.
අනේ අපේ කොටුවෙ පොඩි සාදු. හරි ෂෝක්. කාලයක් තිස්සේ අපේ බුදු සසුන ආරක්ෂා කරමින් මේ ශාසනයට උන්වහන්සේ කරන සේවය අනුපමේයයි. ඇත්තටම බුදු සසුන කියලා කියන්නේ ගෞරවයෙන්, ආදරයෙන්, සෙනෙහසින් වැළඳගත්තු එකක් නිසා, මේ වගේ අය ඉන්නකොට ඒකටත් පොඩි ආතල් එකක් දීලා පොඩි කොමිටල් එකක් කරලා මේක පවත්වාගෙන යන්න පුළුවන්. Sri Lanka Latest News
අපි දැක්කා පහුගිය කාලේ එක හාමුදුරු කෙනෙක් වස්තිලගේ වීඩියෝ එකකට පෙනී ඉන්නවා. සිවුර පිටින් රඟපානවා. හරි ෂෝක්. ඒකේ රඟපාන්න ෆාදර් කෙනෙක් හොයාගන්න බැරුව ගියාම, කවුරු හරි කොල්ලෙක්ට ෆාදර් කෙනෙක්ගේ ඇඳුමක් අන්දලා ඒකාව ඒකට ගන්නවා. පොසොන් පෝය දවසේ කුඩුගැහීම කියලා වීඩියෝ එකකට පෙනීහිටපු ඒ හාමුදුරුවන්ටත් අපේ ගෞරවය. ඔබ වහන්සේත් හරි ෂෝක්. කොටුවෙ හාමුදුරුවොත් හරි ෂෝක්. කාගම හාමුදුරුවොත් හරි ෂෝක්. අපි මේ කාටවත් බණිනවා නෙමෙයි. ඒගොල්ලො හරි ෂෝක්. දැන් කොටුවෙ හාමුදුරුවෝ ලස්සනට ඉන්නවා. ෆේෂල් එකක් කරනවා. පහුගිය දවසක වීඩියෝ එකකුත් එළියට දාලා.
මේ බුද්ධ ශාසනය දැන් හරිම ආතල් ශාසනයක් බවට පත්වෙලා. උන්නු ගමන් එක්කෙනෙක් ඇවිල්ලා ගිටාර් ගගහා සින්දු කියනවා. තව එකෙක් ගංජා ගහනවා. තව එකෙක් තමන්ගේ පවුල ගැන, තමන්ගේ බිරිය ගැන, තමන්ගේ පෙම්වතිය ගැන වීඩියෝ එකකට පෙනී හිටිනවා. තව ගොල්ලො කියනවා බුදුවෙලා කියලා. විශ්ව බුද්ධ, අර බුද්ධ, මේ බුද්ධ කියලා නම් දාගෙන. බුදු හාමුදුරුවෝ හිටියා නම් සංසාරේ කලකිරිලා, ආයෙත් පාරක් ගිහි ගෙයින් නික්මෙන එක වෙනුවට පන්සලෙන් නික්මිලා ගිහිගෙට යනවා. මොන මඟුලක්ද මේ වෙලා තියෙන්නේ කියලා හිතාගන්න බැරුව මිහිඳු හාමුදුරුවෝ අසරණ වෙනවා. මිහිඳු හාමුදුරුවෝ මිහින්තලාවට වැඩම කරන්න කලින් ආපහු පැනලා දුවනවා ඉන්දියාවට. ආයේ එන්නේ නෑ පැත්ත පළාතක. දේවානම්පියතිස්ස රජ්ජුරුවෝ දුන්න අරන් කැලේ දුව දුව ඉඳලා, මේ වගේ එකෙක් හම්බවුණා නම් විදින්නේ මුවාට නෙමෙයි මුන්දැට. ඒකට හේතුව. මුන්දැලා මොනවා කරනවද කියලා අපි දන්නේ නෑ.
