ඊයේ (15) දිනයේදී එජාප පක්ෂ මූලස්ථානයට ගොස් එජාප මහලේකම් රංගේ බණ්ඩාර මහතා සමග පැටලුණු සමගි ජන බලවේගයේ පාර්ලිමේන්තු මන්ත්රී පලනි දිගම්බරම් මහතා අද (16) දිනයේ සමගි ජන බලවේගයේ මන්ත්රීවරුන් උදෙසා පවත්වන වැඩමූළුවකට සහභාගී වී සිටින බව වාර්තා වේ.
මෙම වැඩමූළුව කොළඹ මාකස් ප්රනාන්දු මාවතේ පිහිටි විපක්ෂනායක කාර්යාලයේ මේ වනවිට පැවැත්වෙමින් තිබේ.
මෙම වැඩමුළුවට දිගම්බරම් මහතාට අමතරව රවුෆ් හකීම්, වී. රාධක්රිෂ්ණන් සහ මනෝ ගනේෂන් යන පක්ෂනායකයන්ද සහභාගී වී සිටින බව වාර්තා වේ.
ඊයේ දිනයේ සිරිකොතට ගිය දිගම්බරම් මහතා රංගේ බණ්ඩාර මහතා සමග පක්ෂයේ සිදුවීමක් සම්බන්ධයෙන් මතුගැටුමක් ඇතිකරගෙන තිබුණද එජාප නියෝජ්ය නායක රුවන් විජයවර්ධන මහතාගේ හිමිකාරීත්වය යටතේ ඇති ලංකාදීප පුවත්පත මේ සිදුවීම වාර්තා කොට තිබුණේ රහස් දේශපාලන ගනුදෙනුවක් සදහා දිගම්බරම් සිරිකොතට පැමිණි බව ඇගවෙන පරිදිය.
ඒ මෙසේය.
දිගම්බරන් එජාප මහලේකම් හමුවෙයි.
සමගි ජනබලවේගයේ ප්රධාන පාර්ශ්ව පක්ෂ නායකයකු වන ජාතික වතු කම්කරු පෙරමුණේ නායක පාර්ලිමේන්තු මන්ත්රී පලනි දිගම්බරන් මහතා පිටකෝට්ටේ සිරිකොත එක්සත් ජාතික පක්ෂ මූලස්ථානයට පැමිණ එජාප මහලේකම් පාලිත රංගේ බණ්ඩාර මහතා පෙරේදා (14) සවස හමුවී ඇතැයි සිරිකොත ආරංචි මාර්ග සඳහන් කළේය.
මාස කිහිපයක් විදේශගතව සිටි පලනි දිගම්බරන් මහතා නැවත ශ්රී ලංකාවට පැමිණි පසු එක්සත් ජාතික පක්ෂ මහලේකම්වරයා හමුවී සාකච්ඡා කිරීම විශේෂ සිද්ධියකැයි සිරිකොත ප්රකාශකයෙක් පැවැසීය.
පලනි දිගම්බරන් මහතා සහ එජාප මහලේකම් පාලිත රංගේ බණ්ඩාර මහතා අතර සාකච්ඡා වූ කරුණු ගැන මාධ්යයට අනාවරණය නොවූ බවද සාකච්ඡාව ගැන එජාප මහලේකම්වරයා පක්ෂ නායක රනිල් වික්රමසිංහ මහතාට වහාම කරුණු වාර්තා කර ඇතැයි වාර්තා වෙයි.”
කෙසේවෙතත් මෙම සිදුවීමෙන් පසු සමගි ජන බලවේගයේ නායක සජිත් ප්රේමදාස මහතාට ඇමතුමක් දී ඇති දිගම්බරම් මහතා සදහන් කොට ඇත්තේ ‘එජාප මෝඩ චූන් නිව්ස්කාරයන්ගේ වැඩවලට කලබල වෙන්න එපා…’ යැයි කියාය.
