1975 අංක 01 දරන වත්කම් හා බැරකම් ප්රකාශ කිරීමේ නීතියේ රහස්යතා වගන්තිය ඉවත් කිරීම සඳහා ඉරාන් වික්රමරත්න මන්ත්රීවරයා විසින් පෞද්ගලික මන්ත්රී පනතක් ඉදිරිපත් කොට තිබේ.
පනත අදාළ වන පුද්ගලයින්ගේ ලැයිස්තුවට ජනාධිපතිවරයාද ඇතුළත් කර තිබීම විශේෂත්වයකි.
මෙම සංශෝධනය යෝජනා කරනු ලබන්නේ රට වෙනසක් සහ වගවීම ඉල්ලා සිටින අවස්ථාවක ය. එය ප්රධාන අංශ පහක් හරහා මෙය කිරීමට උත්සාහ කෙරේ.
තොරතුරු දැනගැනීමේ අයිතිවාසිකම පිළිබද පණත ප්රකාරව තොරතුරු ලබාදීමට තිබෙණ බැඳීම තහවුරු කිරීම සහ උපරිමයෙන් තොරතුරු ලබාදිය යුතුවීමේ මූලධර්මය ආරක්ෂා කිරීම අරමුණු කරගෙන, එසේ කිරීමට දැනට බාධාවක් වී ඇති 1975 අංක 01 දරන වත්කම් හා බැරකම් ප්රකාශ කිරීමේ නීතියේ පවත්නා කාලයට නොගැලපෙන ඉපැරණි ආරක්ෂක විධිවිධානයන් ඉවත් කිරීමට පළමුව මින් යෝජනා කර තිබේ. නිසි ආරක්ෂක විධිවිධානයන් ඇතුළත මෙය සිදුකර තිබෙණ අතර, ඒ අනුව හෙළි කරන වත්කම් ප්රකාශනවලට පූර්ණව, පොදුවේ මහජන ප්රවේශයක් ලබා දීමක් සිදුනොවේ. වත්කම් ප්රකාශ කරන්නන්ගේ පෞද්ගලිකත්වය, වත්කම් ප්රකාශනයන්ගේ විනිවිදභාවය සම්බන්ධයෙන් පවත්නා ජාත්යන්තර ප්රමිතීන්ට අනුකූලව ආරක්ෂා කිරීමත් කෙටුම්පත මගින් සහතික කර ඇත.
දෙවනුව, මැතිවරණ අපේක්ෂකයින් නාමයෝජනා සමඟ වත්කම් ප්රකාශ ඉදිරිපත් කළ යුතු බව පනත් කෙටුම්පත සහතික කරයි. මෙය, පාරදෘශ්යභාවය වැඩි කිරීම සඳහා මහජන නියෝජිතයන් සහ නිලධාරීන් තම ධනය නිසි ලෙස හෙළිදරව් කළ යුතු බවට වර්තමාන දේශපාලන සම්බන්ධයෙන් සමාජයේ පවත්නා කනස්සල්ලට සහ අරගලයේ ඉල්ලීමට ප්රතිචාරයකි.
තෙවනුව, මෙම පනත අදාළ වන පුද්ගලයින්ගේ ලැයිස්තුවට ජනාධිපතිවරයා ද, ඇතුළත් කර ඇත.
සිව්වනුව, අල්ලස් හෝ දූෂණ චෝදනා විමර්ශන කොමිෂන් සභාව (CIABOC) වැනි මධ්යම අධිකාරියකින් වත්කම් ප්රකාශයන් වරින් වර පරීක්ෂා කර සත්යාපනය කරන බව පනත් කෙටුම්පත සහතික කරයි. මෙය මින් පෙර කිසි දිනක සිදු කර නොමැති අතර, වත්කම් ප්රකාශන කැදවණු ලැබුණේ පැමිණිල්ලක් ගොණු කර ඇති අවස්ථාවක පමණි. පනත් කෙටුම්පත මගින් මෙම වත්කම් ප්රකාශන නිරීක්ෂණය කිරීමට සහ සත්යාපනය කිරීමට CIABOC හට මාර්ගගත ද්වාරයක් ද හඳුන්වා දී ඇත. මෙම පනතේ සංශෝධනවලින් අදහස් වන්නේ රාජ්ය සේවයට පැමිණි පසු නිලධාරීන්ට රහසේ විශාල ධනස්කන්ධයක් රැස් කළ නොහැකි බවයි. සිය ධනයේ විශාල ඉහළ යෑමක් සම්බන්ධයෙන් මනා පැහැදිලි කිරීමක් සිදුකිරීමට ඔවුන්ට සිදුවණු ඇත. සිදුවිය යුත්තේ ද, එයයි.
පස්වනුව, සොරකම් කරන ලද වත්කම් සම්බන්ධයෙන් එම වත්කම් අයකර ගැනීම සඳහා නීතිය ක්රියාත්මක කිරීමට පනත් කෙටුම්පත සහාය වේ. සොරාගත් වත්කම් නැවත අයකර ගැනීම සඳහා අරගලයෙන් කරන ලද ඉල්ලීම්වලට විසඳුම් සෙවීම සඳහා මෙය විශේෂයෙන් ඇතුළත් කර ඇත.
එබැවින්, සොරකම් කරන ලද වත්කම් වඩාත් කැපී පෙනෙන බවටත්, වත්කම් සම්බන්ධයෙන් යම් ප්රකාශයක් නොමැති නම්, එය වඩාත් විනිවිද භාවයෙන් පෙනීමටත්, නිවැරදි කිරීමටත් පනත මගින් විධිවිධාන සලසා ඇත.
දූෂණයට එරෙහි සටනේදී නීති පැනවීම ආරම්භයක් පමණි.
දූෂණය අවම කිරීම බලාත්මක වීමට නම්, පොලිසිය, අල්ලස් හා දූෂණ කොමිසන් සභාව (CIABOC) සහ නීතිපතිවරයා යන බලාත්මක කිරීමේ ආයතනවල සංවිධානාත්මක බව සහ කළමනාකරණ ක්රියාවලිය ප්රතිනිර්මාණය කළ යුතුය.
දූෂණය නැති කිරීමට හෝ අවම කිරීමට නම්, ආණ්ඩුවේ විධායක හස්තයෙන් ආදර්ශය සැපයිය යුතුය. ස්වේච්ඡාවෙන් තම වත්කම් බැරකම් ප්රකාශ කරන ලෙස වත්මන් සහ හිටපු ජනාධිපතිවරුන්, අගමැතිවරුන් සහ කැබිනට් අමාත්යවරුන්ගෙන් මම ඉල්ලා සිටිනවා. මෙය නව ශ්රී ලංකාවක් ගොඩනැගීමට නිසැක ආදර්ශයක් වනු ඇත.