කොහොම වුණත් කොටුවෙ හාමුදුරුවෝ පහුගිය දවසක ෆේෂල් එකක් කරනවා. ෆේෂල් එකක් කරලා කරන දෙයක් රහසින් කරගෙන හිටියා නම් ඉවරයි. අපි දැක්කා පහුගිය කාලේ ජිම් එකට ගියපු හාමුදුරු කෙනෙක්. තව තැනක දැක්කා සංගීතෙකට ගිහිල්ලා නටන හාමුදුරු කෙනෙක්. ලැජ්ජාවයි බයයි කියන එකත් නැතිවෙලා, අඩියක් පුඩියක් ගහලා සූර් වුණාට පස්සේ මිනිස්සු නම් සාමාන්යයෙන් ඕනෙ ගොන් වැඩක් කරනවා, ඕන බලු වැඩක් කරනවා. ශාසනේ ඉන්න උන්දැලාට එහෙම කරන්න බෑ. ඒකට හේතුව උන්වහන්සේලාට වගකීම් පද්ධතියක් තියෙනවා, යුතුකම් පද්ධතියක් තියෙනවා, නීතිරීති පද්ධතියක් තියෙනවා. මේ සියල්ලෙන්ම උන්වහන්සේලා වටවෙලා ඉන්නේ. ඒකට හේතුව, හිතුවක්කාර විදියට වැඩ කරන්න බැරි, ඒ අය ඉන්නේ එක්තරා ආයතනගත ව්යුහයකට යටත්ව. ඇඳුම ආයිත්තම සම්බන්ධයෙන් ඒ අයට නීතියක් තියෙනවා. ඒක බුදුරජාණන් වහන්සේ විසින් නියම කරන ලද නීතිරීති පද්ධතියක්. ඒ නීතිරීති පද්ධතිය වඩා වැඩිදියුණු කරලා උපසම්පදාවෙන් පස්සේ උන්වහන්සේලාට පැවරෙනවා. උන්වහන්සේලා ඒක ආරක්ෂා කරන්න ඕනේ. ඒක කරනවට උන්වහන්සේලාට සිවුපසයෙන් උපස්ථාන කරන්න ගිහියෝ බැඳිලා ඉන්නවා. යම් යම් නීති රීති පද්ධතියකට යටත් වෙලා, ඇඳුම් ආයිත්තම් පද්ධතියකට යටත් වෙලා, විනය නීතිරීති පද්ධතියකට යටත් වෙලා ජීවත්වෙන එක මනුස්සයෙකුට ලේසි නෑ. ඒ අසීරු කර්තව්යය කරන භික්ෂුන් වහන්සේලාට, ඒ අසීරු කර්තව්යය වෙනුවෙන් අප පුද සත්කාර කරන්න ඕනේ. ඒකට හේතුව, මේ අසීරු කර්තව්යය කරන ගමන් උන්වහන්සේලාට ජීවිකා වෘත්තියක් කරලා කෑම බීම හොයාගන්න බැහැ. උන්වහන්සේලා දානෙට, මානෙට, පින්කමට, පිරිතට, පාංශුකූලෙට වඩිනවා නම්, උන්වහන්සේලාට වෙන දේකට කාලය යොදවන්න විදිහක් නෑ. උන්වහන්සේලාට පැවරිලා තියෙන්නේ කුදුමහත් රාජකාරිවල, බෞද්ධ ජනතාව වෙනුවෙන් සේවය කිරීම. බෞද්ධද, කතෝලිකද, හින්දුද, මුස්ලිම්ද කියලා කතාවක් නෑ. ඒ සියලු දෙනා වෙනුවෙන් උදව් උපකාර කරන භික්ෂුන් වහන්සේලා අපි මේ මහපොළොවේ දැකලා තියෙනවා.
