රජයේ වෛද්ය නිලධාරීන්ගේ සංගමය හා ජනාධිපති ගෝඨාභය රාජපක්ෂ මහතා අතර හමුවක් අද (04) සවස ජනාධිපති ලේකම් කාර්යාලයේදී පැවැත්විණ.
කොවිඩ් – 19 වසංගතය හෙවත් කොරෝනා වෛරසය රට තුළ ව්යාප්තිය පාලනය කරනු පිණිස රජය ක්රියාත්මක කළ වැඩසටහනේ ප්රගතිය සමාලෝචනය කොට ඉදිරි පියවර තීරණය කිරීම මෙම සාකච්ජාවේදී සිදුවිය.
රජයේ වෛද්ය නිලධාරීන්ගේ සංගමයේ සභාපති වෛද්ය අනුරුද්ධ පාදෙණිය මහතා වෛරසයේ භූගෝලීය ව්යාප්තිය සහ එය පාලනය කරනු පිණිස රජය ගත් ක්රියාමාර්ග වල ප්රගතිය පැහැදිලි කර තිබූ අතර රට තුළ වෛරසයේ ව්යාප්තිය හඳුනාගත් මුල් අවස්ථාවේම රජය ගත් කඩිනම් ක්රියාමාර්ග නිසා මේ සෞඛ්ය ගැටලුව පාලනයෙන් ගිලිහී යා නොදී කළමනාකරණය කිරීමට හැකි වූ බව ජනාධිපතිවරයා පෙන්වා දුන්නේය.
එසේ වුවද අවදානම තවම පහව ගොස් නැති බවද ජනාධිපතිවරයා ප්රකාශ කර සිටියේය.
රජය මෙතෙක් කළ අයුරින්ම වෛරසය මර්දනය සඳහා ඉදිරියටත් තීරණ ගනුයේ සෞඛ්ය, වෛද්ය, ආරක්ෂක සහ නීති ඇතුළු අදාළ ක්ෂේත්රවල විශේෂඥයන්ගේ දැනුම සහ නිර්දේශ මත පදනම් වෙමින් බව ජනාධිපතිවරයා පෙන්වා දීමෙන් අනතුරුව දැනට ආරම්භ කර ඇති කොරෝනා මර්දන වැඩසටහන වඩාත් විධිමත්ව තත්ත්වය යහපත් වන තුරු ඉදිරියට ගෙන යාමට සාකච්ජාවේ දී එකඟත්වය පළ විය.
ආසාධිතයන්, ආසාධිතයන් යැයි සැක කෙරන පිරිස සහ ඔවුන් ඇසුරු කළ අය නැවත නැවතත් දැඩි පරීක්ෂණයට ලක් කළ යුතු බව ද තීරණය කෙරිණ. වසංගතය පාලනය කිරීමට සමත් වූ සෙසු රටවල් අනුගමනය කර ඇත්තේ එවැනි පිළිවෙතකි. ආසාධිතයන් සහ ඔවුන් ඇසුරු කළ අය නිවැරදිව හඳුනාගැනීමට හැකි වී ඇතැයි ආරක්ෂක බලධාරීහූ සඳහන් කළහ.
ජනාධිපති උපදේශක ලලිත් වීරතුංග, හිටපු ආණ්ඩුකාර වෛද්ය සීතා අරඹේපොළ, ආරක්ෂක ලේකම් විශ්රාමික මේජර් ජෙනරාල් කමල් ගුණරත්න, යුද හමුදාපති ලුතිනන් ජෙනරාල් ශවේන්ද්ර සිල්වා, වැඩබලන පොලිස්පති සී.ඩී. වික්රමරත්න, වෛද්ය නිලධාරීන්ගේ සංගමයේ සෙසු නිලධාරීහූ සහ තොරතුරු සන්නිවේදන තාක්ෂණ ආයතනයේ සභාපති ජයන්ත ද සිල්වා මහතා ඇතුළු පිරිසක් සාකච්ජාවට එක්ව සිටියහ.
