට රාජකාරියට වාර්තා කිරීමට ඉඩනොදුන්න බව කියමින් වෘත්තීය සමිති නායකයන්ට එරෙහිව පියවර ගන්නා බව ඊයේ රෑ ම ඇමති කාංචන විජේසේකර ප්රකාශයක් නිකුත් කළා.
අද (29) උදේම ලංකා ඛනිජ තෙල් නීතිගත සංස්ථාවේ සභාපතිවරයාගේ සහ ලංකා ඛනිජ තෙල් තොග ගබඩා පර්යන්ත සමාගමේ සභාපතිවරයාගේ අත්සනින් නිකුත් කළ නිවේදනයක සඳහන් වුණේ ඉන්ධන බෙදාහැරීමේ කටයුතුවලට බාධා වන ලෙස සහ ඉන්ධන බෙදාහැරීමේ සේවාවල යෙදී සිටි සේවකයන්ට බලපෑම් කරමින් එම සේවා අවහිර කිරීමට කටයුතු කළ වෘත්තීය සමිති නායකයන් අනිවාර්ය නිවාඩු යැවීමට සංස්ථා කළමනාකාරිත්වය තීරණය කරලා තියෙන බව.
ඒ අයට සංස්ථා පරිශ්රවලට ඇතුළු වීම තහනම් කරන බවත් ඒ නිවේදනයේ දැක්වුණා” යි ශ්රී ලංකා පොදුජන පෙරමුණ (පොහොට්ටුව) යටතේ ක්රියාත්මක ඛනිජ තෙල්, වාණිජ සේවා, කර්මාන්ත ප්රගතිශීලි සේවක සංගමයේ සභාපති බන්දුල සමන් කුමාර පවසා තිබෙනවා.