ඒ අතරතුරේ ෆේෂල් කරලා, මූණ ලස්සනට තියාගන්න හැටි කියලා දෙන, ෆේෂල් එකක් කරගෙන මූණේ ලප කැලැල් ඉවත් කරගන්න එක ගැන කියලා දෙන භික්ෂුන් වහන්සේලාත් අපිට හම්බවෙනවා. මතක තියාගන්න අපි මේ වැරදියි කියලා කියනවා එහෙම නෙමෙයි. භික්ෂුන් වහන්සේ කෙනෙක් වුණාම ලස්සනට, සුවඳට, පිරිසිදුවට ඉන්න ඕනේ. බුදුරජාණන් වහන්සේගේ ශාසනයේ ඉස්සර කාලේ මහණ කරගත්තේ ශරීර අඩුපාඩු නැති, හොඳ දේහධාරී ශරීර සහිත, බැලූ බැල්මට ප්රසන්න, බොහොම ආකර්ෂණීය උදවිය. උන්වහන්සේලා උපදෙස් දෙන්න ඕනේ, උන්වහන්සේලා නායකත්වය දරන්න ඕනේ, උන්වහන්සේලා මිනිස්සුන්ට දේවල් කියලා දෙන්න ඕනේ. ඉතින් ආකර්ෂණීය වෙන්න ඕනෙනේ. ඒ නිසා කිසි ප්රශ්නයක් නෑ හාමුදුරුවනේ ෆේෂල් එකක් කරගත්තට, කරගන්න. ෆේෂල් කරගන්න, ජිම් යන්න, කැමැති කෑමබීම කන්න, සංගීතෙකට ගිහිල්ලා නටන්න. කැමැති නම් සින්දුවක් කියන්න, ගිටාර් එකක් ගහන්න, කිසි ප්රශ්නයක් නෑ. ඒක ඔබ වහන්සේලාගේ කැමැත්තනේ. ඔබ වහන්සේලාගේ ආසාවනේ. මනුස්සයෙකුට තියෙනවනේ ආසාවන්, වුවමනාවන් ඉෂ්ට කරගැනීමේ අයිතිය. හැබැයි ප්රශ්නේ තියෙන්නේ ඔබ වහන්සේ ඇඳන් ඉන්න ඇඳුම. ඉතින් වෙන ඇඳුමක් ඇඳගෙන ඔය සෙල්ලම් ටික දැම්මට කමක් නෑ. ඉතින් අපේ හාමුදුරුවනේ, ඔබ වහන්සේට වෙන ඇඳුමක් හොයාගන්න එක මහා ලොකු ප්රශ්නයක් වෙන්න බෑනේ.
අපි දන්නවා ඔය ඇඳුම ඇඳගෙන ඉද්දි ජීවත් වෙන්න ලේසියි, බිස්නස් එකක් කරගන්න ලේසියි, කීයක් හරි හොයාගන්න ලේසියි, තව තව වරප්රසාද ගොඩාක් තියෙනවා. ඒක ඇත්ත. ඉතින් ඒ වරප්රසාද ටික විඳගෙන, මේ සසරින් එතෙර වෙනවා කියලා අපිව රවට්ටලා, පොඩි ආතල් එකක් ගන්නවට වඩා ඔබ වහන්සේලාට හොඳයි ඔය ඇඳුම ගලවලා තියලා වෙන ඇඳුමක් ඇඳගෙන ඔය සෙල්ලන් ටික දාන එක. මොකද අපේ රටේ සැබෑම භික්ෂුන් වහන්සේලා දසදහස් ගණනක් ඉන්නවා බොහොම සිල්වත්ව, ගුණවත්ව නිස්සරණධ්යාශයෙන් පිළිවෙත් පුරන. බුදුහාමුදුරුවෝ දේශනා කරපු නිවන් මාර්ගයේ ගමන් කරන. උන්වහන්සේලා හරි දුෂ්කර ක්රියාවක් කරන්නේ.
අපි දන්නවා සිවුරක් ඇඳන් ඉන්න එක කොච්චර අමාරුද කියලා. අපි දන්නවා පවුල අතෑරලා දාලා, දරුවා අතෑරලා දාලා, අම්මා තාත්තා අතෑරලා දාලා, දේපළ ටික අතෑරලා දාලා, ගිහි ගෙයින් නික්මිලා විහාරස්ථානවල මහණ වෙලා, දායකයන්ගේ කුදුමහත් කටයුතු සියල්ල කරන හාමුදුරුවරු ඉන්නවා. සමහර ගම් පවතින්නේ හාමුදුරුවරු හින්දා. දානේ මානේ, කෑම බීම ටික ගමේ මිනිස්සුන්ට බෙදලා දෙන හාමුදුරුවරු ඉන්නවා. බෙහෙතට හේතට උදව් කරන හාමුදුරුවරු ඉන්නවා. ගමේ මිනිහගේ හැම දේටම යන එන හාමුදුරුවරු ඉන්නවා. එක්කෙනෙක් දෙන්නෙක් නෙමෙයි, ලක්ෂ ගානක් ඉන්නවා. මේ පිස්සු නටන හාමුදුරුවරු ඉන්නේ 10 දෙනෙක්, 15 දෙනෙක් ලංකාවෙම. ඒ නිසා සිල්වත් ගුණවත් සැබෑම භික්ෂුන් වහන්සේලා දහස් ගානකට අගෞරව කරලා, උන්වහන්සේලාගේ ඒ සේවයට පවා අපහාස කරන මේ වගේ අයට පොඩි දෙයක් කරන්න තියෙන්නේ. ඇඳුම මාරු කරගන්න. එතකොට ඉවරයි.
ජීවන පහන් තිළිණ
