පාර්ලිමේන්තු මන්ත්රීවරයකු ලෙස පත්වීමට ඇති නුසුදුසුකම් මොනවාද යන්න නිශ්චිතව වසර 44ක් පුරා ආණ්ඩු ක්රම ව්යවස්ථාවට ඇතුළත් කොට නොමැති බව මේ වනවිට අනාවරණය වී තිබේ.
මෙම කරුණ අනාවරණ වී ඇත්තේ බැසිල් රාජපක්ෂ මහතා සිය පාර්ලිමේන්තු මන්ත්රී ධුරයෙන් ඉවත් වීමෙන් පසු කෝටිපති ව්යාපාරික ධම්මික පෙරේරා මහතාගේ නම පාර්ලිමේන්තු මන්ත්රීවරයකු ලෙස ගැසට් කිරීමත් සමගය.
ඒ අනුව ලබන 21 වැනිදා ධම්මික පෙරේරා මහතා පාර්ලිමේන්තු මන්ත්රීවරයකු ලෙස දිවුරුම් දීමට නියමිතය.
නීති ක්ෂේත්රයේ ප්රවීණයන් පෙන්වා දී ඇත්තේ ආණ්ඩු ක්රම ව්යවස්ථාවේ 91/1/ඉ වගන්තිය මගින් පාර්ලිමේන්තු මන්ත්රි ධුරය දැරීමට නුසුදුසුකම් පාර්ලිමේන්තුව විසින් නීතියෙන් නියම කරනු ලැබිය යුතු වුවද මෙතෙක් එම වගන්ති පාර්ලිමේන්තුව මගින් සම්මත කොට නොමැති බවකි.
එම වගන්තියේ සඳහන් වන්නේ මෙසේය.
“(ඉ) රජය විසින් හෝ රාජ්ය සංස්ථාවක් විසින් නැතහොත් රජය වෙනුවෙන් හෝ රාජ්ය සංස්ථාවක් වෙනුවෙන් එළඹ ඇත්තා වූ යම්කිසි ගිවිසුමකට යම්කිසි තැනැත්තකුගේ යම් ආකාරයක සම්බන්ධතාවක් තිබීම පාර්ලිමේන්තු මන්ත්රීවරයකු වශයෙන් තෝරා පත්කර ගනු ලැබීමට හෝ පාර්ලිමේන්තුවේ අසුන් ගැනීමට සහ පාර්ලිමේන්තුවේදී ඡන්දය දීමට හෝ නුසුදුසුකමක් යැයි පාර්ලිමේන්තුව විසින් නීතියෙන් නියම කරනු ලැබේද, එවැනි ගිවිසුමකට ඒ ආකාරයේ සම්බන්ධතාවක් ඇති තැනැත්තෙක් පාර්ලිමේන්තුවේ මන්ත්රීවරයකු වශයෙන් තෝරා පත්කර ගනු ලැබීමට හෝ පාර්ලිමේන්තුවේ අසුන් ගැනීමට සහ පාර්ලිමේන්තුවේදී ඡන්දය දීමට හෝ සුදුස්සෙක් නොවන්නේය.”
එම නිසා මෙවැනි තත්ත්වයක් සම්බන්ධයෙන් තීරණයක් ගැනීමේදී ව්යවස්ථාව තුළ පවතින මෙම හිඩැස හේතුවෙන් බරපතළ ප්රශ්නයක් මතුවන බව නීති ක්ෂේත්රයේ ප්රවීණයන්ගේ මතය වී තිබේ.
කෙසේ වෙතත් නීති ක්ෂේත්රයේ ප්රවීණයන් පෙන්වා දෙන්නේ 2015 වසරේදීද එක්සත් ජාතික පක්ෂ නායක රනිල් වික්රමසිංහ මහතාට එරෙහිව මෙවැනිම ආකාරයේ නඩුවක් ගොනුවූ බවත්, මෙම තර්කය යටතේම එම නඩුව ප්රතික්ෂේප වූ බවත්ය.
එවකදී වික්රමසිංහ මහතා සිය පවුලේ ආයතනයක් වන ලේක්හවුස් ප්රින්ටර්ස් ඇන්ඩ් පබ්ලිෂර්ස් (පී.එල්.සී.) සමාගමේ කොටස් හිමියකු වශයෙන් කටයුතු කළ අතර, රාජ්ය ආයතන සමග ගනුදෙනු කිරීම හේතුවෙන් ඔහුගේ මන්ත්රී ධුරය අහෝසි කළ යුතු බවට එහිදී අධිකරණය හමුවේ නඩුවක් ගොනු විය.
නමුත් 91/1/ඉ වගන්තිය යටතේ ප්රතිපාදන මෙතෙක් ඉදිරිපත් කොට නොමැති නිසා එම නඩුව ප්රතික්ෂේප කිරීමට එවකදී අධිකරණය කටයුතු කළ බව ඔව්හු පෙන්වා දෙති.
91/1/ඉ වගන්තිය
රනිල්ගේ නඩුව
