විදුලිබල මණ්ඩලයට ඉදිරියට ඉන්ධන ලබා ගැනීමට අවශ්ය නම් ඒ සඳහා අනිවාර්යයෙන්ම ඩොලර් ලබාදිය යුතු බව බලශක්ති අමාත්ය උදය ගම්මන්පිල පවසයි.
එමෙන්ම ඉන්ධන ලබා ගැනීම සම්බන්ධයෙන් බලශක්ති අමාත්යවරයා සමග අද (17) දිනයේ සාකච්ඡා කිරීමට බලාපොරොත්තු වන බව විදුලි බල අමාත්ය ගාමිණි ලොකුගේ ඊයේ (16) ප්රකාශ කර සිටියේය.
එයට ප්රතිචාර දක්වමින් බලශක්ති අමාත්යවරයා පවසන්නේ විදුලි බල මණ්ඩලයට ඉන්ධන ලබා ගැනීමට නම් අවශ්ය වන්නේ සාකච්ඡා නොව අවශ්ය ඩොලර් ලබා දීම බවයි.
මේ අතර ඉදිරි දින කිහිපය සඳහා ඉන්ධන සපයාගැනීම වෙනුවෙන් ලංකා IOC සමාගම සමග සාකච්ඡා කරන බව විදුලිබල අමාත්ය ගාමිණි ලොකුගේ පවසයි.
මේ සම්බන්ධයෙන් අදහස් දැක්වූ විදුලිබල අමාත්ය ගාමිණි ලොකුගේ,
“විවිධ විකල්ප මාර්ග ගැන කල්පනා කරමින් ඉන්නේ. අපි බලනවා IOC සමාගමෙන් හරි ඉදිරි දවස් කිහිපයට තෙල් ටිකක් ගන්න පුළුවන්ද කියලා. විදුලබල මණ්ඩලයේ සභාපතිතුමාට කියලා තියෙනවා ඒ ගොල්ලෝ සමග සාකච්ඡාවක් පටන්නගන්න කියලා හෙට. මමත් ඕනේ නම් එන්නම් කිව්වා.”
මාධ්යවේදියා – “ඒ කියන්නේ දවස් 3ක් සඳහා විදුලි කැපෙන්නේ නැහැ කියලා දැන් සහතික කරන්න පුළුවන්ද ?”
අමාත්ය ගාමිණි ලොකුගේ – “22 වෙනතුරු අපි කොහොම හරි තෙල් හොයාගන්න ඕනේ දුවන්න.”
මාධ්යවේදියා – “ඛනිජ තෙල් විදුලිබල මණ්ඩලයට ඕන කියලා ඇමතිතුමාගෙන් ඉල්ලීමක් කළාද ?”
අමාත්ය ගාමිණි ලොකුගේ – “නැහැ ඉල්ලීමක් කරන්න දෙයක් නැහැ. ඒක වාර්ෂික ඇනවුමක්. ඒ වාර්ෂික ඇනවුමට සපයන්න ඕනේ තෙල් සංස්ථාව විසින්. එහෙම නැතුව දවසින් දවස ඉල්ලන්නේ නැහැ. අවුරුද්ද පැලෑන් කරනකොට ඒ අය පැලෑන්කරන්න ඕනේ තෙල් සංස්ථාවට මෙච්චර ඕනේ කරනවා කියලා. බලාගාරවලට මෙච්චර ඕනේ කරනවා. පුද්ගලික අංශයේ වාහනවලට මෙච්චර ඕනේ කරනවා. ඒ සැලැස්ම අනුව තමයි ගෙන්නන්නේ. ඉතින් අපි බලාපොරොත්තු වෙනවා ඒක අනුව ගේනවා කියලා.”
