ඓතිහාසික මල්වතු මහා විහාරයේ අභිනවයෙන් ඉදිකෙරුණු ”මාත්ගමුව පන්සල” සඟසතු කොට පූජා කිරීම ජනාධිපති ගෝඨාභය රාපක්ෂ මහතාගේ ප්රධානත්වයෙන් අද (05) පෙරවරුවේ සිදු කෙරුණි.
මෙහිදී ජනාධිපතිවරයා මල්වතු අස්ගිරි මහනායක හිමිවරුන් බැහැ දැක ආශිර්වාද ලබා ගත්තේය.
අද පෙරවරුවේ මල්වතු මහා විහාරය වෙත පැමිණි ජනාධිපති ගෝඨාභය රාජපක්ෂ මහතා මල්වතු පාර්ශ්වයේ මහනායක, අතිපූජ්ය තිබ්බටුවාවේ ශ්රී සුමංගල නාහිමියන් බැහැදැක ආශිර්වාද ලබා ගත්තේය.
අනතුරුව ජනාධිපතිවරයා මල්වතු මහා විහාරයේ අභිනවයෙන් ඉදිකෙරුණු ”මාත්ගමුව පන්සල” සඟසතු කොට පූජා කිරීමට එක්විය.
මාත්ගමුව පන්සල් ගොඩනැගිල්ල සම්පූර්ණයෙන් ඉවත් කොට ජනාධිපතිවරයාගේ උපදෙස් මත ශ්රී ලංකා නාවික හමුදාවේ ශ්රම දායකත්වයෙන් මෙම නව තෙමහල් ගොඩනැගිල්ල ඉදිකර තිබේ.
නව ගොඩනැගිල්ල සඟසතු කිරීමට අදාළ සන්නස් පත්රය ජනාධිපතිවරයා විසින් මල්වතු පාර්ශ්වයේ අනුනායක පූජ්ය දිඹුල්කුඹුරේ විමලධම්ම හිමියන් වෙත පිළිගන්වනු ලැබීය.
අනතුරුව අස්ගිරි විහාරය වෙත පැමිණි ජනාධිපති ගෝඨාභය රාජපක්ෂ මහතා අස්ගිරි පාර්ශ්වයේ මහනායක අතිපූජ්ය වරකාගොඩ ඥානතරන නාහිමියන් බැහැ දැක ආශිර්වාද ලබා ගත්තේය.
